ខេត្តបន្ទាយមានជ័យ ៖ យុវជនម្នាក់ត្រូវប៉ូលិសចាប់ឃាត់ខ្លួនកាលពីព្រឹកថ្ងៃទី៣១ ធ្នូ ២០១០ ដោយចោទប្រកាន់ពីបទចែកចាយរូប ភាពអាសអាភាសរបស់គូស្នេហ៍មួយគូ ដែលឡើងឋានសួគ៌ជាមួយគ្នានៅផ្ទះសំណាក់ផ្កាយមាស ស្ថិតក្នុងភូមិ១ សង្កាត់ព្រះពន្លា ក្រុងសិរីសោភ័ណ ហើយបានថតរូបក្តៅសាច់របស់ខ្លួនទុកមើលជាអនុស្សាវរីយ៍ ។ លោកវរសេនីយ៍ទោសិទ្ធ ឡោះ នាយការិយាល័យប្រឆាំងការជួញដូរមនុស្ស និងការពារអនីតិជន បានឱ្យដឹងថា យុវជនជាប់ចោទដែលបាញ់រូបភាពអាសអាភាសចំលងតាមទូរស័ព្ទដៃផ្សាយជាសាធារណៈនេះ ឈ្មោះម៉ូលីវណ្ណ រដ្ឋា អាយុ១៩ឆ្នាំ មុខរបរជាកូនជាងហាងលក់ទូរស័ព្ទដៃ មានយីហោពិភពអាកាសថ្មី ស្ថិតក្នុងភូមិ៣ សង្កាត់ព្រះពន្លា ក្រុងសិរីសោភ័ណ ។ ចំពោះការឃាត់ខ្លួននោះគឺធ្វើឡើងតាមការអនុញ្ញាតពីលោកតន់ សីហតេជៈ ព្រះរាជអាជ្ញារងសាលាដំបូងខេត្ត ។បើតាមការរៀបរាប់បំភ្លឺពីតួឯកប្រុសក្នុងវីដេអូនោះបានឱ្យសមត្ថកិច្ចដឹងថា រូបនោះជារូបរបស់ខ្លួនថតជាមួយនឹងសង្សារ កាលពីអំឡុងខែកក្កដា ឆ្នាំ២០១០ ក្នុងឱកាសពិធីខួបកំណើតរបស់តួឯកស្រី ដោយពួកគេបាននាំគ្នាទៅដេកនៅផ្ទះសំណាក់ផ្កាយមាស ហើយបានស្ម័គ្រចិត្តថតវីដេអូដាក់ទូរស័ព្ទដៃម៉ាក LG ពណ៌ក្រហម-ខ្មៅ មានរយៈពេលជិត១នាទី នៅក្នុងបន្ទប់នោះ ។ បន្ទាប់មករូបគេបានយកទូរស័ព្ទដៃនោះទៅបញ្ចាំនៅហាងលក់ទូរស័ព្ទដៃមានយីហោពិភពអាកាសថ ្មី ដែលមានម្ចាស់ឈ្មោះនាក់ វុឌ្ឍី ក្នុងតំលៃ៥០ដុល្លារ ។ ពេលទៅយកទូរស័ព្ទដៃវិញ ស្រាប់តែអស់ថ្ម ហើយប៊្លូធូត្រូវបានគេបើកចោលទៀត ធ្វើឱ្យខ្លួនមានការសង្ស័យផងដែរ ។បើតាមសំដីបំភ្លឺរបស់ជនជាប់ចោទឈ្មោះម៉ូលី វណ្ណ រដ្ឋា ប្រាប់សមត្ថកិច្ចថា ក្រោយបញ្ចាំរូបគេបានយកទូរស័ព្ទដៃមកត្រួតពិនិត្យមើលឃើញវីដេអូូឃ្លីបនោះ មានរូបក្មេងស្រីម្នាក់ដេកស្លៀកកន្សែងពោះគោជាមួយបុរសម្នាក់ក្នុងបន្ទប់មួយ រួចរូបគេយកវីដេអូឃ្លីបនោះទៅឱ្យឈ្មោះលន់ គឹមឡេង មើល និងបានថតចម្លងចូលក្នុងកុំព្យូទ័ររួចក៏លុបចេញ ។ លោកវរសេនីយ៍ទោសិទ្ធ ឡោះ បានបញ្ជាក់ថា រហូតដល់ថ្ងៃទី៣០ ធ្នូ ឆ្នាំ២០១០ វីដេអូនោះត្រូវបានចែកចាយពីទូរស័ព្ទមួយទៅទូរស័ព្ទមួយ ជាពិសេសក្នុងចំណោមសិស្សវិទ្យាល័យសម្តេចឪ (ហៅសាលាលើ) ។ បច្ចុប្បន្នយុវជនជាប់ចោទឈ្មោះម៉ូលីវណ្ណ រដ្ឋា ត្រូវបានសមត្ថកិច្ចកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមច្បាប់ ៕
