ខេត្តបាត់ដំបង ៖ សមត្ថកិច្ចការិយាល័យប្រឆាំងការជួញដូរមនុស្ស និងការពារអនីតិជននៃស្នងការដ្ឋានខេត្ត បានចាប់ខ្លួនស្ត្រីវ័យ៦៤ឆ្នាំ ម្នាក់កាលពីព្រឹកថ្ងៃទី៥ មករា នៅនឹងផ្ទះរបស់គាត់ដែលស្ថិតនៅភូមិវត្តលៀប សង្កាត់ចំការសំរោង ក្រុងបាត់ដំបង ក្រោយពីសមត្ថកិច្ចបើកការស៊ើបអង្កេតអស់រយៈពេលជិត១ខែ យោងតាមបណ្តឹងរបស់អង្គការក្រៅរដ្ឋាភិបាលមួយដោយចោទប្រកាន់ស្ត្រីរូបនេះថា មានការពាក់ព័ន្ធនឹងការនាំមនុស្សឆ្លងដែនដោយខុសច្បាប់។ លោកកុយ ហៀង នាយការិយាល័យប្រឆាំងការជួញដូរមនុស្សនិងការពារអនីតិជនបានថ្លែងថា ស្ត្រីដែលជាប់សង្ស័យនោះឈ្មោះឡៃ ហៀង អាយុ៦៤ឆ្នាំ រស់នៅភូមិ-ឃុំខាងលើ។ ស្ត្រីរូបនេះមានជាប់សង្ស័យពីបទនាំមនុស្សឆ្លងដែនមិនស្របច្បាប់ទៅប្រទេសម៉ាឡេស៊ី តាមរយៈក្រុមហ៊ុន «ធី អេន ភី» មានទីតាំងនៅរាជធានីភ្នំពេញ កាលពីឆ្នាំមុន ។ ឯក្មេងស្រីរងគ្រោះជាក្មេងអនាថា និងជាអនីតិជនទៀតឈ្មោះរុន សិទ្ធឌី អាយុ១៣ឆ្នាំ មានស្រុកកំណើតនៅភូមិភ្នំសំពៅកើត ឃុំភ្នំសំពៅ ស្រុកបាណន់។ លោកកុយ ហៀង បានបញ្ជាក់ថា ស្ត្រីរូបនេះបាននាំក្មេងនេះទៅកាន់ក្រុមហ៊ុន «ធី អេន ភី» នៅភ្នំពេញ ដើម្បីបានចេញទៅធ្វើការនៅប្រទេសម៉ាឡេស៊ី ប៉ុន្តែដោយនាងគ្មានឯកសារបញ្ជាក់ពីអាយុគ្រប់គ្រាន់ ទើបក្រុមហ៊ុនប្រាប់ស្ត្រីជាប់សង្ស័យនេះឱ្យមកបំពេញឯកសារនៅភូមិ-ឃុំជាថ្មី ដោយក្រុមហ៊ុនជាអ្នកចេញសោហ៊ុយឱ្យចំនួន១០ម៉ឺនរៀល ទោះបីជាក្រុមហ៊ុនដឹងថា ក្មេងស្រីនេះមានអាយុតិចជាង១៤ឆ្នាំក្តី ។ស្ត្រីជាប់សង្ស័យឈ្មោះឡៃ ហៀង អាយុ៦៤ឆ្នាំ បាននិយាយប្រាប់សមត្ថកិច្ចថា គាត់បានប្រទះឃើញកុមារីនោះក្នុងគ្រាដែលនាងកាន់ថង់ខ្មៅមួយឈររេរានៅខាងមុខផ្ទះគា ត់កាលពីឆ្នាំមុន ហើយគាត់ក៏យកមកនៅជាមួយ ក្រោយពីសួរនាំទៅនាងប្រាប់ថា គ្មានឪពុកម្តាយ។ យាយឡៃ ហៀង បានបន្តថា គាត់បានយកកុមារីនេះទៅកាន់ក្រុមហ៊ុន «ធី អេន ភី» នៅភ្នំពេញ ក្រោយពីយកនាងមកចិញ្ចឹមបានមួយសប្តាហ៍ ដើម្បីឱ្យនាងបានចេញទៅធ្វើការនៅម៉ាឡេស៊ី ប៉ុន្តែដោយគាត់មិនមានឯកសារគ្រប់គ្រាន់ទើបក្រុមហ៊ុនឱ្យគាត់យកនាងឱ្យទៅបំពេញឯកសារសំ បុត្រកំណើតពីមូលដ្ឋានសិន ហើយក្រុមហ៊ុនប្រាប់ឱ្យគាត់ធ្វើយ៉ាងណាដាក់អាយុនាងគ្រប់ក្នុងក្របខណ្ឌការងារ ហើយភាគីក្រុមហ៊ុនបានចេញសោហ៊ុយធ្វើឯកសារនេះ ចំនួន១០មឺុនរៀលទៀតផង ។ស្ត្រីវ័យ៦៤ឆ្នាំ រូបនេះបានបញ្ជាក់ថា ការបំពេញឯកសារនោះ គឺគាត់បានឱ្យអាជ្ញាធរភូមិរំចេក៤ សង្កាត់រតនៈ ជាអ្នកធ្វើឱ្យ ព្រោះសៀវភៅគ្រួសារគាត់បានធ្វើនៅទីនោះ មុនពេលគាត់ទៅរស់នៅសង្កាត់ចំការសំរោង សព្វថ្ងៃ។ ស្ត្រីរូបនេះបានប្រាប់ឱ្យដឹងថា គាត់ដំឡើងអាយុកុមារីនេះពី ១៣ឆ្នាំដល់១៩ឆ្នាំ ដោយយកឈ្មោះកូនប្រុសគាត់ដាក់ជំនួស តែកែភេទជាស្រីតំរូវកុមារីនេះ។ ក្រោយមកក្រុមហ៊ុនក៏ទទួលយកទៅប្រទេសម៉ាឡេស៊ី បន្ទាប់ពីនាងរៀនសូត្រ និងធ្វើតេស្តជាប់នៅកន្លែងក្រុមហ៊ុនខាងលើនេះ។ ប៉ុន្តែនាងត្រូវបានគេបញ្ជូនមកកម្ពុជាវិញ ក្រោយពីចេញទៅធ្វើការបាន១ខែប៉ុណ្ណោះ ដោយសារនាងក្មេងពេកធ្វើការងារមិនកើត។ លុះនៅថ្ងៃទី៥ មករា គាត់ក៏ត្រូវសមត្ថកិច្ចចាប់ខ្លួនដោយជាប់ពាក់ព័ន្ធនឹងក្មេងស្រីនេះ។មេភូមិរំចេក៤ និងលោកយស់ យឿន ចៅសង្កាត់រតនៈ មិនអាចសុំការបំភ្លឺបានទេ កាលពីព្រឹកថ្ងៃទី៦ មករា ប៉ុន្តែលោកយស់ យឿន ត្រូវបានស្រង់សំដីថា លោកបានបំពេញសំណុំឯកសារ ឬធ្វើសំបុត្រកំណើតឱ្យក្មេងស្រីនោះតាមការបំពេញបែបបទពីលោកមេភូមិរំចេក៤ តែប៉ុណ្ណោះ។ លោកកុយ ហៀង នាយការិយាល័យប្រឆាំងការជួញដូរមនុស្ស និងការពារអនីតិជនបានបញ្ជាក់ថា ស្ត្រីជាប់សង្ស័យនេះមានចេតនាកុហកអាជ្ញាធរ ដើម្បីចង់នាំក្មេងស្រីនេះទៅឱ្យក្រុមហ៊ុនយកទៅធ្វើការនៅប្រទេសម៉ាឡេស៊ី ។ លោកបានបន្ថែមទៀតថា ក្មេងស្រីនោះជាក្មេងអនាថាដោយនាងដើរចេញពីផ្ទះរយៈពេល៥ឆ្នាំ កន្លងមកហើយ ប៉ុន្តែពេលនេះអាណាព្យាបាលរបស់នាងបានស្លាប់អស់ទៅហើយ សល់តែសាច់ញាតិប៉ុណ្ណោះ ។ ប៉ុន្តែលោកបានបញ្ជាក់ថា កំហុសនាំក្មេងស្រីដែលជាអនីតិជនចេញទៅបំរើការក្រៅប្រទេសនេះ ភាគីក្រុមហ៊ុនអាចមានកំហុស៤០ភាគរយ ក្នុងការទទួលខុសត្រូវលើករណីនេះ ។ កោះសន្តិភាពមិនអាចស្វែងរកប្រភពណាមួយដើម្បីទាក់ទងភាគីក្រុមហ៊ុន «ធី អេន ភី» នៅរាជធានីភ្នំពេញបានទេ កាលពីព្រឹកថ្ងៃទី៦ មករា ។ លោកជេត វណ្ណនី ស្នងការរង និងជាប្រធានការិយាល័យកណ្តាលនគរបាលយុត្តិធម៌បានមានប្រសាសន៍ថា បើយោងលើសំណុំរឿងនេះ អាជ្ញាធរមូលដ្ឋានដែលចេញសំបុត្រកំណើតដំឡើងអាយុឱ្យក្មេងស្រី និងភាគីក្រុមហ៊ុនដែលបង្គាប់ឱ្យយាយឡៃ ហៀង ធ្វើតាមខ្លួន ហើយថែមទាំងផ្តល់ប្រាក់ដើម្បីធ្វើការងារនេះទៀត គឺពួកគេក៏មានកំហុសដែរ ប៉ុន្តែសំណុំរឿងនេះវាស្ថិតលើការសើុបអង្កេតរបស់តុលាការនាពេលក្រោយតែប៉ុណ្ណោះ ។ សូមបញ្ជាក់ថា ដើមបណ្តឹងលើករណីនេះគឺជាអង្គការក្រៅរដ្ឋាភិបាលមួយដែលបានជួបក្មេងស្រីនេះក្រោយពីនាង មកកម្ពុជាវិញ ៕
