រាជធានីភ្នំពេញ ៖ សមត្ថកិច្ចចំរុះ ដឹកនាំដោយព្រះរាជអាជ្ញារងអមសាលាដំបូងរាជធានីភ្នំពេញ លោកហ៊ីង ប៊ុនជា កាលពីព្រឹកថ្ងៃទី៥ មករា បានចុះទៅអនុវត្តសាលដីការបស់តុលាការកំពូល ដើម្បីធ្វើការវាស់វែងពុះដីឡូត៍មួយកន្លែងលេខ៦៣៥ ផ្លូវលេខ៧០ សង្កាត់ទួលសង្កែ ខណ្ឌឫស្សីកែវ ក្នុងរឿងក្តី២នាក់បងប្អូនបង្កើត ដែលបានប្តឹងប្តល់គ្នាសុំរក្សាសិទ្ធិលើដី និងផ្ទះអស់រយៈពេលប្រមាណ៨ឆ្នាំកន្លងមកហើយ ។ នេះជាសំណុំរឿងរដ្ឋប្បវេណីលេខ១៥៣ រវាងដើមចោទអ្នកស្រីសំ វណ្ណា (ម្ចាស់បណ្តឹងសារុទ្ខ) អាយុ៤៨ឆ្នាំ អ្នកលក់ដូរ មានទីលំនៅផ្ទះលេខ៦៣៥ ផ្លូវលេខ៧០ សង្កាត់ទួលសង្កែ ខណ្ឌឫស្សីកែវ និងចុងចំលើយលោកសម ឆន្ទ (ចុងបណ្តឹងសាទុក្ខ) អាយុ៥០ឆ្នាំជាមន្ត្រីយោធា មានទីលំនៅផ្ទះលេខ៦៣៥ ផ្លូវលេខ៧០ សង្កាត់ទួលសង្កែ ខណ្ឌឫស្សីកែវ ។ អ្នកទាំងពីរជាគូទំនាស់នឹងគ្នា ហើយត្រូវជាបងប្អូនបង្កើតនឹងគ្នា បានប្តឹងសុំរក្សាសិទ្ធិលើដីដែលអ្នកទាំងពីរកំពុងរស់នៅ ។តាមប្រភពពីសមត្ថកិច្ចសាលាខណ្ឌឫស្សីកែវ បានឱ្យដឹងថា ការចុះមកវាស់វែងបែងចែកដីនេះ ធ្វើឡើងតាមសាលដីការបស់តុលាការកំពូលលេខ៣៦២ «ក» ចុះថ្ងៃទី ៤ តុលា ឆ្នាំ២០១០ ដោយប្រធានក្រុមប្រឹក្សាជំនុំជំរះគង់ ស្រ៊ឹម និងក្រឡាបញ្ជីស៊ិន ភារៈ ដែលបានសំរេចប្រគល់ដីទំហំ៤ម៉ែត្រគុណ១៥មែត្រ ទៅឱ្យឈ្មោះសំ វណ្ណា កាន់កាប់ ។ តាមសំដីឈ្មោះសម ឆន្ទ ភេទប្រុស អាយុ៥០ឆ្នាំ ជាមន្ត្រីយោធាបានឱ្យដឹងថា ដីទំហំ១៤ម៉ែត្រគុណ១៥ម៉ែត្រ ស្ថិតនៅផ្ទះលេខ៦៣៥ ផ្លូវលេខ៧០ សង្កាត់ទួលសង្កែ ត្រូវរូបគាត់ទិញតាំងពីឆ្នាំ១៩៩០ ហើយឆ្នាំ១៩៩២ គាត់បានជួលទៅឱ្យប្អូនស្រីឈ្មោះសំ វណ្ណា ស្នាក់នៅ ។ លុះមកដល់ឆ្នាំ២០០២ ប្អូនស្រីរបស់គាត់បានប្តឹងទាមទារកម្មសិទ្ធិដីនេះ ។ការប្តឹងប្តល់គ្នាទៅសាលាដំបូងរាជធានីភ្នំពេញ សាលាឧទ្ធរណ៍ ត្រូវតុលាការសំរេចប្រគល់ដីនេះ ឱ្យមកគាត់ជាអ្នកគ្រប់គ្រងជាម្ចាស់កម្មសិទ្ធិ ហើយប្អូនស្រីពុំសុខចិត្តក៏បានប្តឹងបន្តទៅតុលាការកំពូល ហើយត្រូវតុលាការសំរេចប្រគល់ដីទំហំ៤ម៉ែត្រនិង១៥ម៉ែត្រ ទៅឱ្យឈ្មោះសំ វណ្ណា ដែលត្រូវបានសមត្ថកិច្ចចុះមកអនុវត្តសាលដីកានៅពេលនេះ ។ ចំណែកឈ្មោះសំ វណ្ណា បានឱ្យដឹងថា ផ្ទះនិងដីនោះត្រូវគាត់ទិញតាំងពីឆ្នាំ១៩៩០ មកម៉្លេះ ខ្លួនមិនបានជួលពីឈ្មោះសម ឆន្ទ នោះទេ ។ ទោះបីជាយ៉ាងណាស្ត្រីឈ្មោះមាស ហ៊ន អាយុ៧៤ឆ្នាំ ត្រូវជាម្តាយបានឱ្យដឹងថា ទីនេះកូនប្រុសរបស់គាត់ឈ្មោះសម ឆន្ទ ជាអ្នកទិញ ហើយជួយឱ្យកូនស្រីរបស់គាត់រស់នៅ ស្រាប់តែកូនស្រីប្តឹងបង ដើម្បីទាមទារផ្ទះ និងដីនោះទៅវិញ ៕
