រាជធានីភ្នំពេញ ៖ យុវជនចំនួន៣នាក់បានត្រូវក្រុមសន្តិសុខចាប់ខ្លួនកាលពីវេលាម៉ោង៧និង៤០នាទីយប់ ថ្ងៃទី១១ មករា ខណៈពេលផ្លោះរបងចូលទៅក្នុងដីឡូត៍លេខ១៦០ ផ្លូវលេខ២៥៥ សង្កាត់បឹងសាឡាង ខណ្ឌទួលគោក ដោយចោទថា ប៉ុនប៉ងលួច ។ ទោះបីជាយ៉ាងណា យុវជនទាំង៣នាក់នេះបានប្រកែកថា ពួកខ្លួនផ្លោះរបងចូលទៅនោះមិនមែនប៉ុនប៉ងលួចទេ គឺចូលទៅសំងំហិតកាវប៉ុណ្ណោះ ។យុវជនទាំងបីនាក់នេះ ១-ឈ្មោះច័ន្ទ សុភ័ក្រ្ត អាយុ១៨ឆ្នាំ ២-ឈ្មោះសំ បូរ៉ា អាយុ១៧ឆ្នាំ និង៣-ឈ្មោះឡាយ ពេជ្រ អាយុ១៧ឆ្នាំ ទាំងអស់គ្នាស្នាក់នៅក្នុងមណ្ឌលអង្គការមិត្តសំលាញ់ ស្ថិតក្នុងសង្កាត់ទឹកល្អក់ទី៣ ខណ្ឌទួលគោក ។ តាមមន្ត្រីសមត្ថកិច្ចឱ្យដឹងថាយុវជនទាំង៣នាក់នេះ បាននាំគ្នាផ្លោះរបងចូលដីឡូត៍លេខ១៦០ ផ្លូវលេខ២៥៥ សង្កាត់បឹងសាឡាង គោលបំណងលួច ។ ខណៈពេលនោះឈ្មោះប៉ែន តារា ភេទប្រុស អាយុ៣៤ឆ្នាំ ជាមន្ត្រីប៉ូលិស រួមទាំងសន្តិសុខយាមផ្ទះឃើញទាន់ នាំគ្នាដេញចាប់បានប្រគល់ទៅឱ្យសមត្ថកិច្ចប៉ូលិសប៉ុស្តិ៍ ។ទោះបីជាយ៉ាងណា យុវជនទាំងនោះពុំទាន់លួចបានសំភារឡើយ ។ នៅចំពោះមុខសមត្ថកិច្ច យុវជនទាំងនេះបានឆ្លើយថា ខ្លួនបានផ្លោះរបងចូលទៅក្នុងដីឡូត៍នោះប្រាកដមែន តែពុំមានបំណងលួចទេ គឺពួកគេផ្លោះចូលដើម្បីសំងំហិតកាវប៉ុណ្ណោះ តែមិនទាន់បានហិតផងក៏ត្រូវគេចាប់ខ្លួនប្រគល់ឱ្យសមត្ថកិច្ច ៕