ខេត្តតាកែវ ៖ ឃាតកដំរីឈ្មោះអាសំបូរ ដែលបានជាន់សម្លាប់មនុស្សម្នាក់នៅខេត្តកំពង់ស្ពឺ កាលពីដើមខែធ្នូ ឆ្នាំ២០១០ កន្លងមកនោះ មកទល់នឹងពេលនេះ វាមានចរិតកាចសាហាវជាងមុនទៅទៀត ។ ប្រធានសួនសត្វភ្នំតាម៉ៅ លោកញឹក រតនៈពេជ្រ បានប្រាប់កោះសន្តិភាពតាមទូរស័ព្ទពីសួនសត្វភ្នំតាម៉ៅ ស្ថិតក្នុងស្រុកបាទីខេត្តតាកែវ ទីដែលអាសំបូរ កំពុងរស់នៅនោះថា អាសំបូរ បានកែចរិតហើយ ប៉ុន្តែកែពីកាចកាន់តែកាចសាហាវជាងមុនទៅទៀត ។ លោកញឹក រតនៈពេជ្រ បានបន្តឱ្យដឹងនៅព្រឹកថ្ងៃព្រហស្បតិ៍ ទី៦ មករា ២០១១ ថា អាសំបូរ ឱ្យតែឃើញម៉ូតូគឺវារុញ និងបោលបុក បណ្តាលឱ្យទ្រុងដែកដែលដាក់វានោះកោងស្ទើរបាក់ទៅហើយ ។លោកបញ្ជាក់ថា បើឃើញមនុស្សវាស្លូតធម្មតា ប៉ុន្តែមិនដឹងយ៉ាងម៉េចឱ្យតែឃើញម៉ូតូវាបោកបុកប្រុងទំលាយទ្រង់ដែកនោះ តែម្តង ។ លោកប្រធានសួនសត្វភ្នំតាម៉ៅរូបនេះបញ្ជាក់ទៀតថា ការដែលវាកាចសាហាវជាងមុននេះ មកពីវានៅតែចុះប្រេង ដោយសារតែយើងឱ្យវាស៊ីអាហារច្រើន ដូចជាផ្លែចេក អំពៅ ស្មៅ និងផ្លែប៉ោមនោះជាដើម ។ លោកញឹក រតនៈពេជ្រ បន្ថែមថា តាមគំរោងយើងចង់កាត់បន្ថយការចុះប្រេងរបស់វា ដោយដាក់មេ ប៉ុន្តែយើងខ្លាចអាសំបូរ សម្លាប់ដំរីញីនោះ ព្រោះវាកាន់តែសាហាវ ទើបយើងផ្អាកសិន រង់ចាំមើលការផ្លាស់ប្តូរចរិតរបស់វានៅពេលក្រោយទៀត ។ លោកញឹក រតនៈពេជ្រ បានបញ្ជាក់បន្ថែមថា អាសំបូរ កាចសាហាវជាងមុនមិនមែនដោយសារវាឆ្កួតនោះទេ គឺមូលហេតុមកពីវាចុះប្រេង ។គួរបញ្ជាក់ថា អាសំបូរ ត្រូវបានក្រុមជំនាញសត្វព្រៃចាប់ដាក់ច្រវាក់ ដើម្បីអប់រំ និងផ្សាំងវាកាលពីថ្ងៃទី១៥ ធ្នូ និងបានបញ្ជូនទៅកាន់សួនសត្វភ្នំតាម៉ៅកាលពីថ្ងៃទី២៥ ធ្នូ ២០១០ កន្លងមកនេះ ក្រោយពេលដែលវាបានសម្លាប់មនុស្សម្នាក់កាលពីរសៀលថ្ងៃសៅរ៍ ទី៤ ធ្នូ នៅចំណុចជ្រោះបាក់ ស្ថិតក្នុងភូមិមន ឃុំធម្មតាអរ ស្រុកសំរោងទង ខេត្តកំពង់ស្ពឺ និងធ្វើឱ្យប្រជាសហគមន៍មានការភ័យខ្លាច ចំពោះវាយ៉ាងខ្លាំង ។ បុរសដែលត្រូវអាសំបូរ ជាន់សំលាប់នោះឈ្មោះសែ ណុល អាយុ៥៤ឆ្នាំ មានទីលំនៅក្នុងភូមិ-ឃុំកន្លែងកើតហេតុខាងលើ ។ ហេតុការណ៍ដ៏កម្រជួបប្រទះ និងគួរឱ្យសោកស្តាយនេះបានកើតឡើង ខណៈពេលជនរងគ្រោះ និងម្ចាស់របស់វា ដែលពិការជើងម្ខាងកំពុងស្រាយច្រវាក់ចេញពី.កដំរី ស្រាប់តែដំរីនោះបានបុះជនរងគ្រោះឱ្យដួល រួចជាន់ពីលើរហូតដល់ស្លាប់នៅនឹងកន្លែងតែម្តង ៕
