ខេត្តព្រះវិហារ ៖ បើតាមអ្នកយកព័ត៌មានកោះសន្តិភាពប្រចាំខេត្តព្រះវិហារ បានឱ្យដឹងនៅថ្ងៃអាទិត្យ ទី២ មករា ២០១១ នេះថា នាពេលខាងមុខនេះ តុលាការខេត្តអ៊ូប៊ុនរបស់ថៃគ្រោងនឹងបើកសវនាការជំនុះជម្រះប្រជាពលរដ្ឋខ្មែរ២រូប ដែលអាជ្ញាធរថៃបានចាប់ខ្លួន ដោយចោទថា បានឆ្លងដែនចូលដីថៃដោយខុសច្បាប់កាលពីថ្ងៃទី២៩ ធ្នូ កន្លងមក ។ គួរបញ្ជាក់ថា កាលពីវេលាម៉ោង២រសៀលថ្ងៃទី២៩ ធ្នូ ប្រជាពលរដ្ឋខ្មែរចំនួន៥នាក់ត្រូវបានទាហានសៀមដេញប៉ផាប់ចាប់ពភីង ខណៈពួកគេទាំង៥នាក់នោះស៊ីឈ្នួលឱ្យឈ្មួញថៃអារឈើគ្រញូងនៅលើភ្នំដងរែក ខាងកើតច្រកអានសេះ កំពស់៧៦៦ម៉ែត្រ ដោយចាប់បាន២នាក់ ចំណែក៣នាក់ទៀតរត់រួចខ្លួន ។ការចាប់នេះត្រូវបានទាហានសៀមអះអាងថា ប្រជាពលរដ្ឋខ្មែរខាងលើបានឆ្លងដែនចូលទៅកាប់ឈើក្នុងទឹកដីថៃដោយខុសច្បាប់ និងបានបញ្ជូនភ្លាមៗទៅកាន់ស្រុកណាំយឺន ខេត្តអ៊ូប៊ុន ។ ប្រជាពលរដ្ឋខ្មែរដែលទាហានថៃចាប់ខ្លួននោះឈ្មោះសែន រិនសេន ភេទប្រុស អាយុ៤៦ឆ្នាំ មានទីលំនៅក្នុងភូមិធម្មជាតិសម្តេចតេជោ ស្រុកជាំក្សាន្ត ខេត្តព្រះវិហារ និងម្នាក់ទៀតឈ្មោះរ៉េន ថុល ភេទប្រុស អាហយុ៣៥ឆ្នាំ រស់នៅភូមិវាលពោធិ៍ ឃុំជាំក្សាន្ត ស្រុកជាំក្សាន្ត ។ការចាប់ប្រជាពលរដ្ឋខ្មែរទាំង២នាក់ខាងលើនេះ គឺធ្វើឡើងក្រោយពីពួកក្រុមជ្រុលនិយមសៀមអាវលឿង៧នាក់ ក្នុងនោះមានអ្នកតំណាងរាស្ត្រថៃម្នាក់ផង ត្រូវបានអាជ្ញាធរខ្មែរឃាត់ចាប់ខ្លួន ខណៈពេលពួកគេបានចូលជ្រៅមកក្នុងទឹកដីខ្មែរក្នុងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ កាលពីវេលាម៉ោង១០និង៣០នាទីព្រឹកថ្ងៃទី២៩ ធ្នូ ដូចគ្នានោះ ៕