ខេត្តបន្ទាយមានជ័យ ៖ រថយន្តម៉ាកកាមរីស៊េរី៩៣ មួយគ្រឿង ដឹកកូនត្រីកំភ្លាញ បានក្រឡាប់ធ្លាក់ពីលើផ្លូវជាតិលេខ៦ បណ្តាលឱ្យខូចស្ទើរទាំងស្រុង ។ ហេតុការណ៍នេះបានកើតឡើងនៅចន្លោះពីម៉ោង២ទៅម៉ោង៣ទៀបភ្លឺ ថ្ងៃទី ១២ មករា នៅចំណុចភូមិកំពង់ស្វាយ សង្កាត់កំពង់ស្វាយ ក្រុងសិរីសោភ័ណ ។ អ្នកបើកបររថយន្តមិនត្រូវបានស្គាល់អត្តសញ្ញាណទេក្រោយពីកើតហេតុ បានរត់គេចខ្លួន ហើយត្រីក្នុងរថយន្តត្រូវបក្សពួកមកសាងយកទៅបាត់ ។ប្រភពពីមន្ត្រីនគរបាលចរាចរខេត្តបានឱ្យដឹងថា តាមសំដីសាក្សីនៅកន្លែងកើតហេតុបានប្រាប់សមត្ថកិច្ចថា មុនពេលកើតហេតុ គេឃើញរថយន្តបង្កគ្រោះថ្នាក់ដោយខ្លួនឯងនេះ បើកបរក្នុងទិសដៅពីកើតទៅលិច ពេលមកជិតដល់កន្លែងកើតហេតុ ស្រាប់តែឃើញរថយន្តនោះបានរេចង្កូតមកខាងឆ្វេងដៃ ហើយអ្នកបើកបរខំបួងចង្កូតមកស្តាំដៃវិញ បណ្តាលឱ្យរថយន្តជ្រុលចង្កូតធ្លាក់ពីលើផ្លូវជាតិក្រឡាប់ចូលទៅក្នុងប្រឡាយ ។ប៉ុន្តែករណីនេះ មិនបណ្តាលឱ្យមនុស្សគ្រោះថ្នាក់ទេ ។ បើតាមការឱ្យដឹងក្រៅផ្លូវការថា រថយន្តនេះដឹកកូនត្រីកំភ្លាញរហូតដល់ទៅទំងន់២តោនឯណោះ ។ មន្ត្រីប៉ូលិសចរាចរខេត្ត បានឱ្យដឹងទៀតថា តាមការសន្និដ្ឋានជំហានដំបូង គឺអ្នកបើកបររថយន្តនោះទំនងជាងងុយដេក ។ បច្ចុប្បន្នរថយន្តត្រូវបានស្ទូចយកមករក្សាទុកនៅការិយាល័យចរាចរណ៍ខេត្ត ដើម្បីស្រាវជ្រាវរកម្ចាស់ ដោះស្រាយបន្ត ៕