ស្រ្តីជនជាតិចិនដែលបានហែកព្រះឆាយាល័ក្ខណ៍ព្រះករុណា ព្រះបាទសម្តេច ព្រះនរោត្តមសីហនុ ត្រូវបានបណ្ដេញចេញពីព្រះរាជាណាចក្រកម្ពុជា កាលពីព្រឹកមិញនេះ បន្ទាប់ពីសាលាដំបូងរាជធានីភ្នំពេញ ចេញសាលក្រមលេខ៧៨ ច ចុះថ្ងៃទី២៣ ខែតុលា ឆ្នាំ២០១២។
Wang Xiaojiao ត្រូវបណ្ដេញចេញពីកម្ពុជា
ស្រ្តីជនជាតិចិន ឈ្មោះ Wang Xiaojiao កើតថ្ងៃទី១២ ខែកក្កដា ឆ្នាំ១៩៦៩ កាន់លិខិតឆ្លងដែនលេខ G22632308 ដែលហែកព្រះឆាយាល័ក្ខណ៍ ព្រះវររាជបិតា ព្រះបាទសម្តេចនរោត្តមសីហនុ ត្រូវបានមន្រ្តីនគរបាលនៃនាយកដ្ឋានអន្តោប្រវេសន៍ កម្ពុជាបណ្តេញចេញពីព្រះរាជាណាចក្រកម្ពុជាហើយ នៅវេលា ម៉ោង ៨ ព្រឹក ថ្ងៃទី២៤ ខែតុលា ឆ្នាំ២០១២ តាមជើង យន្តហោះ CZ 324 (Phnom Penh-Guang Zhou)។
Wang Xiaojiao លុតជង្គង់សុំទោសនៅមុខព្រះឆាយាលក្ខណ៍របស់សម្ដេចតា
យោងតាមទំព័រ PL ដកស្រង់សំដីរបស់លោក ឧត្តមសេនីយ៍ទោ ពិន ពិសិដ្ឋ ប្រធាននាយកដ្ឋានអន្តោប្រវេសន៍ បានឲ្យដឹងថា ការបណ្តេញស្រ្តីជនជាតិចិនចេញពីព្រះរាជាណាចក្រកម្ពុជានេះ គឺធ្វើឡើងតាម បទបញ្ជារបស់ ឯកឧត្តម នាយឧត្តមសេនីយ៍ អគ្គស្នងការនគរបាលជាតិ និងសាលក្រមលេខ៧៨ ច ចុះថ្ងៃទី២៣ ខែតុលា ឆ្នាំ២០១២ របស់សាលាដំបូងរាជធានីភ្នំពេញ៕
ស្ត្រីជនជាតិចិនដែលហែកព្រះឆាយាលក្ខណ របស់សម្ដេចតា ត្រូវដាក់គុក១ ឆ្នាំ
ដោយ ៖ ចិត្រាប្រភព ៖ PL