ព័ត៌មានកីឡា៖ ក្រោយពីកម្ពុជាបានសម្រេចក្ដីសុបិន្ដចង់ក្លាយជា ម្ចាស់មេដាយមាសកីឡា Asian Game ២០១៤ ផ្នែក តៃក្វាន់ដូ ពិតប្រាកដហើយនោះ គ្រប់យ៉ាងពិតជាប្រសើរ និង ជាមោទនភាពជាខ្លាំងសម្រាប់ការធ្វើដំណើរនេះ ។
ថ្លែងពីអារម្មណ៍រំភើបពិតសម្រាប់ជោគជ័យមេដាយមាសនេះ លោក វ៉ាត់ ចំរើន បានមានប្រសាសន៍ថា នេះគឺជាព្រឹត្ដិការណ៍អស្ចារ្យបំផុតសម្រាប់ពួកយើង ហើយវាក៏ហួសពីក្ដីរំពឹងពិតប្រាកដដែលស្មានមិនដល់ តួយ៉ាង ក្នុងគោលបំណងមួយដែល កម្ពុជាឈានជើងចូលប្រកួតកីឡា Asian Game នេះ គឺក្ដីសង្ឃឹមយ៉ាងហោចណាស់ក៏ ត្រឹមមេដាយសម្រឹទ្ធ ប៉ុន្ដែខណៈពេលនេះ កម្ពុជា បែជានាំមេដាយមាសទៅវិញសោះ ហើយពិតជាអស្ចារ្យទៀតផង ។
លោក Choi Yong Sok គ្រួបង្វឹកជនជាតិកូរ៉េ ក៏ថ្លែងពីការត្រេកអរនិង កម្ពុជាផង ដោយលើកឡើងថា រួបគាត់ពិតជាសប្បាយចិត្ដ ណាស់ដែលកម្ពុជាពេលនេះ មានសរសរទ្រូងដ៏រឹងមាំហើយសម្រាប់ប្រវត្ដិសាស្រ្ដ ។ ហើយគាត់ចង់ឲ្យប្រជនរួមជាតិកម្ពុជាទាំងអស់ អបអរសារទរ និង ជោគជ័យ កម្ពុជាមួយនេះ។
សូមបញ្ជាក់ថាលោក Choi Yong Sok គឺជាគ្រួបង្វឹកជនជាតិកូរ៉េ ហើយគាត់មករស់នៅកម្ពុជា ជាង ២០ ឆ្នាំមកហើយ សម្រាប់វត្ដមានកីឡាការិនី ស៊ន សៀវម៉ី ចូលរួមប្រកួតកីឡា Asian Game នេះ រួបគាត់ក៏បានខិតខំប្រឹងប្រែង ជួយជ្រោមជ្រែង តាំងតែពីដើម រហូតដល់ចប់ ជាមួយ NOCC ទទួលបានជ័យជំនះ។
ចំណែក កីឡាការិនី ផ្ទាល់វិញ ក៏បានក៏បានបង្ហាញពីអារម្មណ៍ពិតដែរថា កញ្ញាពិតជាសប្បាយចិត្ដ ហើយ រំភើបខ្លាំងបំផុតដែលមិនអាចនិយាយបាន ហើយជោគជ័យនេះ កញ្ញាសូមអរគុណ ជាខ្លាំងសម្រាប់ការគាំទ្រ ជាពិសេសគ្រួសារកញ្ញា និង គណៈគ្រប់គ្រងទាំងអស់ ដែលតែងតែ ទំនុកបំរុងកញ្ញារហូតដល់មានថ្ងៃនេះ។
ដោយ៖ អឿ អ៊ុយប្រភព៖ NOCC