ខេត្តកំពង់ឆ្នាំង ៖ កុមារីអាយុ៦ឆ្នាំម្នាក់ត្រូវស្ត្រីពុំស្គាល់មុខនាំទៅដោះយកគ្រឿងអលង្ការរួចទុកចោលចំងា យរាប់សិបគីឡូម៉ែត្រពីសាលារៀនរបស់នាង ។ ការបាត់ក្មេងស្រី្តនេះនៅម៉ោងប្រមាណ២រសៀល ថ្ងៃទី១២ មករា ហើយឪពុក ម្តាយ និងប៉ូលិសព្យាយាមតាមរក និងប្រកាសតាមវិទ្យុទាក់ទងពេញខេត្តកំពង់ឆ្នាំង ។ លោកហ៊ុល វាសនា អធិការរងក្រុងកំពង់ឆ្នាំងដែលស្វះស្វែងរកកុមារីនោះឱ្យដឹងថា នាងឈ្មោះលី រចនា អាយុ៦ឆ្នាំ មានឪពុកឈ្មោះលី សែន ទីលំនៅក្នុងភូមិត្រពាំងបី សង្កាត់កំពង់ឆ្នាំង ក្រុងកំពង់ឆ្នាំង ។នៅវេលាម៉ោង១រសៀល ថ្ងៃទី១២ ខែមករា ជីតាបានដឹកកុមារីរងគ្រោះទៅសាលាគំរូក្រុងដើម្បីរៀនគួថ្នាក់ទី១ ប៉ុន្តែអត់ទាន់ជួបគ្រូគាត់ឱ្យចៅស្រីលេងនៅមុខថ្នាក់រៀន ។ លុះដល់ម៉ោងជាង២រសៀលឪពុក ម្តាយទៅយកនាងទៅផ្ទះស្រាប់តែបាត់ពីសាលាហើយ ប្តឹងប៉ូលិសឱ្យជួយរកគ្រប់ច្រកល្ហក ។ ប៉ូលិសជូនឪពុក ម្តាយដើររកតាមទីកន្លែងដែលសង្ស័យ ប៉ុន្តែរកក្មេងស្រីនោះពុំឃើញឡើយ ។លោកអធិការរងបន្តថា រហូតដល់ម៉ោងប្រហែល៦ និង៣០នាទីល្ងាចទើបទទួលដំណឹងថា នៅសាលារៀនមួយក្នុងស្រុកពញាឮខេត្តកណ្តាលប្រទះឃើញកុមារីម្នាក់ ។ បុរសជាឪពុកទូរស័ព្ទទៅប្អូនប្រុសនៅតំបន់ព្រែកព្នៅជិតសាលារៀននោះឱ្យទៅមើលក៏ដឹងច្បាស ់ថា ជាក្មេងស្រីដែលបាត់ខ្លួន ។ ដឹងដូច្នេះបុរសជាឪពុកបានទៅយកកូនត្រឡប់ទៅផ្ទះវិញ ។ លោកអធិការរងរៀបរាប់ថា កុមារីអាយុ៦ឆ្នាំរៀបរាប់ថា នៅពេលជីតាយកទៅដាក់មុខថ្នាក់រៀន ដោយពុំទាន់ឃើញគ្រូមក នាងដើរចេញទៅក្រៅសាលាបំណងទិញនំហូប ។ ពេលចេញដល់ខ្លោងទ្វារសាលានាងជួបស្រ្តីម្នាក់ជិះម៉ូតូសង់កូរ៉េពណ៌ក្រហម ហៅឈ្មោះនាងចំតែម្តងថា «រចនាទៅតាមតាចាំមីងជូនទៅ» ។ដោយស្ត្រីនោះដឹករូបនាងខុសផ្លូវនាងប្រាប់ថា «ខុសផ្លូវទៅផ្ទះតាខ្ញុំហើយ» ។ ទោះជាយ៉ាងណាក្តី ស្ត្រីនោះនៅតែបើកម៉ូតូឌុបនាងទៅទុកក្នុងសាលារៀនមួយ ដោយនិយាយថា «បនិ្តចទៀតឪពុក ម្តាយឯងមកយកហើយ» ។ ប្រភពដដែលបន្តថា ស្ត្រីម្នាក់នោះបានដោះយកកងដៃប្លាទីន និងក្រវិលបា្លទីនពីកុមារីរងគ្រោះ ដែលមានតំលៃតិចតួចប៉ុណ្ណោះ ។ ក្រោយរឿងហេតុនោះកើតឡើងប៉ូលិសបានណែនាំ និងជូនដំណឹងដល់គ្រប់សាលារៀនឱ្យលោកគ្រូ អ្នកគ្រូប្រុងប្រយ័ត្នសំរាប់អ្នកទៅទទួលយកក្មេង ៕
