រាជធានីភ្នំពេញ ៖ ជាសំណាងល្អមួយក្នុងមួយពាន់គ្រោះថ្នាក់ដែលពុំមានអ្នកណាម្នាក់ស្លាប់ ឬរបួសក្នុងឧបទ្ទវហេតុផ្ទុះទុយោផ្សារដែក កាលពីវេលាម៉ោង៣ និង៤៥នាទីរសៀលថ្ងៃទី៥ មករា ២០១០ នៅមុខក្លឹបកំសាន្តហ្គោស្តាបា(អតីតគុកតេ៣) ផ្លូវលេខ១៥៤ សង្កាត់ជ័យជំនះ ខណ្ឌដូនពេញ។ សាក្សីនិយាយឱ្យសមត្ថកិច្ចដឹងថា ពេលជាងកំពុងផ្សារដែកតួម៉ូតូ ស្រាប់តែមានផ្សែងហុយទ្រលោមដោយសារផ្ទុះទុយោផ្សារដែកដែលប្រើប្រាស់ថ្មស្អុយ។ នេះពិតជាសំណាងមួយនៅក្នុងមួយពាន់គ្រោះថ្នាក់ដែលគ្រាន់តែផ្ទុះទុយោផ្សារប៉ុណ្ណោះ បើសិនជាផ្ទុះធុងថ្មស្អុយវិញ ប្រាកដជាមានអ្នកស្លាប់ និងរបួសច្រើនព្រោះមានមនុស្សជាច្រើនឈរលក់ទំនិញក្បែរចំណុចកើតហេតុ។សាក្សីបន្តថា ទុយោផ្សារដែកផ្ទុះដាច់ចេញហើយមានផ្សែងខ្មៅនៅលើធុងថ្មស្អុយ ព្រមទាំងមានអំបែងតូចៗជះទៅលើស្លាកក្លឹបកំសាន្តហ្គោស្តាបា។ ក្រោយកើតហេតុនគរបាលមូលដ្ឋានទៅពិនិត្យ រួចយករទេះដាក់ធុងផ្សារដែក និងនាំជាងផ្សារដែកទៅស្នាក់ការប៉ុសិ៍្តនគរបាលជ័យជំនះ ដើម្បីសាកសួរមូលហេតុដែលបណ្តាលឱ្យផ្ទុះ។ អត្តសញ្ញាណជាងផ្សារដែកនោះនគរបាលមិនប្រាប់ទេ ហើយបានឱ្យវិលត្រឡប់ទៅលំនៅឋានវិញនាល្ងាចថ្ងៃដដែល បន្ទាប់ពីសាកសួររួច។ ហេតុការណ៍នោះមិនត្រូវនគរបាលប៉ុសិ៍្តរាយការណ៍ជូនថ្នាក់លើទេ ដោយសំអាងថា មិនមានគ្រោះថ្នាក់ដល់ជីវិតមនុស្ស ក៏ដូចជាខូចខាតសំភារអ្នកដទៃ៕
