ខេត្តកំពង់ស្ពឺ ៖ ជនជាតិថៃម្នាក់ជាមេការក្នុងការដ្ឋានហាលកាកស្រាបៀរនៅភូមិស្តុកស្លាត ឃុំភ្នំតូច ស្រុកឧដុង្គបានដេកស្លាប់ក្នុងបន្ទប់ដែលចាក់សោជិតកាលពីថ្ងៃទី៥ មករា។ ការដឹងស្លាប់ដោយសារកម្មករទៅដាស់មេការសុំសៀវភៅចុះវត្តមានប្រចាំថ្ងៃ។ ពេលនោះឃើញបន្ទប់ចាក់សោជិតកម្មករនាំគ្នារកមធ្យោបាយចូលមើលទើបដឹងថា មេការជាជនជាតិថៃដេកស្លាប់នៅលើគ្រែដោយពុំដឹងតាំងពីថ្មើរណាទេ។មន្ត្រីប៉ូលិសស្រុក ឧដុង្គ រួមទាំងមន្ត្រីប៉ូលិសបច្ចេកទេសនៃស្នងការដ្ឋានខេត្តកំពង់ស្ពឺ បានទៅត្រួតពិនិត្យនៅព្រឹកថ្ងៃទី៦ មករា ដោយមានការចូលរួមពីម្ចាស់ការដ្ឋាន រួមទាំងព្រះរាជអាជ្ញាខេត្តផង។ សមត្ថកិច្ចឱ្យដឹងថា មេការជនជាតិថៃឈ្មោះខុក យ៉ាន់នីមិត្ត ហៅទ្រី ដេកស្លាប់នៅលើគ្រែក្នុងបន្ទប់របស់ខ្លួន។ តាមការពិនិត្យពុំមានសញ្ញាអ្វីមួយបង្ហាញថាស្លាប់ដោយការធ្វើអត្តឃាត ឬជាអំពើមនុស្សឃាតឡើយ គឺស្លាប់ដោយសារខ្យល់គរ។សពត្រូវម្ចាស់ការដ្ឋានជាជនជាតិថៃដូចគ្នានាំយកទៅធ្វើបុណ្ យនាព្រឹកនោះ។ តាមសេចក្តីរាយការណ៍ចុងក្រោយឱ្យដឹងថា ស្ត្រីម្នាក់ដែលអះអាងថា ជាបងស្រីធម៌របស់អ្នកស្លាប់ទទួលរ៉ាប់រងក្នុងការធ្វើបុណ្យសព ប៉ុន្តែគេពុំទាន់ដឹងថា សពត្រូវបូជានៅទីនោះ ឬបញ្ជូនទៅប្រទេសថៃឡើយ៕