ខេត្តកំពង់ឆ្នាំង ៖ យុវជនពីរនាក់បានស្លាប់នៅនឹងកន្លែង និងម្នាក់ទៀតរងរបួសយ៉ាងធ្ងន់ធ្ងរ បន្ទាប់ពីបើកម៉ូតូយ៉ាងលឿនទៅបុកបង្គោលដែកការពារកាបអុបទិកនៅចំណុចមុខមន្ទីរធម្មការ ខេត្ត កាលពីវេលាម៉ោង៨យប់ថ្ងៃទី១៣ មករា ស្ថិតក្នុងភូមិធម្មយុត្តិ សង្កាត់កំពង់ឆ្នាំង ក្រុងកំពង់ឆ្នាំង ។ តាមប្រភពព័ត៌មានពីមន្ត្រីប៉ូលិសខេត្តបាននិយាយថា ជនរងគ្រោះទាំង៣នាក់ មាន១-ឈ្មោះមីត សុខា អាយុ២២ឆ្នាំ ជាសិស្ស មានទីលំនៅក្នុងភូមិម៉ុងបារាំង សង្កាត់ប្អេរ ឈ្មោះនេះបានស្លាប់ដោយបែកក្បាល និងធ្លាយខួរចេញក្រៅ ២-ឈ្មោះអួន ចិត្រា អាយុ២១ឆ្នាំ នៅភូមិត្រពាំងបី សង្កាត់ផ្សារឆ្នាំង ឈ្មោះនេះបានស្លាប់ដោយធ្លាយខួរដូចគ្នានៅនឹងកន្លែង ៣-ឈ្មោះកែវ វាសនា អាយុ២២ឆ្នាំ របួសធ្ងន់ ។ ប្រភពដដែលបានបញ្ជាក់ថា ពួកគេទាំង៣នាក់ជិះម៉ូតូម៉ាកស្ទេប ពណ៌ស ពាក់ស្លាកលេខ ភ្នំពេញ 1AG-4386 មកពីទិសខាងលិច ដោយកាត់ក្រោមដើមស្វាយមុខសាលាខេត្តយ៉ាងលឿន លុះមកដល់មុខមន្ទីរធម្មការនិងសាសនាខេត្ត ជាផ្លូវកោងបត់ឆ្វេង ដោយបត់មិនរួចក៏ជ្រុលទៅបុករបាំងដែកដែលគេធ្វើដាក់ការពារបង្គោលកាបអុបទិច បណ្តាលឱ្យបោកក្បាលធ្លាយខួរស្លាប់២នាក់នៅនឹងកន្លែង ចំណែកអ្នកជិះក្រោយគេរងរបួសយ៉ាងធ្ងន់ធ្ងរ ។ ប៉ូលិសបានបញ្ជាក់ថា គឺឈ្មោះមីត សុខា ជាម្ចាស់ម៉ូតូ ជាអ្នកបើកបរក្នុងហេតុការណ៍នោះ ប៉ុន្តែតាមប្រភពក្រៅផ្លូវការពីមិត្តភក្តិដែលជិតស្និទ្ធនឹងជនរងគ្រោះទាំង៣នាក ់និយាយថា នៅក្នុងហេតុការណ៍នោះ ឈ្មោះអួន ចិត្រា ជាអ្នកបើកបរ ព្រោះម្ចាស់ម៉ូតូមានភ្នែកមីញ៉ូប មើលផ្លូវពុំសូវច្បាស់ ទើបឱ្យមិត្តភក្តិជាអ្នកបើកវិញ ។ទោះយ៉ាងណា ជនរងគ្រោះ២នាក់បានស្លាប់យ៉ាងអាណោចអាធ័មក្នុងហេតុការណ៍គ្រោះថ្នាក់តែមួយប៉ប្រិចភ្នែកប៉ ុណ្ណោះ និងម្នាក់ទៀតបានរងរបួសយ៉ាងធ្ងន់ធ្ងរ ។ លោកអៀរ ប៊ុនធឿន នាយប៉ូលិសចរាចរជើងគោក បានបញ្ជាក់ថា ឈ្មោះមីត សុខា ជាម្ចាស់ម៉ូតូគឺជាអ្នកបើកបរក្នុងហេតុការណ៍គ្រោះថ្នាក់ដ៏រន្ធត់នេះ ៕
