ខេត្តក្រចេះ ៖ យុវសិស្សនារីម្នាក់ក្នុងចំណោមមិត្តភក្តិប្រុសស្រី២២នាក់បានលង់ទឹកទន្លេស្លាប់ ក្រោយពេលដែលពួកគេជួបឧប្បត្តិហេតុលិចទូកនៅកណ្តាលទន្លេ កាលពីវេលាម៉ោង១១និង១៥នាទីថ្ងៃទី៧ មករា នៅចំណុចទន្លេទល់មុខភូមិថ្មី ឃុំសណ្តាន់ ស្រុកសំបូរ ។ យុវនារីដែលបានលង់ទឹកស្លាប់នោះឈ្មោះនាង ដានី អាយុ១៦ឆ្នាំ រៀនថ្នាក់ទី៨ នៃអនុវិទ្យាល័យសណ្តាន់ ។លោកប្រ៉យ ផល្លី នាយរងប៉ុស្តិ៍នគរបាលរដ្ឋបាលសណ្តាន់បានថ្លែងឱ្យដឹងថា កាលពីថ្ងៃកើតហេតុដែលជាថ្ងៃឈប់សំរាក ក្រុមសិស្សានុសិស្សមានគ្នា២២នាក់ បាននាំគ្នាជប់លៀងរួចក៏ឆ្លងទូកនេសាទមួយគ្រឿងប្រវែង៩ម៉ែត្រទទឹងជាង៣ម៉ែត្រ ចេញពីច្រាំងសំដៅទៅកាន់កូនកោះនៅកណ្តាលទន្លេ លុះទូកចេញបានប្រមាណជាង៦០ម៉ែត្រពីច្រាំង ស្រាប់តែលិច ។ពេលមើលពីច្រាំងឃើញហេតុការណ៍នេះភ្លាម ប្រជាពលរដ្ឋ និងសមត្ថកិច្ចបានចេញទូកទៅជាច្រើនគ្រឿងដើម្បីជួយស្រង់ក្រុមយុវសិស្សទាំងនោះ តែអកុសលនារីរងគ្រោះដោយសារតែនាងមិនចេះហែលទឹកក៏ត្រូវលង់ទឹកស្លាប់ ហើយសពត្រូវបានសមត្ថកិច្ចនិងក្រុមគ្រួសារមុជរាវរកឃើញរយៈពេលជាងមួយម៉ោងបន្ទាប់ពីកើតហ េតុ ។ តាមការសន្និដ្ឋានថា មូលហេតុដែលបង្កឱ្យទូកលិចនេះដោយសារទូកនេសាទមានទំហំតូច ហើយផ្ទុកមនុស្សលើសចំណុះ ស្របពេលដែលរដូវធ្លាក់ខ្យល់ទឹកទន្លេមានរលកធំៗទើបធ្វើឱ្យទូកលិចបែបនេះទៅ ៕