ខេត្តកណ្តាល ៖ យុវជន៤នាក់បានជួបជុំគ្នាស៊ីផឹកពេលយប់ងងឹត នៅក្បែរមាត់ស្រះទឹកមួយកន្លែង ធ្វើឱ្យប្រជាពលរដ្ឋមានការសង្ស័យស្មានតែក្រុមចោរជួបជុំគ្នា រៀបចំផែនការធ្វើសកម្មភាពប្លន់ ឬអំពើចោរកម្មណាមួយក៏ត្រូវប្រជាពលរដ្ឋរាយការណ៍ ប្រាប់ប៉ូលិសឱ្យចុះទៅឡោមព័ទ្ធចាប់ខ្លួន ទើបដឹងថា ក្នុងចំណោមជនទាំង៤នាក់នោះមានម្នាក់បានលួចមាន់របស់ឪពុកម្តាយ ខ្លួនយកទៅស្ងោរក្លែមស្រាផឹក។ ហេតុការណ៍នេះបានកើតឡើងកាលពីវេលាម៉ោង៩និង១៥នាទីយប់ ថ្ងៃទី១៧ មករា នៅក្បែរស្រះទឹកមួយកន្លែងជិតភូមិព្រៃពពេល ឃុំក្រាំងម្កាក់ ស្រុកអង្គស្នួល។ ជនទាំង៤នាក់ដែលត្រូវប៉ូលិសស្រុកអង្គស្នួលចាប់ឃាត់ខ្លួនបាននោះមាន ១-ឈ្មោះឆែម ចាន់នី អាយុ១៩ឆ្នាំ ជាអ្នកលួចមាន់ឪពុកម្តាយរបស់ខ្លួនយកទៅស្ងោរក្លែមស្រា, ២-ឈ្មោះយ៉ុន អាន អាយុ២០ឆ្នាំ, ៣-ឈ្មោះផន សុភ័ក្ក្រ អាយុ២៣ឆ្នាំ និង៤-ឈ្មោះដុំ វិចិត្រ អាយុ៣០ឆ្នាំ ពួកគេទាំង៤នាក់មានទីលំនៅក្នុងភូមិកើតហេតុខាងលើ។មន្ត្រីប៉ូលិសស្រុកអង្គស្នួលឱ្យដ ឹងថា នៅមុនពេលកើតហេតុយុវជនឈ្មោះឆែម ចាន់នី បានលួចមាន់ឪពុកម្តាយរបស់ខ្លួន១ក្បាលក្នុងបំណងយកទៅផ្ទះពូរបស់គេឈ្មោះដុំ វិចិត្រ ដើម្បីស្ងោរក្លែមស្រា។ ប៉ុន្តែពេលនោះបុរសជាពូមានទំនាស់ជាមួយប្រពន្ធ ទើបមិនហ៊ានបើកកម្មវិធីផឹកស៊ីនៅក្នុងផ្ទះទេ ក៏បានយកចានឆ្នាំង និងគ្រឿងផ្សំផ្សេងៗនាំក្មួយទៅធ្វើនៅឯមាត់ស្រះទឹកវិញ។ ប្រភពដដែលបន្តទៀតថា ដោយសាររដូវប្រាំងជាឱកាសដែលក្រុមចោរប្លន់ ឬចោរលួចគោ ក្របី មាន់ ទា ទើបប្រជាពលរដ្ឋមានការប្រុងប្រយ័ត្នខ្លាំង ហើយនៅពេលបានឃើញពួកគេផឹកស៊ីនៅកន្លែងងងឹតក៏សង្ស័យស្មានថាជាក្រុមចោរ ឬក្រុមអ្នកជក់គ្រឿងញៀនទើបរាយការណ៍ប្រាប់សមត្ថកិច្ចឱ្យចុះទៅឃាត់ខ្លួនតែម្តង។ បន្ទាប់មកពួកគេត្រូវបាននាំទៅកាន់ផ្នែកព្រហ្មទណ្ឌស្រុកអង្គស្នួលដើម្បីធ្វើការសាកស ួរ និងអប់រំ ហើយឱ្យពួកគេធ្វើកិច្ចសន្យាបញ្ឈប់ការធ្វើអ្វីដែលនាំឱ្យគេមានការសង្ស័យបែបនេះទៀត ទើបអនុញ្ញាតឱ្យត្រឡប់ទៅផ្ទះវិញ៕
