ខេត្តកំពត ៖ កម្មករសំណង់ជាជាងផ្សារដែក៣នាក់ បានធ្លាក់ពីលើអគារសំណង់កំពស់៧ម៉ែត្រ ក្នុងពេលកំពុងតែផ្សារដែក ហើយដាច់ខ្សែកៅឡាក់ បណ្តាលឱ្យធ្លាក់មកដីរងរបួសធ្ងន់ម្នាក់ និងស្រាល២នាក់ និងត្រូវបានរថយន្តការដ្ឋានដឹកមកសង្គ្រោះនៅមន្ទីរពេទ្យបង្អែកខេត្ត ។ ហេតុការណ៍គ្រោះថ្នាក់នេះ បានកើតឡើងកាលពីវេលាម៉ោង១០និង៣០នាទីព្រឹកថ្ងៃទី១៤ មករា នៅការដ្ឋានមួយឈ្មោះរោងចក្រស៊ីម៉ង់ត៍ថៃប៊ុនរ៉ុងភ្នំល្អាង ស្ថិតក្នុងភូមិល្អាង ឃុំល្អាង ស្រុកដងទង់ ក្នុងខណៈពេលកម្មករផ្សារដែកទាំងបីនាក់ឡើងទៅផ្សារធ្នឹមអគារកំពស់៧ម៉ែត្រ រួចដាច់ជើងមូទ័រកៅឡាក់ ដែលដាក់ឱ្យកម្មករជាន់ក៏បណ្តាលឱ្យធ្លាក់មកដីទាំងឧបករណ៍សំរាប់ផ្សារ ទាំងមនុស្សគួរឱ្យរន្ធត់។ ប៉ុន្តែទោះជាយ៉ាងណា ពុំមានកម្មករណាម្នាក់រងគ្រោះដល់អាយុជីវិតទេ គ្រាន់តែរងរបួសបាក់ដៃម្នាក់ និង២នាក់ទៀតរលាត់ដៃនិងជើងចុកចាប់ពេញខ្លួនតែប៉ុណ្ណោះ ។លោកឃឹម វិន មេការមើលខុសត្រូវក្រុមជាងសំណង់បានឱ្យដឹងថា គ្រោះថ្នាក់នេះមិនមែនដោយចេតនាណាមួយទេ គឺជាហេតុការណ៍ចៃដន្យបំផុត ហើយលោកក៏មិនចង់ឱ្យមានហេតុការណ៍នេះកើតឡើងដែរ ។ ជនរងគ្រោះទាំង៣នាក់ក្នុងហេតុការណ៍នេះមាន១-ឈ្មោះខែម ផាត ភេទប្រុស អាយុ៣៧ឆ្នាំ មានទីលំនៅភូមិត្រពាំងបី ឃុំត្រពាំងបី ស្រុកឈូក ខេត្តកំពត រងរបួសធ្ងន់ បាក់ដៃខាងស្តាំត្រង់កែងដៃនិងចុកចាប់ពេញខ្លួន ២-ឈ្មោះវី សុភ័ក្ត្រ ភេទប្រុស អាយុ២៣ឆ្នាំ នៅភូមិល្អាង ឃុំល្អាង ស្រុកដងទង់ ខេត្តកំពត រងរបួសដៃម្ខាងនិងរលាត់ដៃជើង ៣-ឈ្មោះចាន់ សារ៉ាន់ ភេទប្រុស អាយុ២៨ឆ្នាំ រស់នៅភូមិល្អាង ឃុំល្អាង ស្រុកដងទង់ រងរបួសធ្លាក់មកបោកដងខ្លួននឹងដីចុកចាប់ពេញខ្លួន និងរលាត់ដៃជើង ។អ្នករងគ្រោះទាំង៣នាក់ ត្រូវបានរថយន្តការដ្ឋានសំណង់ដឹកមកសង្គ្រោះនៅមន្ទីរពេទ្យបង្អែកខេត្តភ្លាមៗ ។ ទាក់ទិននឹងឧប្បត្តិហេតុគ្រោះថ្នាក់នេះ កោះសន្តិភាពពុំបានទទួលការបំភ្លឺជុំវិញបញ្ហាជួយព្យាបាលជនរងគ្រោះទាំង៣នាក់ពីអ្នកម៉ៅការ ក្នុងការដ្ឋានសំណង់នេះទេ ដោយទូរស័ព្ទទាក់ទងពុំបាន ។ មានការលើកឡើងការសង់អគារធំៗហើយខ្ពស់ទៀតនោះ ម្ចាស់ម៉ៅការគួរតែមានឧបករណ៍ធានាសុវត្ថិភាពដល់កម្មករ មិនត្រូវខ្វះការប្រុងប្រយ័ត្នជាហេតុបណ្តាលឱ្យគ្រោះថ្នាក់ដល់កម្មករដែលកំពុងធ្វើការនោះ ទេ ៕
