រាជធានីភ្នំពេញ ៖ រថយន្តកាមរីបាឡែនពណ៌ស្ករ បានបុកម៉ូតូ៦គ្រឿងជាបន្តបន្ទាប់មើលទៅគួរឱ្យតក់ស្លុតលើកំណាត់ផ្លូវព្រះមុនីរ៉េតត្រង់ ចំណុចមុខរោងចក្រក្រឡុកស៊ីម៉ង់ត៍ ស្ថិតក្នុងសង្កាត់ស្ទឹងមានជ័យ ខណ្ឌមានជ័យ កាលពីវេលាម៉ោង១០និង៣០នាទីព្រឹក ថ្ងៃទី១៦ មករា ២០១១ បង្កឱ្យមានការភ្ញាក់ផ្អើល និងកកស្ទះចរាចរណ៍ណែនណាន់តាន់តាប់ ។ ហេតុការណ៍គួរឱ្យញាក់សាច់ខាងលើនេះ គេឃើញរថយន្តបង្កហេតុព្យាយាមបើករត់គេចពីកន្លែងកើតហេតុទាំងកំរោល ប៉ុន្តែទៅមុខលែងរួចដោយសារម៉ូតូទាំង៦គ្រឿង កល់ជាប់ពីក្រោមតួរថយន្ត ។ អ្នកបើកបររថយន្តបង្កហេតុខាងលើឈ្មោះរុន កន ហៅពេជ្រ ភេទប្រុស អាយុ២៨ឆ្នាំ មិនហ៊ានបើកទ្វារចុះចេញពីក្នុងរថយន្តឡើយ ព្រោះខ្លាចហ្វូងមនុស្សជាច្រើននាក់ ដែលចោមរោមរថយន្តឡើងជិតឈឹងនោះវាយធ្វើបាប បើទោះជាមានសមត្ថកិច្ចទៅជួយអន្តរាគមន៍ក៏ដោយ ។ផ្តើមចេញពីម្ចាស់រថយន្តដែលមានចរិតក្រអើតក្រទមមិនហ៊ានចុះពីក្នុងរថយន្ត ក្រុមហ្វូងមនុស្សចំរុះបានយកដុំថ្ម និងឧបករណ៍រឹងផ្សេងៗ វាយបំបែកកញ្ចក់រថយន្តបែកខ្ទេច ទើបម្ចាស់រថយន្តលូនចេញមកក្រៅ ហើយត្រូវបានសមត្ថកិច្ចកងរាជអាវុធរាជធានីភ្នំពេញ សហការជាមួយកងរាជអាវុធហត្ថខណ្ឌមានជ័យ និងនគរបាលមូលដ្ឋានឃាត់ខ្លួននាំយកទៅកាន់ទីបញ្ជាការកងរាជអាវុធរាជធានីភ្នំពេញ ដើម្បីការពារសុវត្ថិភាពពីកណ្តាប់ដៃមនុស្សជាច្រើននាក់ដែលខឹងសម្បាចំពោះការបើកបរ រថយន្តបុកគេ បុកឯង គ្មានដឹងទិសតំបន់ ។ តាមការឱ្យដឹងពីសមត្ថកិច្ចថា ឈ្មោះរុន កន នេះបានបើករថយន្តបុករថយន្ត និងម៉ូតូអ្នកដំណើរនៅកន្លែងផ្សេងៗ ជាច្រើនគ្រឿងរួចមកហើយ និងព្យាយាមបើករត់រហូតមកបុកម៉ូតូទាំង៦គ្រឿងខាងលើថែមទៀត ទើបត្រូវឃាត់ខ្លួនតែម្តង ៕
