រាជធានីភ្នំពេញ ៖ មកដល់វេលាម៉ោង២និង៣០នាទីរសៀលថ្ងៃដដែលក្រោមការបាញ់ទឹកដ៏សន្ធប់ពីកំលាំងសមត្ថកិច្ចទៅលើ អណ្តាតភ្លើង និងកន្លែងដែលហុយផ្សែងអគ្គីភ័យដែលមុននេះប្រើអំណាចខ្លាំងក្លានោះបានបាក់បបខ្លបខ្លាចរលត ់ជាស្ថាពរហើយបន្សល់ទុកសសរផ្ទះគ្រោងឆ្អឹងអគារ ឈរច្រូងច្រាង លើគំនរផេះផង់ ឡូកឡំជាមួយជនរងគ្រោះដែលជាម្ចាស់ផ្ទះស្រែកយំស្តាយទ្រព្យឱ្យរញៀវ និងអ្នកខ្លះបានត្រឹមឈរមើលទៅលើវាលវិនាសកម្មយ៉ាងរហង់ផ្ចង់អារម្មណ៍សំរាប់ពេលអនាគត ដោយក្តីរន្ធត់ពន់ពេកប្រមាណ ។ ផ្លូវជាច្រើនដែលមុននេះបានបិទការចេញ-ចូលត្រូវបានបើកឱ្យដំណើរការចរាចរឡើងវិញ ហើយហ្វូងមនុស្សបានធ្វើចរាចរទៅ មកធម្មតាដោយមិនភ្លេចបង្អន់ល្បឿន និងងាកមើលទិដ្ឋភាពវិនាសកម្មប្រកបដោយការសោកស្តាយផងដែរ ។យោងតាមរបាយការណ៍របស់សមត្ថកិច្ចជំហានដំបូងបានឱ្យដឹងថា ផ្ទះតូចធំ៥៦ខ្នងត្រូវក្លាយជាចំណីភ្លើងទាំងស្រុង និង១១ខ្នង ទៀតត្រូវឆេះជញ្ជាំងខ្លះៗ និងត្រូវម្ចាស់ផ្ទះសហការជាមួយសមត្ថកិច្ចធ្វើការរុះរើគេចចេញពីក្រញាំអណ្តាតភ្លើង... ឡានទឹកចំនួន២០គ្រឿង បានបន្លឺស៊ីរ៉ែនយ៉ាងរន្ថើន ប្រញាប់ប្រញាល់វិលកង់ខ្ញាល់ចូលសំដៅជម្រកដែលហុយផ្សែងក្តោបដោយអណ្តាតភ្លើង គឺរថយន្តទឹករបស់ស្នងការដ្ឋានរាជធានីភ្នំពេញ១២គ្រឿង ក្រុមហ៊ុនសូគីម៉ិច២គ្រឿង ក្រុមហ៊ុនតេលាកម្ពុជា២គ្រឿង ខាងព្រលានយន្តហោះអន្តរជាតិភ្នំពេញ១គ្រឿង និងកងពលតូចលេខ៧០ ចំនួន៣គ្រឿង ហើយបានប្រើទឹកអស់៤៤ឡាន (ជើង) ។ មិនទាន់មានការវាយតំលៃថា ការខូចខាតទ្រព្យសម្បត្តិមានទំហំប៉ុនណានោះទេ ហើយអ្នកស្លាប់ និងរងរបួសក៏មិនមានដែរ មូលហេតុនៃការឆេះមិនទាន់មាននរណាហ៊ានអះអាងថា បណ្តាលមកពីអ្វីក៏ទេដែរ ប៉ុន្តែផ្ទះដែលផ្តើមឆេះគឺឆេះចេញពីផ្ទះឈ្មោះសំណាង ជនជាតិវៀតណាម ដែលចាក់សោទុកចោល ៕
