ខេត្តបន្ទាយមានជ័យ ៖ ម្តាយ និងកូនដេកស្លាប់ក្នុងថ្លុកឈាមដោយសាររថយន្តបុកពីក្រោយពេល ជិះកង់។ ហេតុការណ៍នេះកើតឡើងនៅវេលាម៉ោង២ និង៣០នាទីរសៀល ថ្ងៃទី១៩ ខែមករា ឆ្នាំ២០១១ លើដងផ្លូវពីភូមិកូនដំរីទៅស្រុកម៉ាឡៃ ក្នុងភូមិបឹងរាំង ឃុំអូរស្រឡៅ ស្រុកម៉ាឡៃ ខេត្តបន្ទាយមានជ័យ។ មន្ត្រីនគរបាលចរាចរខេត្តឱ្យដឹងថា ស្ត្រីរងគ្រោះឈ្មោះរ៉ាញ់ ញ៉ាញ់ អាយុ៣៤ឆ្នាំ នៅភូមិថ្មី ឃុំអូរស្រឡៅ ស្រុកម៉ាឡៃ ចំណែកកូនប្រុសឈ្មោះណំ ជិន អាយុ១៣ឆ្នាំ ។ ឯអ្នកបើកបររថយន្តឈ្មោះផុន វុន ភេទប្រុស អាយុ២៧ឆ្នាំ មានស្រុកកំណើតនៅភូមិព្រះធាតុ ឃុំព្រះធាតុ ស្រុកកំពង់ត្របែក ខេត្តព្រៃវែង ។ រថយន្តនោះម៉ាកហ៊ីយ៉ាន់ដាយសណ្តោងរ៉ឺម៉កផ្ទុកទំនិញ ពាក់ស្លាកលេខផ៥៨០០ភព៣។
ប្រភពព័ត៌មានដដែលឱ្យដឹងថា តាមសាក្សីនៅកន្លែងកើតហេតុប្រាប់សមត្ថកិច្ចថា ស្ត្រីរងគ្រោះជិះកង់ឌុបកូនប្រុសពីកើតទៅលិចស្របទិសគ្នា ជាមួយរថយន្ត។ ចំណែកអ្នកបើកបររថយន្តបើកវ៉ារថយន្តកាមរីខាងមុខ ប៉ុន្តែវ៉ាមិនរួចក៏ងាកជែងខាងស្តាំវិញ ហើយជ្រុលចង្កូតទៅបុកស្ត្រីរងគ្រោះនៅលើចិញ្ចើមផ្លូវខាងស្តាំ បណ្តាលឱ្យកង់រថយន្តកិនក្បាលក្មេងប្រុសបែកខ្ទេច និងស្ត្រីនោះត្រូវកង់រថយន្តកិនចំពោះបែកស្លាប់ភ្លាមនៅកន្លែង កើតហេតុ។ បើតាមសាច់ញាតិបញ្ជាក់ថា ស្ត្រីរងគ្រោះមានផ្ទៃពោះ៧ខែផងដែរ។ លោកវរសេនីយ៍ទោ ឈឿម សុផុន នាយការិយាល័យចរាចរជើងគោកខេត្តឱ្យដឹងថា រថយន្តបង្កគ្រោះថ្នាក់នោះត្រូវបាននាំយកទៅរក្សាទុកនៅការិយាល័យ ចរាចរខេត្ត ខណៈអ្នកបើកបរគេចខ្លួនបាត់៕
http://kohsantepheapdaily.com.kh/art...21-040032.html