ថ្ងៃ សុក្រ ទី ២១ ខែ មករា ឆ្នាំ ២០១១
លោកវរសេនីយ៍ត្រីអុឹម យ៉ុន អធិការនគរបាលស្រុកបាធាយបានឱ្យដឹងថា កាលពីវេលាម៉ោង៨យប់ថ្ងៃទី១៩ មករា ឆ្នាំ២០១១ នៅលើគ្រែមុខផ្ទះជាងក្រឡឹងម្នាក់ ដែលមានចំងាយពីរោងទឹកត្នោតជូរប្រមាណ៧,៥០ម៉ែត្រ គេបានឃើញឈ្មោះនន ថា ផឹកទឹកត្នោតជូរជាមួយឈ្មោះស៊ឹម ស៊ាត រស់នៅភូមិជើងឆ្នុក រហូតដល់ម៉ោង១២និង៣០នាទីយប់រំលងអធ្រាត្រ ក៏ស្រាប់តែឮមាត់ប្រកែកគ្នារួចក៏ស្ងាត់ ។ លោកអធិការនគរបាលស្រុកបាធាយប្រាប់បន្តថា បន្ទាប់មកស្រាប់តែឃើញអណ្តាតភ្លើងឆេះរោងរបស់ឈ្មោះនន ថា ហើយភ្លាមៗនោះត្រូវបានប្រជាពលរដ្ឋនៅក្បែរនោះនាំគ្នាបើកទ្វារ ផ្ទះរត់មកជួយជះទឹកពន្លត់ និងបានឃើញឈ្មោះនន ថា ដេកស្លាប់នៅក្នុងរោងដែលឆេះនោះ ។ តាមរយៈការពិនិត្យរបស់សមត្ថកិច្ចជំនាញ សពមានស្នាមរបួសត្រង់បំពង់កដោយកាំបិតត្នោតដោតជាប់ក្រោមត្រចៀក ឆ្វេងដួលដេកនៅលើគ្រែផឹកស៊ី និងវត្ថុតាងមានបន្សល់ទុកដំបងឫស្សី១កំណាត់ប្រវែងជាង២ម៉ែត្រ មានប្រឡាក់ឈាមទៀតផង ។
រហូតមកដល់ព្រឹកថ្ងៃទី២០ មករា វេលាម៉ោង១០និង២០នាទីព្រឹក កំលាំងសមត្ថកិច្ចបានស្រាវជ្រាវយ៉ាងយកចិត្តទុកដាក់រហូតឈានដល់ចាប់ បានជនសង្ស័យម្នាក់ឈ្មោះស៊ឹម ស៊ាតបញ្ជូនមកកាន់អធិការដ្ឋាននគរបាលស្រុកដើម្បីសួរនាំ ។ លោកអធិការនគរបាលស្រុកបាធាយបានបញ្ជាក់ថា តាមការសាកសួរទំនាស់ដែលឈានដល់វាយសំលាប់ឈ្មោះនន ថា ក៏ព្រោះតែពេលផឹកស្រវឹងនោះមានការនិយាយគងពាក្យសំដីគ្នា ទើបក្រុមជន២នាក់បានវាយសំលាប់ជនរងគ្រោះ រួចហើយយកកំណាត់ជ្រលក់ប្រេងសាំងដុតរោងតែម្តង ជាហេតុបណ្តាលឱ្យបុរសឈ្មោះនន ថា ត្រូវភ្លើងឆេះរោលខ្លោចរួញក្រញង់មើលមិនយល់ ។ ពេលនេះសមត្ថកិច្ចកំពុងតាមប្រមាញ់ចាប់បក្សពួក ម្នាក់ទៀតដើម្បីយកមកផ្តន្ទាទោសតាមច្បាប់៕