រាជធានីភ្នំពេញ ៖ គ្រោះថ្នាក់ចរាចរណ៍បុកបំផ្លិចបំផ្លាញទ្រព្យសម្បត្តិសាធារណៈក្នុងរាជធានីភ្នំពេញបានកើតឡើងច ំនួន១២៣លើក កាលពីឆ្នាំ២០១០ កន្លងទៅនេះ ។ នេះបើតាមប្រសាសន៍លោកវរសេនីយ៍ត្រីប៉ែន ឃុន នាយរងការិយាល័យនគរបាលចរាចរណ៍ផ្លូវគោកនៃស្នងការនគរបាលរាជធានីភ្នំពេញ បានឱ្យដឹងកាលពីព្រឹកថ្ងៃទី៣ មករា ២០១១ ក្នុងពិធីបង្ហាញមុខម្ចាស់រថយន្តស្ទូចដែលបានព្យាយាមស្ទូចរថយន្តម៉ាកហាយឡិនឌ័រ ពណ៌ខ្មៅ ដែលបើកបុកបង្គោលភ្លើង ដាច់ត្រឹមគល់ ហើយជ្រុលធ្លាក់ប្រឡាយទឹក។លោកវរសេនីយ៍ត្រី ប៉ែន ឃុន នាយរងការិយាល័យនគរបាលចរាចរណ៍ផ្លូវគោក នៃស្នងការនគរបាលរាជធានីភ្នំពេញ បានឱ្យដឹងទៀតថា នៅក្នុងឆ្នាំ២០១០ កន្លងទៅនេះមានគ្រោះថ្នាក់ចរាចរណ៍បុកបំផ្លិចបំផ្លាញទ្រព្យសម្បត្តិសាធារណៈនៅក្នុងរាជធាន ីភ្នំពេញ បានកើតឡើងចំនួន១២៣លើក ក្នុងនោះមានគ្រោះថ្នាក់ចរាចរណ៍បើករថយន្តបុកបង្គោលភ្លើងចំនួន៤០លើក បុករបាំងចែកផ្លូវចំនួន៦០លើក បុកដើមឈើចំនួន១៣លើក បុកបង្កាន់ដៃស្ពានចំនួន៧លើក បុកស្លាកសញ្ញាចំនួន២លើក និងបុកបង្គោលភ្លើងស្តុបចំនួន១លើក ។ នៅក្នុងគ្រោះថ្នាក់ចរាចរណ៍ទាំងនោះសមត្ថកិច្ចបានស្ទូចយករថយន្តទៅដាក់នៅសាលារាជធានីភ្ នំពេញ ចំនួន៧២លើក និង៥១លើកទៀត សមត្ថកិច្ចស្ទូចយកទៅកាន់ការិយាល័យនគរបាលចរាចរណ៍ដើម្បីធ្វើការដោះស្រាយ ហើយក៏មានគ្រោះថ្នាក់មួយចំនួនទៀតបានជ្រុលទៅប៉ះយានយន្តផ្សេងៗ និងខ្លះទៀតជារថយន្តធំ មិនអាចយកទៅទុកនៅសាលារាជធានីភ្នំពេញបាន ។ លោកវរសេនីយ៍ត្រី ប៉ែន ឃុន បានឱ្យដឹងទៀតថា អ្នកបើកបរបង្កគ្រោះថ្នាក់បុកបំផ្លិចបំផ្លាញទ្រព្យសម្បត្តិសាធារណៈទាំងនោះភាគច្រើនគឺ អ្នកបើកបរស្រវឹងជោគជាំ ហើយបើកបុកនៅពេលយប់ជ្រៅ នេះគឺពុំគិតពីគ្រោះថ្នាក់មួយចំនួនទៀត ដែលអ្នកបើកបរបានព្យាយាមបើករត់ និងហៅរថយន្តមកស្ទូចយកទៅបាត់នោះទេ ៕
