រាជធានីភ្នំពេញ ៖ អ្នកញៀនល្បែងអាប៉ោងចំនួន១២នាក់ ត្រូវបានប៉ូលិសនៃអធិការដ្ឋានខណ្ឌសែនសុខ ដឹកនាំដោយលោកវរសេនីយ៍ទោម៉ក់ ហុង ធ្វើការឃាត់ខ្លួនភ្លាមៗ ខណៈកំពុងពពាក់ពពូនគ្នាលេងល្បែងស៊ីសងនៅឯផ្ទះមួយស្ថិតក្នុងភូមិផ្សារលិច សង្កាត់ព្រែកព្នៅ ខណ្ឌសែនសុខ កាលពីវេលាម៉ោង១២និង១៥នាទីថ្ងៃទី៥ មករា ឆ្នាំ២០១០ ។ យោងតាមមន្ត្រីប៉ូលិសខណ្ឌសែនសុខ បានឱ្យដឹងថា អ្នកញៀនល្បែងស៊ីសងដែលប៉ូលិសឃាត់ខ្លួនទាំងនេះមានបុរស១០នាក់ និងស្រី២នាក់ សរុបចំនួន១២នាក់នឹងត្រូវកសាងសំណុំរឿងបញ្ជូនទៅកាន់តុលាការដើម្បីចាត់ការតាមច្បាប់ ។ សូមបញ្ជាក់ថា ទីតាំងបើកលេងល្បែងស៊ីសងនេះ ធ្លាប់ត្រូវសមត្ថកិច្ចបង្ក្រាបចាប់បានអ្នកលេងល្បែងច្រើននាក់ម្តងរួចមកហើយ កាលស្ថិតនៅជាឃុំព្រែកព្នៅ ក្រោមការគ្រប់គ្រងរបស់អាជ្ញាធរស្រុកពញាឮ ឥឡូវស្ថិតក្រោមការគ្រប់គ្រងរបស់អាជ្ញាធរខណ្ឌសែនសុខ ត្រូវបង្ក្រាបចាប់បានម្តងទៀត គឺត្រូវចាត់ការឱ្យម៉ឺងម៉ាត់ ។ ទោះជាយ៉ាងណាក៏ដោយ មេល្បែងស៊ីសង ឬម្ចាស់បើកល្បែងនេះមិនត្រូវចាប់ខ្លួនបានទេ ហាក់ដូចជាគេផ្តល់ដំណឹងឱ្យមុន ខណៈប៉ូលិសចុះទៅចាប់ ៕
