រាជធានីភ្នំពេញ ៖ យុវជនម្នាក់បានរងរបួសយ៉ាងធ្ងន់ធ្ងរ ដោយសារតែខ្មាន់កាំភ្លើងមួយក្រុមជិះម៉ូតូម៉ាកណៃហត មួយគ្រឿងដេញតាមបាញ់ប្រហារបណ្តាលឱ្យត្រូវចំនួន២គ្រាប់ ខណៈដែលជនរងគ្រោះរូបនោះកំពុងជិះម៉ូតូជាមួយមិត្តភក្តិធ្វើដំណើរចេញពីពិធីបុណ្យ ខួបកំណើតក្មួយក្នុងបំណងទៅរាំលេងក្នុងពិធីមង្គលការមួយកន្លែងទៀត ។ ប៉ុន្តែអ្វីដែលធ្វើឱ្យសមត្ថកិច្ចមូលដ្ឋានទាំងប៉ូលិស និងប៉េអឹមឈឺក្បាលនោះ គឺដោយសារក្រោយពេលកើតហេតុក្រុមខ្មាន់កាំភ្លើងបានគេចខ្លួនទៅបាត់ដោយសុវត្ថិភាព ។ ចំណែកឯក្រុមជនរងគ្រោះហាក់បីដូចជាមានការលាក់លៀមចំពោះការពិត ដែលសូម្បីតែសមត្ថកិច្ចសួររកចំណុចកើតហេតុក៏ពួកគេមិនដឹងថា គេបាញ់ខ្លួននៅម្តុំណាផង ម្តងថា កើតហេតុនៅត្រង់នេះ ម្តងនៅត្រង់នោះ មិនច្បាស់លាស់ទាល់តែសោះ ។ ហេតុការណ៍នោះបានកើតឡើងកាលពីវេលាម៉ោង១១និង១៥នាទីយប់ ថ្ងៃទី១៦ មករា ២០១១ នៅលើកំណាត់មហាវិថីសហព័ន្ធរុស្ស៊ី ស្ថិតក្នុងភូមិសាស្ត្រខណ្ឌដង្កោ រាជធានីភ្នំពេញ ប៉ុន្តែពុំដឹងស្ថិតក្នុងសង្កាត់កាកាប ឬសង្កាត់ចោមចៅនោះឡើយ ហើយសូម្បីតែសមត្ថកិច្ចក៏ធ្វើរបាយការណ៍ក្នុងលក្ខណៈមិនច្បាស់លាស់ពីចំណុចកើតហេតុនោះដ ែរ ។ជនរងគ្រោះឈ្មោះសួង វិចិត្រ ភេទប្រុស អាយុ២០ឆ្នាំ កម្មករសំណង់ រងរបួសដោយគ្រាប់កាំភ្លើង២គ្រាប់ ចំត្រង់ត្រគាកខាងស្តាំបៀមគ្រាប់នៅចុងភ្លៅ និងមួយគ្រាប់ទៀតចំចុងភ្លៅឆ្វេងបៀមគ្រាប់ ។ ជនរងគ្រោះរូបនេះ មុនដំបូងត្រូវមិត្តភក្តិនាំទៅសង្គ្រោះនៅគ្លីនិកឯកជនឡាំប៊ុនថន ភូមិជម្ពូវ័ន ប៉ុន្តែដោយសាររបួសធ្ងន់ធ្ងរក៏បានបញ្ជូនទៅមន្ទីរពេទ្យព្រះកុសុមៈ វិញ ។ ចំណែកឯមិត្តភក្តិម្នាក់ទៀតឈ្មោះកង វឌ្ឍនា ភេទប្រុស អាយុ២០ឆ្នាំ ជានិស្សិតរងរបួសបែកក្បាលដោយសារក្រុមខ្មាន់កាំភ្លើងវាយក្បាលនឹងស្នាប់កាំភ្លើង ។ ពួកគេទាំងពីរនាក់មានទីលំនៅភូមិព្រៃមូល សង្កាត់ក្រាំងធ្នង់ ខណ្ឌដង្កោ រាជធានីភ្នំពេញ ។ តាមប្រភពពីសមត្ថកិច្ចខណ្ឌដង្កោ បានឱ្យដឹងថា នៅមុនពេលកើតហេតុជនរងគ្រោះទាំងពីរនាក់ជិះម៉ូតូម៉ាកឃ្លីក មួយគ្រឿង ឌុបគ្នាទៅហូបការបងប្អូននៅក្នុងភូមិព្រៃសណ្តែក សង្កាត់ចោមចៅ ក្រោយមកបានបន្តដំណើរទៅចូលរួមក្នុងពិធីបុណ្យខួបកំណើតក្មួយនៅឯសង្កាត់ភ្នំពេញថ្មី