រាជធានីភ្នំពេញ ៖ តាមប្រភពព័ត៌មានពីក្រុមមន្ត្រីបានឱ្យដឹងថា លោកឧបនាយករដ្ឋមន្ត្រីសុខ អាន រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រីគ្រោងនឹងដឹកនាំក្រុមការងារមួយចំនួនទៅកាន ់ក្រុងបាងកក ប្រទេសថៃ ក្នុងពេលខាងមុខឆាប់ៗនេះ ប៉ុន្តែក្រុមមន្ត្រីមិនបានបញ្ជាក់ថា លោកឧបនាយករដ្ឋមន្ត្រីគ្រោងនឹងទៅប្រទេសថៃលើប្រធានបទអ្វីនោះទេ ។យោងតាមគេហទំព័របាងកកប៉ុស្តិ៍ដកស្រង់សំដីលោកឧបនាយករដ្ឋមន្ត្រីថៃស៊ូថេប ធឿកស៊ូបាន់ បានលើកឡើងថា ពលរដ្ឋថៃ៧នាក់ដែលកំពុងជាប់ឃុំឃាំងនៅគុកព្រៃ.សប្រទេសកម្ពុជា អាចនឹងត្រូវដោះស្រាយចប់សព្វគ្រប់ដោយការចរចាមុនពេលលោកឧបនាយករដ្ឋមន្ត្រីសុខ អាន អញ្ជើញទៅទស្សនកិច្ចក្នុងប្រទេសថៃនាពេលខាងមុខនេះ ។ ដោយឡែក លោកអាប់ភីស៊ីត វ៉េចាជីវ៉ា នាយករដ្ឋមន្ត្រីថៃ បាននិយាយនៅក្នុងគេហទំព័រ MCOT ថា លោកឧបនាយករដ្ឋមន្ត្រីសុខ អាន នឹងគ្រោងចេញទៅកាន់ប្រទេសថៃ ជួបជាមួយលោកសូវីត ឃុនគិតទិ រដ្ឋមន្ត្រីក្រសួងធនធានធម្មជាតិ និងបរិស្ថាន នៅក្នុងខែមករានេះ ។ចំណែកអ្នកនាំពាក្យអង្គភាពព័ត៌មាន និងប្រតិកម្មរហ័ស លោកទិត្យ សុធា បានមានប្រសាសន៍តាមទូរស័ព្ទថា លោកច្រានចោលព័ត៌មាននេះ ហើយថា មកដល់ម៉ោងនេះ មិនមានព័ត៌មានណាមួយអះអាងថា លោកឧបនាយករដ្ឋមន្ត្រីសុខ អាន មានគំរោងចេញទៅក្រុងបាងកក ប្រទេសថៃនោះទេ។ ការលើកឡើងរបស់បណ្តាញព័ត៌មានពីប្រទេសថៃនោះគឺគេគ្រាន់តែចង់ភ្ជាប់ព័ត៌មាននេះពាក់ព័ន្ធ ពលរដ្ឋថៃ៧នាក់ដែលជាប់ឃុំឃាំងតែប៉ុណ្ណោះ ៕