ព្រះមហាក្សត្រ សម្តេចព្រះបរមនាថ នរោត្តម សីហមុនី បានចេញព្រះរាជក្រឹត្យ ត្រាស់បង្គាប់ បង្កើតគណៈកមមាធិការជាតិរៀបចំព្រះរាជពិធីបុណ្យព្រះបរមសព ព្រះករុណា ព្រះបាទ សម្តេចព្រះ នរោត្តម សីហនុ ព្រះមហាវីរក្សត្រ។ គណៈកម្មាធិការនោះ ដឹកនាំដោយសម្តេច ជា ស៊ីមសម្តេច ហេង សំរិន និងសម្តេច ហ៊ុន សែន។
ព្រះរាជក្រឹត្យនេះ ចុះថ្ងៃទី១៦ ខែតុលា ឆ្នាំ២០១២ សមាសភាពគណៈកម្មាធិការជាតិរៀបចំព្រះរាជពិធីបុណ្យព្រះបរមសព សម្តេចព្រះ នរោត្តម សីហនុ មានចំនួន ៤៩ រូប ដែលដឹកនាំដោយសម្តេចទាំងបី និងមានសមាជិកជាឧបនាយករដ្ឋមន្ត្រី ទេសរដ្ឋមន្ត្រី រដ្ឋមន្ត្រី អគ្គស្នងការនគរបាលជាតិ មេប៉េអឹម និងអភិបាលរាជធានី-ខេត្តទាំង ២៤។គណៈកម្មាធិការខាងលើនេះ មានភារកិច្ច ដូចតទៅ៖- រៀបចំព្រះរាជពិធីបុណ្យព្រះបរមសព ឲ្យមានដំណើរការល្អ ឧត្តុង្គឧត្តម សក្តិសមនឹងព្រះគោរមងាររបស់ព្រះអង្គ ជាព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ-សម្របសម្រួលការងាររៀបចំព្រះរាជពិធីបុណ្យព្រះបរមសព នៅថ្នាក់ជាតិ និងថ្នាក់ក្រោមជាតិ-រៀបចំព្រះរាជពិធីទទួល និងដង្ហែព្រះបរមសព-រៀបចំតម្កល់ព្រះបរមសព គោរពព្រះវិញ្ញាណក្ខន្ធ និងកិច្ចការពាក់ព័ន្ធផ្សេងៗ-រៀបចំព្រះរាជពិធីបូជាព្រះបរមសព ឲ្យមានដំណើរការល្អ និងឧត្តុង្គឧត្តមព្រះករុណា ព្រះមហាក្សត្រ ក៏បានកំណត់ថា គណៈកម្មាធិការនេះ អាចបង្កើតអនុគណៈកម្មការ ដើម្បីបំពេញការងារ តាមការចាំបាច់។ សម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា សម្តេចអគ្គមហាពញាចក្រី ហេង សំរិន ប្រធានរដ្ឋសភា និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា ត្រូវទទួលបន្ទុកអនុវត្ត ឲ្យបានសម្រេចនូវព្រះរាជក្រឹត្យនេះ ចាប់ពីថ្ងៃឡាយព្រះហស្ថលេខាតទៅ។ព្រះរាជក្រឹត្យរបស់ព្រះករុណា ព្រះមហាក្សត្រ ត្រូវបានចម្លងចែកចាយ ដែលចុះហត្ថលេខា ដោយលោក សយ សុខា អគ្គលេខាធិកររងទី១ រាជរដ្ឋាភិបាល នៅថ្ងៃទី១៦ ខែតុលា ឆ្នាំ២០១២។ ព្រះរាជក្រឹត្យនោះ ត្រូវបានផ្សព្វផ្សាយដល់អ្នកកាសែត នាព្រឹកថ្ងៃទី១៧ ខែតុលា ឆ្នាំ២០១២។
ដោយ ៖ សូរីយ៉ា