ខេត្តកំពង់ឆ្នាំង ៖ អតីតទាហានម្នាក់ដែលពិការដាច់ជើងឆ្វេងត្រឹមស្មងក្នុងសង្គ្រាម ពេលនេះបានលើកដៃសំពះអង្វរករសប្បុរសជនឱ្យជួយ ដោយសាររូបគាត់ជាជនក្រីក្រហើយធ្លាក់ខ្លួនឈឺជាទម្ងន់ (ក្អួតធ្លាក់ឈាម) ដែលត្រូវចេញពីមន្ទីរពេទ្យខេត្តវិញ ពីព្រោះស្ថានភាពធ្ងន់ធ្ងរពេក។ នៅព្រឹកថ្ងៃទី១ ខែមករា ប្រជាពលរដ្ឋជាអ្នកជិតខាងបានរៃលុយគ្នាដើម្បីឱ្យគាត់ធ្វើសោហ៊ុយទៅព្យាបាលនៅមន្ទីរពេទ្យ សម្តេចឪ ឯរាជធានីភ្នំពេញទៀត។ បុរសពិការរូបនេះ ឈ្មោះគន សុខុម អាយុ៥៨ឆ្នាំ រស់នៅភូមិផ្សារលើ សង្កាត់ផ្សារឆ្នាំង ក្រុងកំពង់ឆ្នាំង មានប្រពន្ធនិងកូន៦នាក់ក្នុងបន្ទុក។ គាត់បានរៀបរាប់ថា រូបគាត់ពិការជើងនៅឆ្នាំ១៩៨៧ ខណៈធ្វើទាហាននៅវរៈ៥ ខេត្តកំពង់ឆ្នាំង ហើយត្រូវបានបញ្ជូនឱ្យទៅឈរជើងនៅផ្លូវដែកក្នុងភូមិសាស្ត្រក្តុល ស្រុកទឹកផុស ដែលកាលណោះគាត់បានជាន់មីនរបស់ខ្មែរក្រហម។ក្រោយពីធ្លាក់ខ្លួនពិការ គាត់ត្រឡប់មកផ្ទះវិញហើយប្រកបរបរបររទេះសេះដល់សព្វថ្ងៃ ដើម្បីចិញ្ចឹមគ្រួសារដែលមានកូន៦នាក់។ លុះប៉ុន្មានខែចុងក្រោយនេះ គាត់បានធ្លាក់ខ្លួនឈឺជាទម្ងន់ ឯពេទ្យមិនបានប្រាប់ថា ជាជំងឺអ្វីទេ តែគាត់ចេះតែដុនដាបទៅៗ ក៏សុំចេញពីមន្ទីរពេទ្យខេត្តនៅថ្ងៃទី១ មករា។ គាត់បន្តថា គាត់ចង់ទៅព្យាបាលនៅមន្ទីរពេទ្យសម្តេចឪឯរាជធានីភ្នំពេញ ព្រោះការព្យាបាលមិនបង់លុយ ទើបប្រជាពលរដ្ឋដែលនៅក្បែរខាងមានការអាណិតអាសូរបានរៃលុយគ្នាឱ្យគាត់បានធ្វើសោហ៊ុយទៅព្យាប ាល។ គាត់បានលើកដៃសំពះអង្វរករសប្បុរសជនតាមរយៈសារព័ត៌មានកោះសន្តិភាព សូមមេត្តាជួយឧបត្ថម្ភដល់រូបគាត់ផងចុះ។ លោកឌិត ច័ន្ទ មេភូមិផ្សារលើក៏បាននិយាយដែរថា គ្រួសារនេះពិតជាក្រីក្របំផុតមែន គ្មានដីស្រែធ្វើទេ ពឹងតែមុខរបរ បររទេះសេះមួយមុខគត់៕