ខេត្តបាត់ដំបង ៖ បុរសអគតិម្នាក់ត្រូវបានសមត្ថកិច្ចមូលដ្ឋានចាប់ខ្លួនក្រោយពីមានបណ្តឹងចោទប្រកាន់ថា ជននេះបានចាប់កូនស្រីចុងរបស់ខ្លួនបង្ខំរំលោភសេពសន្ថវៈរហូតបានសំរេច កាលពីវេលាម៉ោង១១យប់ ថ្ងៃទី១៦ មករា នៅលើផ្ទះរបស់ខ្លួន ស្ថិតនៅឃុំសិរីមានជ័យ ស្រុកសំពៅលូន ។ បុរសអគតិនេះបានសារភាពថា ខ្លួនបានចាប់កូនស្រីចុងរំលោភតាំងពីនាងអាយុ១១ឆ្នាំ រហូតដល់សព្វថ្ងៃនាងអាយុ១៣ឆ្នាំ ហើយសរុបមិនតិចជាង២០លើកទេ ក្រោមការគំរាមរកសម្លាប់ ។លោកមុត នី នាយនគរបាលប៉ុសិ៍្តឃុំសិរីមានជ័យបាននិយាយថា ឪពុកចុងតិរច្ឆាននោះឈ្មោះម៉ាន់ ណាង អាយុ៣៥ឆ្នាំ ប្រពន្ធឈ្មោះសុង រីន អាយុ៣៣ឆ្នាំ (ប្រពន្ធក្រោយ) រីឯកូនស្រីចុងរងគ្រោះអាយុ១៣ឆ្នាំ ។ គ្រួសារក្រីក្រនេះរស់នៅក្នុងឃុំកើតហេតុខាងលើ ។ លោកមុត នី បានបញ្ជាក់ថា បុរសនេះត្រូវបានចាប់ខ្លួនក្រោយពីស្ត្រីជាភរិយាបានមកដាក់ពាក្យបណ្តឹងនៅប៉ុសិ៍្តរដ្ឋបាលរ បស់លោកដោយចោទថា ប្តីរបស់គាត់នេះបានចាប់រំលោភសេពសន្ថវៈលើកូនស្រីគាត់ដែលជាកូនប្តីមុន ។ក្រោយពេលត្រូវចាប់ខ្លួនជនអគតិនេះបានសារភាពថា ខ្លួនពិតជាបានចាប់បង្ខំកូនស្រីចុងរបស់ខ្លួនរំលោភប្រាកដមែន តាំងពីនាងអាយុ១១ឆ្នាំ រហូតមកដល់ពេលនេះនាងមានអាយុ១៣ឆ្នាំហើយ ហើយការចាប់រំលោភនេះបើតាមខ្លួនចាំ គឺមិនតិចជាង២០លើកទេ ។ ជននេះនិយាយថា ខ្លួនតែងគំរាមរកសម្លាប់គ្រួសារនាងចោលមួយពូជនៅពេលខ្លួនចាប់រំលោភនាងម្តងៗ បើនាងនិយាយប្រាប់ម្តាយ ។ ភាគច្រើន គឺចាប់នាងរំលោភទៅលើផ្ទះពេលថ្ងៃ ក្នុងគ្រាដែលម្តាយនាងមិននៅ ។ដោយឡែកអ្នកស្រីសុង រីន ជាម្តាយក្មេងស្រីរងគ្រោះបានប្រាប់សមត្ថកិច្ចថា កន្លងមកគាត់មិនដែលដឹងថា ប្តីគំរក់របស់អ្នកស្រីមានគំនិតថោកទាបបែបនេះទេ ប៉ុន្តែរយៈពេលចុងក្រោយនេះអ្នកស្រីបានដឹងពីអ្នកភូមិដែលលួចខ្សឹបប្រាប់គាត់ តែគាត់មិនហ៊ានសួរនាំ ព្រោះខ្លាចប្តីគំរក់នេះធ្វើបាប ។ លុះនៅយប់ថ្ងៃទី១៦ មករា ពេលគាត់ប្រទះឃើញផ្ទាល់ភ្នែក ទើបព្រឹកឡើងគាត់សំរេចទៅប្តឹងសមត្ថកិច្ចឱ្យចាប់ខ្លួនលោកប្តីតិរច្ឆាននេះតែម្តង ។ ទោះជាបែបណា ជនសង្ស័យត្រូវបានបញ្ជូនមកកាន់ការិយាល័យនគរបាលប្រឆាំងការជួញដូរមនុស្ស និងការពារអនីតិជននៃស្នងការដ្ឋានខេត្តហើយ ហើយកំលាំងជំនាញកំពុងត្រៀមបញ្ជូនបន្តទៅកាន់សាលាដំបូងខេត្តនៅរសៀលថ្ងៃទី១៨ មករា ផងដែរ ៕
