ខេត្តកំពង់ឆ្នាំង ៖ បុរសប្រកបរបរធ្វើស្ករត្នោតម្នាក់ បានរងរបួសយ៉ាងធ្ងន់ធ្ងរ បន្ទាប់ពីរូបគាត់ធ្លាក់ពីលើចុងត្នោតកំពស់ប្រមាណ៨ម៉ែត្រ កាលពីវេលាម៉ោង៧ព្រឹក ថ្ងៃទី១៣ មករា នៅក្នុងភូមិសាឡាង ឃុំស្វាយជ្រុំ ស្រុករលាប្អៀរ ។ ក្រោយកើតហេតុដោយចៃដន្យនេះ ជនរងគ្រោះត្រូវបានដឹកមកសង្គ្រោះនៅមន្ទីរពេទ្យខេត្ត ។ បុរសរងគ្រោះឈ្មោះវ៉ាន់ គា អាយុ៣៧ឆ្នាំ ប្រពន្ធឈ្មោះសេង វណ្ណា អាយុ៣៨ឆ្នាំ មានកូន៣នាក់ ក្នុងនោះប្រុសម្នាក់ ។ តាមសំដីរបស់ស្ត្រីជាប្រពន្ធបានរៀបរាប់ថា ក្រៅពីធ្វើស្រែចំការប្តីគាត់បានប្រកបរបរឡើងត្នោតរំងាស់យកស្ករជាង១០ឆ្នាំហើយ ក្នុងមួយថ្ងៃបានស្ករប្រមាណ៥គីឡូក្រាម ។នៅថ្ងៃកើតហេតុប្តីបានទៅឡើងត្នោតឆ្ងាយពីផ្ទះ ហើយខណៈឡើងដល់.កត្នោត ក៏បានលូកដៃទៅចាប់តោងចំកាំបង្អោងដែលពុក បណ្តាលឱ្យបាក់ធ្លាក់មកដីដែលមានកំពស់ប្រមាណជា៨ម៉ែត្រ រងរបួសយ៉ាងធ្ងន់ធ្ងរ ។ ភ្លាមនោះក្រុមអ្នកឡើងត្នោតដូចគ្នា បានជួយសែងប្តីមកផ្ទះ និងបានដឹកយកទៅសង្គ្រោះនៅមន្ទីរពេទ្យខេត្ត ។ ក្រុមគ្រូពេទ្យបានប្រាប់ថា ជនរងគ្រោះបានបាក់ជើងខាងស្តាំ បាក់ដៃខាងស្តាំ បែកមាត់យ៉ាងធំ និងរបួសច្រើនកន្លែងទៀត ។ គ្រូពេទ្យប្រាប់ថា ស្ថានភាពជនរងគ្រោះនៅក្នុងការតាមដាននៅឡើយ ព្រោះក្រៅពីរបួសផ្នែកខាងក្រៅ មិនដឹងថា ផ្នែកខាងក្នុងប៉ះពាល់លើអ្វីទៀតឡើយ ។ គេនៅចាំបានថា កាលពីពាក់កណ្តាលខែធ្នូ ឆ្នាំ ២០១០ បុរសម្នាក់បានស្លាប់ដោយសារធ្លាក់ពីលើចុងត្នោតដែរ ខណៈដែលបុរសនោះឡើងត្នោត ហើយដើរសួតាមស្នួពីចុងត្នោតមួយទៅចុងត្នោតមួយទៀត បាក់ធ្លាក់មកដី និងបានស្លាប់នៅក្នុងមន្ទីរពេទ្យ ៕
