ខេត្តបន្ទាយមានជ័យ ៖ គោយន្តកន្ត្រៃមួយគ្រឿងសណ្តោងរ៉ឺម៉ក ដែលដឹកអ្នកច្រូតទៅច្រូតស្រូវ ហើយទុកចោលនៅវាលស្រែ បានត្រូវចោរលួចយកទៅបាត់ស្រមោលឈឹង ។ ហេតុការណ៍ចោរលួចគោយន្តកន្ត្រៃនេះបានកើតឡើងនៅចន្លោះពីម៉ោង៦ព្រឹកទៅម៉ោង៣រសៀលថ្ង ៃទី៩ មករា ឆ្នាំ២០១១ នៅចំណុចកំពង់កាណូតខាងត្បូង ភូមិស្រេះលិច ឃុំព្រះនេត្រព្រះ ស្រុកព្រះនេត្រព្រះ ។ លោកអនុសេនីយ៍ឯកកែវ ប៊ុនយឿន អធិការនគរបាលស្រុក បានឱ្យដឹងថា ម្ចាស់គោយន្តឈ្មោះចែត ជិត ភេទប្រុស អាយុ៥២ឆ្នាំ ជាមេភូមិស្រេះគោកស្រុក ឃុំព្រះនេត្រព្រះ ស្រុកព្រះនេត្រព្រះ ។បើតាមបណ្តឹងម្ចាស់គោយន្តបានប្រាប់សមត្ថកិច្ចថា នៅវេលាម៉ោង៦ព្រឹកថ្ងៃទី៩ មករា ឆ្នាំ២០១១ គាត់បានដឹកអ្នកច្រូតទៅច្រូតស្រូវនៅចំងាយពីភូមិស្រេះលិចប្រមាណ៣០០ម៉ែត្រ ហើយទុកគោយន្តនៅចំណុចកំពង់កាណូត រួចទៅច្រូតស្រូវចំងាយពីកន្លែងទុកគោយន្តនោះប្រមាណ២.៧០០ម៉ែត្រ ។ លុះនៅវេលាម៉ោង៣រសៀលក្រោយពីច្រូតស្រូវ ក៏នាំគ្នាដើរត្រឡប់មកកន្លែងទុកគោយន្តវិញ ស្រាប់តែបាត់ពុំឃើញ ដែលគោយន្តកន្ត្រៃនោះម៉ាកស្យាមគូបូតា កំលាំង១២សេះ សណ្តោងរ៉ឺម៉ក ទិញក្នុងតំលៃជាង១០ម៉ឺនបាតប្រាក់ថៃ ។ លោកអនុសេនីយ៍ឯកកែវ ប៊ុនយឿន បានបញ្ជាក់ថា ទាក់ទិននឹងករណីចោរលួចគោយន្តកន្ត្រៃនេះ លោកបានចាត់កំលាំងស្រាវជ្រាវហើយដើម្បីចាប់ឃាត់ខ្លួនជនល្មើសយកមកផ្តន្ទាទោសតាមច្ បាប់ ៕