រាជធានីភ្នំពេញ ៖ លោកគិត សុផា អភិបាលខណ្ឌដង្កោបានស្នើសុំឱ្យព្រះសង្ឃ និងគណៈកម្មការអាចារ្យគ្រប់វត្តអារាមទូទាំងខណ្ឌប្រកាន់យកធម៌សាមគ្គី កុំច្រណែននិន្ទាឈ្នានីសគ្នា កុំដណ្តើមអំណាចគ្នា នាំឱ្យកើតមានអធិករណ៍បែកបាក់ផ្ទៃក្នុងវត្ត។ លោកសូមឱ្យចេះគោរពគ្នាតាមឋានានុក្រម និងរួបរួមគ្នាកសាងទីវត្តអារាមឱ្យមានការរីកចំរើន ហើយព្រះចៅអធិការវត្តត្រូវតែចេះគ្រប់គ្រង និងចាត់ចែងការងារឱ្យមានភាពរលូន ចៀសវាងមានភាពរកាំរកូសកើតឡើង។ សំរាប់គណៈកម្មការអាចារ្យវត្តទាំងអស់មិនត្រូវធ្វើអ្វីៗបំពានទៅលើព្រះចៅអធិការ និងព្រះសង្ឃដែលនាំឱ្យមានការបែកបាក់ឡើយ ជាពិសេសចៀសវាងឱ្យបានការបែងចែកបក្សពួក និងពុះវត្តជាពីរ។លោកអភិបាលខណ្ឌដង្កោមានប្រសាសន៍បែបនេះនៅក្នុងខណៈពេលអញ្ជើញចូលរួមន ៅក្នុងកិច្ចប្រជុំព្រះសង្ឃទូទាំងខណ្ឌកាលពីវេលាល្ងាចថ្ងៃទី១៤ ខែមករា ឆ្នាំ២០១១ នៅក្នុងវត្តជម្ពូវ័ន សង្កាត់ចោមចៅ ខណ្ឌដង្កោ រាជធានីភ្នំពេញ។ កិច្ចប្រជុំសង្ឃនោះក្រោមព្រះអធិបតីភាពព្រះសុមេធិវង្សាអឿ សំអាន ព្រះអនុគណខណ្ឌដង្កោ និងជាចៅអធិការវត្តជម្ពូវ័ន ព្រមទាំងមានការនិមន្តចូលរួមពីព្រះចៅអធិការ គ្រូសូត្រស្តាំ គ្រូសូត្រឆ្វេងតាមបណ្តាវត្តនានា ជាពិសេសវត្តទើបកាត់ចូលថ្មីចំនួន២២វត្ត និងអញ្ជើញចូលរួមពីលោកសេង គន្ធ អភិបាលរងខណ្ឌ ព្រមទាំងគណៈកម្មការអាចារ្យវត្តផងដែរ។ព្រះតេជគុណអឿ សំអាន មានសង្ឃដីកាថា ការប្រជុំនាពេលនេះគឺដើម្បីឱ្យព្រះសង្ឃ គណៈកម្មការអាចារ្យវត្តចំនួន២២វត្តដែលទើបកាត់ចូលថ្មី និងព្រះសង្ឃ គណៈកម្មការអាចារ្យវត្តដែលនៅក្នុងខណ្ឌដង្កោចាស់យូរមកហើយចំនួន៣៩វត្តសរុបទាំងអស់ចំនួន ៦១វត្តបានស្គាល់គ្នា ជាពិសេសបានស្គាល់ព្រះអង្គដែលជាអនុគណខណ្ឌ ព្រមទាំងមន្ត្រីសង្ឃនៅសាលាអនុគណខណ្ឌ និងជាងនេះទៅទៀតលោកអភិបាល និងគណៈអភិបាលខណ្ឌ មន្ត្រីមន្ទីរការិយាល័យធម្មការទាំងអស់ ។នៅក្នុងឱកាសនោះដែរ ព្រះអង្គបានណែនាំដល់ព្រះសង្ឃទាំងអស់ប្រតិបត្តិទៅតាមគន្លងព្រះពុទ្ធសាសនា ត្រូវសាមគ្គីភាពគ្នា ត្រូវលះបង់ចិត្តអាក្រក់ចេញឱ្យអស់ និងត្រូវដឹងថា ទីវត្តអារាមនីមួយៗរីកចំរើននិងមានកិត្តិយស ព្រមទាំងពុទ្ធបរិស័ទគោរព គឺអាស្រ័យដោយព្រះសង្ឃប្រតិបត្តិល្អតាមធម៌វិន័យ គ្មានការបែកបាក់គ្នា គ្មានការឈ្លោះទាស់ទែង ខ្វែងគំនិតគ្នាដែលបង្កើតឱ្យមានរឿងអាស្រូវសំរាប់វត្តរបស់ខ្លួន ជាពិសេសជាងនេះទៅទៀតត្រូវតែគោរព និងស្រឡាញ់ជាតិ សាសនា ព្រះមហាក្សត្រ។លោកគិត សុផា អភិបាលខណ្ឌដង្កោបានថ្លែងថា កន្លងមកមានវត្តមួយចំនួនមានសង្ឃ និងគណៈកម្មការអាចារ្យប្រព្រឹត្តខុសធម៌វិន័យព្រះពុទ្ធសាសនា និងមានអធិករណ៍កើតឡើងធ្វើឱ្យវត្តអស់ជំនឿពីពុទ្ធបរិស័ទ និងធ្វើឱ្យលំបាកក្នុងការដោះស្រាយ។ លោកស្នើសុំឱ្យព្រះសង្ឃទាំងអស់ចៀសវាងឱ្យបានការខុសឆ្គង គឺត្រូវធ្វើអ្វីៗឱ្យសមរម្យ។ កន្លងមកមានព្រះសង្ឃមួយចំនួនប្រើទូរស័ព្ទដៃបញ្ចូលបទចំរៀងមនោសញ្ចេតនា ឬក៏អាចបញ្ចូលរឿងអាសអាភាសទៀតផង។ មិនតែប៉ុណ្ណោះព្រះសង្ឃខ្លះទៅគង់កន្លែងបញ្ចូលបទភ្លេងទូរស័ព្ទនៅតាមចិញ្ចើមផ្លូវសាធារណៈ ដែលធ្វើបែបនេះមិនសមនឹងភ្នែកមហាជនឡើយ។លោកអភិបាលខណ្ឌបន្តថា លោកជឿជាក់ថា ព្រះសង្ឃទាំងអស់ នឹងចៀសវាងឱ្យឆ្ងាយពីបញ្ហាខាងលើ ហើយចំពោះទូរស័ព្ទត្រូវតែប្រើ ព្រោះជាសម័យជឿនលឿន ប៉ុន្តែគួរតែដាក់សំលេងរោទ៍បែបធម្មជាតិរបស់វាទៅល្អជាង។ លោកក៏សំណូមពរផងដែរដល់គណៈកម្មការអាចារ្យវត្តទាំងអស់ធ្វើអ្វីៗដើម្បីវត្តរីកចំរើន និងមានការឯកភាពពីព្រះចៅអធិការ គ្រូសូត្រស្តាំ ឆ្វេង កុំធ្វើអ្វីខ្វះការឯកភាពគ្នា ជាពិសេសកុំបូមយកបច្ច័យពីវត្តទៅផ្ទះចិញ្ចឹមគ្រួសារឱ្យសោះ៕