ខេត្តកំពង់ឆ្នាំង ៖ បុរសម្នាក់ដោយសារផ្ទុះកំហឹងនៅក្នុងខ្លួន បានយកភ្លើងដុតផ្ទះខ្លួនឯងបណ្តាលឱ្យឆេះជញ្ជាំងជុំវិញ ហើយបើកុំតែបានអ្នកជិតខាងខ្លាចឆេះរាលដាលក៏នាំគ្នាជួយពន្លត់ទាន់ កុំអីឆេះតគ្នាជាពុំខាន ។ ហេតុការណ៍នេះបានកើតឡើងកាលពីវេលាម៉ោង២និង១៥នាទីរសៀលថ្ងៃទី៩ មករា នៅភូមិល្វា ឃុំពេជចង្វា ស្រុកបរិបូណ៌ ។ បុរសដែលយកភ្លើងដុតផ្ទះខ្លួនឯងនេះឈ្មោះណុប សារី អាយុ៤១ឆ្នាំ ចំណែកផ្ទះដែលឆេះសល់តែដំបូលនោះមានទំហំ៥ម៉ែត្រ×៤ម៉ែត្រ ធ្វើពីឈើប្រក់ស័ង្កសី បាំងជញ្ជាំងស្លឹក ។លោក សៀង ស៊ីថៃ នាយប៉ុស្តិ៍រដ្ឋបាលឃុំពេជចង្វា បានប្រាប់តាមទូរស័ព្ទថា ការដុតផ្ទះខ្លួនឯងនេះគឺមកពីខឹងប្រពន្ធទៅរកការងារធ្វើនៅប្រទេសថៃចោលរូបគាត់ជាប្តីហើយ ទុកកូនតូចអាយុ៥ឆ្នាំឱ្យប្តីមើលទៀត មិនត្រឹមតែប៉ុណ្ណោះ ខឹងនឹងរឿងទុកលុយចេះតែបាត់ ។ លោកនាយប៉ុស្តិ៍បានបន្ថែមថា ក្រៅពីឆេះផ្ទះសល់តែដំបូលនោះពុំមានអ្វីខូចខាតធ្ងន់ធ្ងរជាងនេះទៀតទេ ព្រោះមុនពេលដុតផ្ទះចោលក៏បានជញ្ជូនអីវ៉ាន់ចេញអស់ខ្លះហើយដែរ ពិសេសរបស់មានតម្លៃ ។ចំពោះប្រវត្តិគ្រួសារនេះវិញ គឺទើបមករស់នៅក្នុងភូមិនេះប្រមាណជិតមួយឆ្នាំប៉ុណ្ណោះ ដែលបុរសរូបនេះមានទីលំនៅនៅខេត្តពោធិ៍សាត់ ហើយមកបានប្រពន្ធនៅភូមិល្វា ឃុំពេជចង្វា ។ ប៉ុន្តែមុនពេលមករស់នៅភូមិពេជចង្វានេះពួកគាត់ពីរនាក់ប្តីប្រពន្ធគឺបានគ្នាយូរហើយរហូតមាន កូនអាយុ៥ឆ្នាំ ទើបតែប្រហែល១ឆ្នាំចុងក្រោយនេះក៏បានមកសង់ផ្ទះនៅដីកេរខាងប្រពន្ធនៅភូមិពេជចង្វានេ ះ ។ លោកនាយប៉ុស្តិ៍បានឱ្យដឹងទៀតថា ក្រោយពេលដុតផ្ទះហើយ បុរសរូបនេះបាននាំកូនរត់គេចបាត់ដែលតាមលោកដឹងប្រហែលគេចទៅខេត្តពោធិ៍សាត់ ។ មុនពេលដុតផ្ទះបុរសរូបនេះបានផឹកស្រាស្រវឹង ហើយត្រឡប់មកផ្ទះវិញជិះកង់ដួលបាត់លុយអស់៣០ម៉ឺនរៀលទៀតក៏ថាផ្ទះនេះចង្រៃទើបដុតចោលតែ ម្តង ៕
