ខេត្តព្រៃវែង ៖ ចោរប្រដាប់ដោយកាំភ្លើងមានគ្នា៦នាក់បានចូលប្លន់ផ្ទះជួសជុលម៉ាញ៉េបាញ់ស្លាប់ម្នាក់ និងរងរបួស២នាក់ បង្កឱ្យមានការភ្ញាក់ផ្អើល និងភ័យខ្លាចកាលពីវេលាម៉ោង៦និង២០នាទីល្ងាចថ្ងៃទី៨ មករា ២០១១ នៅផ្ទះមួយស្ថិតក្នុងផ្សារស្នេហ៍ ភូមិស្នេហ៍ ឃុំធាយ ស្រុកបាភ្នំ ។បុរសរងគ្រោះបាត់បង់ជីវិតឈ្មោះចិន សុផល អាយុ៤០ឆ្នាំ ជាជាងជួសជុលម៉ាញ៉េ រស់នៅក្នុងភូមិ-ឃុំកើតហេតុខាងលើ ត្រូវចោរបាញ់ឱ្យរងរបួសធ្ងន់ ហើយក្រោយមកបានស្លាប់នៅពាក់កណ្តាលផ្លូវ ខណៈបញ្ជូនទៅសង្គ្រោះនៅមន្ទីរពេទ្យ ។ ចំណែកសាច់ញាតិនៃក្រុមគ្រួសារនេះ២នាក់ទៀតបានរងរបួសធ្ងន់ កំពុងសំរាកព្យាបាលនៅឯមន្ទីរពេទ្យ...។ អំពើប្លន់នៅកណ្តាលផ្សារនេះ បានក្លាយជាសមរភូមិប្រយុទ្ធដោយចុងកាណុងកាំភ្លើងមួយប្រាវផងដែរ ខណៈប៉ូលិសទៅជួយធ្វើអន្តរាគមន៍គឺបាញ់ទៅបាញ់មកបានបន្តិចទើបក្រុមចោរបាននាំគ្នារត់គេច ខ្លួន ៕