រាជធានីភ្នំពេញ ៖ នៅថ្ងៃទី១៧ ខែមករា ឆ្នាំ២០១១ មន្ត្រីសាខាកាំកុងត្រូលផែស្ងួត-ចុងទីភ្នំពេញ សហការជាមួយមន្ដ្រីពាណិជ្ជកម្មរាជធានីភ្នំពេញ និងអាជ្ញាធរខណ្ឌដូនពេញ បានចុះត្រួតពិនិត្យកន្លែងស្ដុក និងចែកចាយអំបិលនៅសង្កាត់វត្ដភ្នំ ខណ្ឌដូនពេញ ។ ក្នុងការចុះត្រួតពិនិត្យនេះ មន្ដ្រីកាំកុងត្រូលបានធ្វើតេស្ដជាបឋមលើអំបិលម៉ដ្ឋ និងអំបិលក្រួស ដើម្បីរកកំរិតអ៊ីយ៉ូដនៅក្នុងអំបិល ។ លោកចេង រិទ្ធិដារា អនុប្រធានសាខា បានបញ្ជាក់ថា អំបិលគ្រប់ប្រភេទដែលផលិតក្នុងស្រុក និងនាំចូលពីបរទេសចាំបាច់ត្រូវតែបញ្ចូលជាតិអ៊ីយ៉ូដ មុននឹងចែកចាយលក់ដុំ និងលក់រាយ នៅតាមផ្សារក្នុងព្រះរាជាណាចក្រកម្ពុជា ។ជាមួយនេះ នៅលើសំបកវេចខ្ចប់នៃអំបិលអ៊ីយ៉ូដ ត្រូវគោរពតាមលក្ខខណ្ឌកំណត់ដែលមានចែងនៅក្នុងអនុក្រឹត្យលេខ៦៩ អនក្របក ស្ដីពីការគ្រប់គ្រង ការធ្វើអាជីវកម្មអំបិលអ៊ីយ៉ូដ ។ មន្ដ្រីកាំកុងត្រូលបានអំពាវនាវដល់ប្រជាពលរដ្ឋគ្រប់រូប ភោជនីយដ្ឋាន រោងចក្រ សហគ្រាស សិប្បកម្ម និងគ្រប់ទីកន្លែងដែលមានរៀបចំអាហារក្នុងទូទាំងព្រះរាជាណាចក្រកម្ពុជា ត្រូវប្រើប្រាស់អំបិលអ៊ីយ៉ូដក្នុងការផលិតម្ហូបអាហារ នំចំណីសំរាប់បរិភោគ ព្រោះអ៊ីយ៉ូដជាសារធាតុម្យ៉ាងជួយដល់ការលូតលាស់រាងកាយរបស់មនុស្ស ៕