រាជធានីភ្នំពេញ ៖ បុរសពីរនាក់ជាជាងភ្លើង និងជាងម៉ាស៊ីន ព្រមទាំងស្ត្រីម្នាក់ទៀតជាកម្មការិនីរោងចក្រកាត់ដេរបានរួមគំនិតគ្នាគាស់បន្ទប់គណនេយ ្យ និងគាស់ទូដែកនៅក្នុងបន្ទប់ថៅកែដើម្បីលួចយកលុយ ប៉ុន្តែត្រូវសន្តិសុខយាមរោងចក្រសហការជាមួយសមត្ថកិច្ចប៉ូលិសមូលដ្ឋានចាប់ខ្លួនបានទាំង អស់គ្នា។ ក្រោយពេលវែកមុខទើបដឹងថា ទូដែកនោះជាទូដែលដាក់បញ្ឆោតប៉ុណ្ណោះគ្មានលុយនៅក្នុងនោះទេ។ ហេតុការណ៍នោះកើតឡើងកាលពីវេលាម៉ោង១២ និង៥០នាទីអធ្រាត្រ ថ្ងៃទី៧ ខែមករា ឆ្នាំ២០១០ នៅក្នុងរោងចក្រកាត់ដេរយីហោវីនសុលស្ថិតនៅក្នុងភូមិថ្មី សង្កាត់ដង្កោ ខណ្ឌដង្កោ រាជធានីភ្នំពេញ។ ក្រុមជនសង្ស័យ ១-ឈ្មោះម៉េត ដារ៉ា ភេទប្រុស អាយុ២៨ឆ្នាំ ជាជាងភ្លើង មានស្រុកកំណើតក្នុងភូមិដងគោម ឃុំកំពង់អុស ស្រុកពញាឮ ខេត្តកណ្តាល សព្វថ្ងៃស្នាក់នៅផ្ទះជួលក្នុងភូមិត្រពាំងថ្លឹង សង្កាត់ចោមចៅ ២-ឈ្មោះម៉ាន់ អឿន ភេទប្រុស អាយុ២៦ឆ្នាំ ជាជាងម៉ាស៊ីន មានស្រុកកំណើតនៅភូមិកុកតារា ឃុំរវៀង ស្រុកសំរោង ខេត្តតាកែវ សព្វថ្ងៃស្នាក់នៅផ្ទះជួលក្នុងភូមិថ្មី សង្កាត់ដង្កោ ខណ្ឌដង្កោ និង៣-ឈ្មោះសារី វីដា ភេទស្រី អាយុ២៦ឆ្នាំ ជាកម្មការិនីរោងចក្រនោះស្នាក់នៅផ្ទះជួលក្នុងភូមិសំបួរ សង្កាត់ដង្កោ ខណ្ឌដង្កោ រាជធានីភ្នំពេញ។អ្នកតំណាងថៅកែរោងចក្រចេញមុខប្តឹងជនទាំង៣នាក់នោះ ឈ្មោះគង់ ដាវីត ភេទស្រី អាយុ២៧ឆ្នាំ ជាបុគ្គលិករដ្ឋបាល រស់នៅផ្ទះលេខ២៨៩ ផ្លូវលេខ១១៩ ភូមិ៥ សង្កាត់បឹងកេងកង២ ខណ្ឌចំការមន។ មន្ត្រីប៉ូលិសខណ្ឌដង្កោឱ្យដឹងថា ពេលថៅកែរោងចក្រចេញទៅចូលរួមក្នុងកម្មវិធីមួយនៅខាងក្រៅ ឯបុគ្គលិករដ្ឋបាល ព្រមទាំងកម្មករកម្មការិនីរោងចក្រទាំងអស់ដល់ម៉ោងសំរាក ចេញទៅផ្ទះអស់ ក្រុមជនសង្ស័យនាំគ្នាចូលគាស់ទ្វារបន្ទប់បុគ្គលិករដ្ឋបាលរើកកាយយកលុយបានចំនួន៥០០ ដុល្លារ និង១០.០០០រៀល។ បន្ទាប់មកពួកគេគាស់ទ្វារបន្ទប់ថៅកែរោងចក្រចូលទៅដាប់ទូដែករកលុយបន្តទៀត។ ទូដែកនោះរឹងមាំណាស់ធ្វើឱ្យជនសង្ស័យខកចិត្ត ព្រោះដាប់អត់របើក។ ទោះបីជាយ៉ាងណាក្តី នៅក្នុងទូដែកនោះគ្មានលុយសូម្បី១រៀលឡើយ គឺថៅកែគ្រាន់តែដាក់បញ្ឆោតប៉ុណ្ណោះ ឯលុយទុកនៅក្នុងទូដែកផ្សេង។ប្រភពដដែលបន្តទៀតថា ក្រោយពេលដាប់ទូមិនបានសំរេចជនសង្ស័យ២នាក់ចាកចេញទៅទាំងខកចិត្តដោយទុកស្ត្រីម្នាក់ជាបក ្សពួកនៅពួន ក្នុងបន្ទប់រដ្ឋបាលរង់ចាំបន្លំចូលធ្វើការនៅវេលាព្រឹកឡើង ព្រោះមិនអាចចេញទៅទាំងយប់បានទេ ខ្លាចក្រុមសន្តិសុខសង្ស័យ។ ក្រោយពេលកើតហេតុប្រមាណជាង១ម៉ោង ថៅកែរោងចក្រទៅដល់បន្ទប់របស់ខ្លួនវិញ ហើយឃើញស្នាមគាស់ និងរើកកាយ ឯទូដែកមានស្នាមគាស់។ ថៅកែបានហៅសន្តិសុខឱ្យទៅពិនិត្យមើលគ្រប់កន្លែង ហើយប្រទះឃើញស្ត្រីសង្ស័យម្នាក់នោះនៅក្នុងបន្ទប់រដ្ឋបាលក៏ប្តឹងសមត្ថកិច្ចឱ្យចាប់ខ្លួន តែម្តង។ប្រភពព័ត៌មានបន្តទៀតថា ស្ត្រីឈ្មោះសារី វីដា បាននិយាយថា នាងត្រូវឈ្មោះម៉េត ដារ៉ា និងឈ្មោះម៉ាន់ អឿន គំរាមរកសំលាប់ចោលឱ្យចូលរួមធ្វើសកម្មភាពជាមួយពួកគេ។ ជនទាំងពីរនាក់នោះបានគំរាមនាងឱ្យចូលរួមកាលពីល្ងាចថ្ងៃទី១ ខែមករា តែនាងមិនព្រមត្រូវពួកគេគំរាមសំលាប់ចោល។ លុះដល់យប់កើតហេតុពួកគេគំរាមនាងតាមទូរស័ព្ទម្តងទៀត ហើយដោយខ្លាចស្លាប់នាងក៏យល់ព្រម។ ជនទាំង២នាក់នោះប្រគល់កូនសោឱ្យនាងចាក់ឱ្យពួកគេចូលតាមទ្វារក្រោយដើម្បីធ្វើសកម្មភាព ។ ប៉ូលិសនិយាយថា ក្រោយពេលមានចំលើយសារភាពពីស្ត្រីរូបនោះទើបសមត្ថកិច្ចឈានទៅចាប់ខ្លួនជនសង្ស័យពីរនាក់ ទៀត និងដកហូតបានឧបករណ៍ធ្វើសកម្មភាពមួយចំនួនកសាងសំណុំរឿងបញ្ជូនទៅតុលាការ៕
