ខេត្តបន្ទាយមានជ័យ ៖ រថយន្តកាមរីឆ្លាមមួយគ្រឿងបានក្លាយទៅជាចំណីព្រះអគ្គីនៅកណ្តាលវាលស្រែឆ្ងាយដាច់ស្រយាល ពីភូមិ។ ហេតុការណ៍ឆេះរថយន្តនេះ បានកើតឡើងនៅវេលាម៉ោង២រសៀលថ្ងៃទី១១ មករា ឆ្នាំ២០១១ តាមបណ្តោយផ្លូវរទេះ និងគោយន្តទៅកាន់ភ្នំកូនដំរី ខាងជើងភ្នំកូនដំរីចំងាយ៥០០ម៉ែត្រ ស្ថិតក្នុងភូមិសាស្ត្រឃុំព្រះនេត្រព្រះ ស្រុកព្រះនេត្រព្រះ។ រឿងហេតុបែបនេះកម្រកើតមានណាស់ចំពោះរថយន្តទំនើប ព្រោះភាគច្រើនគេធ្លាប់តែឃើញរថយន្តចាស់ឆេះដោយសារឆ្លងភ្លើង ឬហៀរប្រេងសាំង លុះរថយន្តទំនើបត្រូវភ្លើងឆេះកណ្តាលវាលស្រែបែបនេះ ពិតជាប្លែកមែន។មន្ត្រីប៉ូលិសចរាចរស្រុកព្រះនេត្រព្រះបានឱ្យដឹងថា រថយន្តដែលក្លាយទៅជាចំណីព្រះអគ្គីសល់តែគ្រោងឆ្អឹងនេះ ម៉ាកតូយូតូកាមរីឆ្លាម ចង្កូតឆ្វេង ពណ៌ត្រីឆ្លូញ ពាក់ស្លាកលេខភ្នំពេញ 2N-8405 បើកបរដោយឈ្មោះហួតសំណាង ភេទប្រុស អាយុ៣០ឆ្នាំ ជាអាណិកជនខ្មែរនៅប្រទេសអូស្ត្រាលី មកលេងបងប្អូននៅភូមិឫស្សីក្រោក ឃុំឫស្សីក្រោក ស្រុកមង្គលបុរី ក្នុងនោះមានអ្នករួមដំណើរ៣នាក់ ហើយរថយន្តដែលឆេះនេះគឺជារថយន្តខ្ចីគេផងដែរ។មន្ត្រីប៉ូលិសរូបនោះបានបន្តឱ្យដឹង ថា តាមការសាកសួរ អ្នកបើកបរ និងអ្នករួមដំណើរ ព្រមទាំងប្រជាពលរដ្ឋនៅទីនោះបានឱ្យដឹងថា មុនពេលកើតហេតុមានគោយន្តកន្ត្រៃមួយគ្រឿងខូចកណ្តាលផ្លូវខណៈបើកទៅដឹកកណ្តាប់ស្រូវ ពេលនោះអ្នកបើកបររថយន្តបានបើកគេចវាងតាមវាលស្រែដោយមិនដឹងថា ស្រែនោះដីទន់ទេ ពេលបើកចូលទៅក៏ជាប់ផុងរើមិនរួច ។ ភ្លាមនោះពួកគេក៏បានយកចំបើងដាក់កល់កង់រថយន្ត ហើយជាន់ហ្គាររើចេញពីភក់ ពេលនោះរថយន្តតួងកង់រហូតដល់ក្តៅ បណ្តាលឱ្យឆេះចំបើងហើយឆេះទាំងរថយន្តតែម្តង។តាមប្រភពព័ត៌មានពីសាច់ញាតិអ្នកបើកបរ រថយន្ត ឈ្មោះហួត សំណាង នេះ គឺជាអាណិកជនខ្មែរនៅប្រទេសអូស្ត្រាលី ពេលមកលេងស្រុកត្រូវបងប្អូននាំដើរលេងទៅភូមិស្រេះកើត ឃុំព្រះនេត្រព្រះ ហើយក៏មានកម្មវិធីជប់លៀងផងដែរ។ បន្ទាប់មកបងប្អូននៅទីនោះក៏បានអញ្ជើញគាត់ទៅដុតត្រីហូបនៅបឹងតាជ្រាំ ក្នុងភូមិសាស្ត្រឃុំព្រះនេត្រព្រះ។ ដោយឈ្មោះហួត សំណាង ចង់ឃើញវាលស្រែវាលស្រូវ និងកន្លែងរកត្រីផងនោះ ក៏នាំគ្នាបើករថយន្តមកតាមផ្លូវរទេះគោយន្តទៅមើលបងប្អូនដែលកំពុងរកត្រីនៅទី នោះ ក៏ជួបហេតុការណ៍អកុសលបែបនេះទៅ។លោកអនុសេនីយ៍ឯក កែវ ប៊ុនយឿន អធិការនគរបាលស្រុកព្រះនេត្រព្រះ បានឱ្យដឹងដែរថា នៅពេលរថយន្តឆេះអ្នកបើកបរ និងអ្នករួមដំណើរហាក់បីដូចជាមិនសោកស្តាយរថយន្តនោះទេ ព្រោះឃើញពួកគេនាំគ្នាអង្គុយផឹកស៊ីនៅក្បែររថយន្តនោះទៀត នេះបើតាមមន្ត្រីប៉ូលិសចរាចរស្រុកដែលបានទៅឃើញផ្ទាល់ភ្នែក។ ទោះបីជាបែបណាចាត់ទុកថាសំណាងល្អដែរ ដែលភ្លើងមិនបានឆេះរាលដាលដល់ស្រូវប្រជាពលរដ្ឋ ដែលខ្លះច្រូតកាត់រួចទុកកណ្តាប់នៅវាលស្រែ ខ្លះទៀតមិនទាន់ច្រូតកាត់ ប៉ុន្តែក៏ឆេះកណ្តាប់ស្រូវម្ចាស់ស្រែកន្លែងរថយន្តជាប់ផុងនោះអស់ចំនួន៤០កណ្តាប់ផងដែ រ តែម្ចាស់ស្រែមិនរករឿង និងទារសំណងទេ៕