ខណ្ឌសែនសុខ មួយរោងទៀត។ប្រភពដដែលបានបន្តថា ពួកគេសប្បាយនៅទីនោះរហូតដល់វេលាកើតហេតុ ទើបនាំគ្នាជិះម៉ូតូត្រឡប់ក្រោយវិញ ប៉ុន្តែអត់ទៅផ្ទះទេ គឺមានបំណងទៅរាំលេងនៅក្នុងពិធីមង្គលការបងប្អូនឯភូមិព្រៃសណ្តែក សង្កាត់ចោមចៅវិញ ។ ពេលនោះត្រូវក្រុមជនប្រដាប់អាវុធមួយក្រុមមានគ្នា២នាក់ ជិះម៉ូតូម៉ាកណៃហត មួយគ្រឿងជិះដេញតាមពីក្រោយរួចធ្វើសកម្មភាពបាញ់ប្រហារបណ្តាលឱ្យត្រូវរបួសអ្នកជិះ ក្រោយ២គ្រាប់ បន្ទាប់មកក៏បានដេញតាមវាយក្បាលអ្នកបើកបរម៉ូតូ និងស្នាប់កាំភ្លើងបណ្តាលឱ្យរងរបួសទៀត ។ ប្រភពខាងលើបន្តទៀតថា ក្រោយពេលកើតហេតុជនរងគ្រោះបាននាំគ្នាចូលទៅមន្ទីរពហុព្យាបាលឡាំប៊ុនថន នៅភូមិជម្ពូវ័ន ដោយខ្លួនឯងអត់បានប្តឹងសមត្ថកិច្ចទេ ប៉ុន្តែក្រោយមកសន្តិសុខយាមនៅមន្ទីរពេទ្យឃើញស្ថានភាពគួរឱ្យសង្ស័យក៏បានប្តឹងប៉ូលិសប៉ុស ្តិ៍ឱ្យចុះ ទៅពិនិត្យមើល ព្រោះខ្លាចពួកគេជាជនដែលមានសមាសភាពមិនល្អ ។បន្ទាប់ពីទទួលបានព័ត៌មាននោះហើយ កំលាំងប៉ូលិសបានចុះទៅធ្វើការសាកសួរពីទីតាំងចំណុចកើតហេតុ ប៉ុន្តែពួកគេអត់បានដឹងថា នៅចំណុចណានោះទេ ហើយក៏មិនបានដឹងថា ហេតុអ្វីបានជាគេបាញ់ពួកខ្លួនដែរ ។ សមត្ថកិច្ចបញ្ជាក់ថា ជនរងគ្រោះគ្រាន់តែដឹងថា ពេលជិះម៉ូតូចាប់ពីចំណុចភ្លើងស្តុបផ្សារដីហុយដល់រង្វង់មូលថ្នល់បំបែកចោមចៅឮស្នូរផ្ទ ុះអាវុធមួយគ្រាប់ ហើយពួកគេបានសួរគ្នាថា តើម៉ូតូយើងបែកកង់ ឬអត់? ហើយក៏ចេះតែបន្តដំណើរទៅមុខទៀត ក្រោយមកទើបដឹងថា ត្រូវគ្រាប់ ។ ភ្លាមនោះពួកគេក្រឡេកក្រោយបានឃើញក្រុមខ្មាន់កាំភ្លើងជិះម៉ូតូម៉ាកណៃហត តាមពីក្រោយពួកគេក៏បាននាំគ្នាជិះរត់រហូតដល់ភូមិអូរដឹម សង្កាត់ចោមចៅ ក៏ត្រូវខ្មាន់កាំភ្លើងកៀរឱ្យឈប់រួចដកកាំភ្លើងវាយក្បាលឈ្មោះកង វឌ្ឍនា បណ្តាលឱ្យបែកក្បាល រួចជិះម៉ូតូត្រឡប់ក្រោយវិញបាត់ស្រមោល ។ គួរកត់សំគាល់ដែរថា មុខសញ្ញាខ្មាន់កាំភ្លើងជិះម៉ូតូ ម៉ាកណៃហតនេះកំពុងតែអុកឡុកក្នុងខណ្ឌដង្កោ ដោយគេនៅចាំបានថា កាលពីវេលាយប់ថ្ងៃទី១៤ មករា ពួកគេបានជិះម៉ូតូបាញ់បោះនៅមុខអធិការដ្ឋានប៉ូលិសម្តងរួចមកហើយ ពេលនោះមុខសញ្ញាដូចគ្នានេះ បានដេញតាមបាញ់ប្រហារមនុស្សទៀតពិតជាគួរឱ្យខ្លាចមែន ៕
