រាជធានីភ្នំពេញ ៖ សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីបានមានប្រសាសន៍ដាក់បន្ទុកឆ្លើយតបខ្លាំងៗថា ចំពោះពលរដ្ឋថៃ៧នាក់ ដែលកំពុងជាប់ឃុំឃាំងបណ្តោះអាសន្ននៅពន្ធនាគារព្រៃ.ស ពីបទចូលក្នុងទឹកដីកម្ពុជាខុសច្បាប់នោះនឹងមិនត្រូវមានការលើកលែងណាមួយទេ បើទោះជាមានការធ្វើអន្តរាគមន៍ឱ្យមានការដោះលែងយ៉ាងណាក៏ដោយ ព្រោះនេះជាច្បាប់...ច្បាប់គឺច្បាប់ ។ សម្តេចតេជោហ៊ុន សែន ប្រតិកម្មចំពោះទិដ្ឋភាពផ្សេងៗទាក់ទងនឹងជនជាតិថៃ៧នាក់ជាថ្មីម្តងទៀតនេះ ធ្វើឡើងកាលពីព្រឹកថ្ងៃទី១០ មករា ២០១១ នៅវិទ្យាស្ថានជាតិអប់រំ ខណៈអញ្ជើញជាអធិបតីភាពក្នុងពិធីប្រគល់សញ្ញាបត្រដល់និស្សិតនៃវិទ្យាស្ថានវណ្ណដា ដោយមានការចូលរួមពីមន្ត្រីជាន់ខ្ពស់ជាច្រើននាក់...។ សម្តេចតេជោនាយករដ្ឋមន្ត្រីបានលើកឡើងថា តាមដំណឹងលេចឮមកថា មានគណបក្សភឿថា និងលោកថាក់ស៊ីន ស៊ីណាវ៉ាត្រា អតីតនាយករដ្ឋមន្ត្រីថៃ ចង់ធ្វើអន្តរាគមន៍...គឺមិនអាចទៅរួចទេ វាមិនមែនជារឿងរបស់រដ្ឋាភិបាលឡើយ ហើយឥឡូវនេះតុលាការកំពុងដំណើរការទៅតាមនីតិវិធី...វាជារឿងរបស់តុលាការ គ្មាននរណាម្នាក់ទៅបង្គាប់បញ្ជាតុលាការបានទេ ។សម្តេចតេជោនាយករដ្ឋមន្ត្រីបានសង្កត់ធ្ងន់ថា ភាគីណាក៏ដោយ ក៏មិនអាចធានា ឬអន្តរាគមន៍បានដែរ...នៅស្ងៀមជាជាងស្រដី ស៊ីចេកខ្ចីជាជាងមាត់ទទេ...អង្គតុលាការគឺជាស្ថាប័នឯករាជ្យ យើងមិនអាចទៅបង្គាប់បញ្ជាតុលាការម្តងថា ធ្វើអញ្ចេះ ម្តងថាធ្វើអញ្ចុះបានទេ ដូច្នេះអ្នកឯងលុកលុយប្រទេសកម្ពុជាខុសច្បាប់ គឺត្រូវឱ្យច្បាប់ចាត់ការ...នេះគឺជារឿងរបស់តុលាការ ។គួររំលឹកថា ជនជាតិសៀម៧នាក់ មានសមាជិកសភាគណបក្សប្រជាធិបតេយ្យកំពុងកាន់អំណាចរបស់លោកអាប់ភីស៊ីត វ៉េចាជីវ៉ា ម្នាក់ផងនោះត្រូវនាំខ្លួនត្រឡប់ទៅឃុំឃាំងនៅគុកព្រៃ.សវិញបន្ទាប់ពីឡើងតុលាការកម្ពុជាសំ រាប់ចៅក្រមសាកសួរលើកដំបូងកាលពីព្រឹកថ្ងៃទី៦ មករា រហូតដល់យប់ ពីបទចូលលុកលុយទឹកដីកម្ពុជាខុសច្បាប់នោះ ពេលនេះស្ថិតក្នុងស្ថានភាពធ្ងន់ធ្ងរថែមទៀត ខណៈការឃុំខ្លួនពួកគេនឹងត្រូវអូសបន្លាយគ្មានពេលកំណត់ ឯការស្នើសុំអនុញ្ញាតនៅក្រៅឃុំដោយបង់ប្រាក់ធានានោះហាក់ដូចជាគ្មានសង្ឃឹមទាល់ត ែសោះ។ ការឆ្លងចូលទឹកដីកម្ពុជាដោយចេតនា ឬអចេតនាក៏ដោយ មិនមែនជនជាតិថៃទាំង៧នាក់នោះមិនដឹងថា ខ្សែបន្ទាត់ព្រំដែននៅត្រង់ណានោះទេ ព្រោះថា មានបង្គោលសីមាលេខ៤៦ និង៤៧ បង្ហាញយ៉ាងជ្រងរៗ ហេតុអ្វីពួកគេមិនប្រុងប្រយ័ត្ន? នេះគឺមកពីពួកគេប្រព្រឹត្តទាំងបំពានមកលើទឹកដីកម្ពុជាយ៉ាងគឃ្លើនតែម្តង ។គេបានកត់សំគាល់ថា នៅចំពោះមុខសមត្ថកិច្ចសួរចម្លើយ ជនជាតិសៀមទាំង៧នាក់នេះបង្ហាញនូវអាកប្បកិរិយាមួយ ដែលខ្មែរយើងហៅថា «ឈ្លើយណាស់» និយាយស្តីគ្មានការគួរសមក្នុងនាមជាមនុស្ស មានសុជីវធម៌សោះ ។ ដំណើរការនាំខ្លួនជនជាប់ចោទជនជាតិសៀមទាំង៧នាក់នេះ ក៏មានការតាមដានយ៉ាងដិតដល់ពីឯកអគ្គរាជទូតថៃប្រចាំប្រទេសកម្ពុជាផងដែរ ។ ភាពខុសប្លែកគ្នារវាងចំណាត់ការរបស់តុលាការថៃ និងកម្ពុជាត្រូវបានគេមើលឃើញថា ជនជាប់ចោទកម្ពុជា ដែលតុលាការថៃហៅមកសាកសួរ ឬបើកសវនាការគឺសុទ្ធតែដាក់ខ្នោះដៃ និងច្រវាក់ជើង...ចំណែកជនជាប់ចោទថៃវិញ ពេលតុលាការកម្ពុជាហៅមកសាកសួរ ឬបើកសវនាការ គឺដើរបង់បោយឱ្យរំភើយ គ្មានដាក់ខ្នោះច្រវាក់អ្វីទេ... ដូចយើងឃើញរូបភាពនេះជាក់ស្តែងហើយ ។សូមបញ្ជាក់ថា ក្រុមជ្រុលនិយមអាវលឿង សៀម៧នាក់នេះមានស្រី២ ប្រុស៥ ត្រូវបានកំលាំងការពារព្រំដែនជួរមុខចាប់ឃាត់ខ្លួន ខណៈពួកគេចូលលុកលុយក្នុងទឹកដីកម្ពុជាដោយខុសច្បាប់កាលពីវេលាម៉ោង១០និង៣០នាទ ីព្រឹកថ្ងៃទី២៩ ធ្នូ ២០១០ ស្ថិតក្នុងភូមិជោគជ័យ ឃុំអូរបីជាន់ ស្រុកអូរជ្រៅ ខេត្តបន្ទាយមានជ័យ៕