រាជធានីភ្នំពេញ ៖ អ្នកលេងល្បែងបៀ និងអាប៉ោង២ក្រុមផ្សេងគ្នាបានត្រូវកំលាំងប៉ូលិសខណ្ឌដង្កោ ចុះទៅបង្ក្រាបជាបន្តបន្ទាប់ដោយឃាត់ខ្លួនមនុស្ស៤នាក់ និងម៉ូតូចំនួន១៣គ្រឿង ព្រមទាំងម៉ូតូកង់៣ចំនួន២គ្រឿងផង រួចធ្វើការអប់រំ និងឱ្យពួកគេធ្វើកិច្ចសន្យាបញ្ឈប់សកម្មភាពរបស់ខ្លួន ហើយខិតខំប្រកបរបររកស៊ីចិញ្ចឹមប្រពន្ធកូនវិញ ។ ក្រុមអ្នកលេងល្បែងទាំងពីរក្រុមនេះត្រូវប៉ូលិសចុះបង្ក្រាបនៅកន្លែងពីរផ្សេងគ្នាដោយក្ រុមអ្នកលេងអាប៉ោង ត្រូវប៉ូលិសចុះចាប់កាលពីវេលាម៉ោង១និង២០នាទីរសៀល ថ្ងៃទី៥ មករា ឆ្នាំ២០១១ នៅក្រោមដើមឈើ ស្ថិតនៅក្បែរភូមិតាបស សង្កាត់ព្រៃវែង ខណ្ឌដង្កោ ។ ពេលនោះប៉ូលិសបង្រ្កាប និងចាប់ខ្លួនមនុស្សពីរនាក់ ឯអ្នកផ្សេងរត់ផាស់ក្រញាំចោលម៉ូតូ ហើយប៉ូលិសរឹបអូសបានម៉ូតូ៦គ្រឿង ។ ក្រោយពីធ្វើការអប់រំ និងឱ្យពួកគេធ្វើកិច្ចសន្យារួច ទើបដោះលែងទៅវិញ ឯអ្នករត់ចោលម៉ូតូក៏ដូចគ្នាដែរ គឺឱ្យម្ចាស់ចូលខ្លួនទៅធ្វើកិច្ចសន្យា ទើបប្រគល់ម៉ូតូឱ្យវិញ។ ដោយឡែកអ្នកលេងល្បែង១ក្រុមទៀត គឺជាក្រុមអ្នករត់ម៉ូតូឌុប និងអាទុកៗ (ម៉ូតូកង់បី) ដែលគ្មានម៉ូយដឹកពួកគេបានជួបជុំគ្នាលេងបៀនៅតាមចិញ្ចឹមផ្លូវដោយមិនគិតការរក ស៊ី និងមិនចេះខ្មាសអៀនដល់អ្នកដំណើរតាមផ្លូវ ជាពិសេសអ្នកដំណើរជាជនជាតិបរទេសតែម្តង ធ្វើឱ្យខូចសណ្តាប់ធ្នាប់តាមដងផ្លូវសាធារណៈ ។ ក្រុមនេះត្រូវបានប៉ូលិសខណ្ឌដង្កោ ចុះបង្ក្រាបកាលពីវេលាម៉ោង២និង៣០នាទីរសៀល ថ្ងៃទី៥ មករា ឆ្នាំ២០១១ នៅតាមបណ្តោយផ្លូវលេខ២០០៤ ភូមិត្រពាំងល្វា សង្កាត់កាកាប ខណ្ឌដង្កោ ដោយប៉ូលិសចាប់បានមនុស្សពីរនាក់ រឹបអូសម៉ូតូចំនួន៧គ្រឿង និងអាទុកៗ២គ្រឿងផងដែរ រីឯអ្នកផ្សេងទៀតរត់រួច ។ បន្ទាប់មកប៉ូលិសបាននាំពួកគេ ព្រមទាំងម៉ូតូ និងអាទុកៗនោះទៅកាន់អធិការដ្ឋានធ្វើការអប់រំ និងឱ្យធ្វើកិច្ចសន្យាដូចអ្នកខាងលើដែរ ។ មន្ត្រីប៉ូលិសនិយាយថា ពួកគេទាំងពីរក្រុមខាងលើ តែងតែនាំគ្នាលេងល្បែងបែបនេះ ស្ទើរតែរាល់ថ្ងៃមិនគិតការរកស៊ីនោះឡើយ ដោយសារតែឃើញសកម្មភាពបែបនេះ ទើបលោកអធិការប៊ន សំអាត បញ្ជាឱ្យកងកំលាំងចុះចាប់ ប៉ុន្តែពួកគេមួយចំនួនបានដឹងខ្លួនមុនរត់អស់នៅសល់តែអ្នករត់អត់ទាន់ត្រូវចាប់ខ្ល ួន ។ ទោះបីជាយ៉ាងណា ពេលនេះពួកគេត្រូវដោះលែងវិញហើយ ឯម៉ូតូក៏ប្រគល់ឱ្យវិញដែរ បន្ទាប់ពីធ្វើការអប់រំ និងឱ្យធ្វើកិច្ចសន្យារួចមក ៕