ខេត្តប៉ៃលិន ៖ លំនៅឋានចំនួន៥ខ្នង ត្រូវព្រះអគ្គីឆាបឆេះអស់គ្មានសល់កាលពីវេលាម៉ោង១ និង៥០នាទីរសៀលថ្ងៃទី៥ មករា នៅភូមិប៉ាហ៊ីខាងត្បូង សង្កាត់ប៉ៃលិន ក្រុងប៉ៃលិន ។ សមត្ថកិច្ចនិងសាក្សីជាច្រើនសង្ស័យថា អគ្គីភ័យបង្កឡើងដោយម្ចាស់ផ្ទះមួយបើកចង្ក្រានហ្គាសចោល ។ លោកអ៊ុំ សុផាន ស្នងការរងខេត្តប៉ៃលិនបានថ្លែងថា ភ្លើងឆាបឆេះដំបូងពីផ្ទះមួយរបស់ឈ្មោះណុល វាសនា ភេទស្រី អាយុ៣៣ឆ្នាំ នៅផ្សារប៉ាហ៊ី ។ សាក្សីជាច្រើនបានឃើញភ្លើងឆាបឆេះចេញពីចង្ក្រានហ្គាសនៅផ្ទះស្ត្រីឈ្មោះវាសនា ភ្លេចបិទ ។ ទោះជាយ៉ាងណាក្តី ម្ចាស់ផ្ទះនេះបានព្យាយាមបដិសេធ ហើយអះអាងថា គឺ បណ្តាលមកពីការទុស្សេខ្សែភ្លើងនៅក្នុងផ្ទះទៅវិញ ។បើតាមសាក្សីដែលឃើញផ្ទាល់ភ្នែកប្រាប់កោះសន្តិភាពពីកន្លែងកើតហេតុថា មនុស្សជាច្រើនបានឃើញអណ្តាតភ្លើងយ៉ាងសន្ធោសន្ធៅចេញពីចង្ក្រានហ្គាសក្នុងផ្ទះរបស់ស្ត្រីឈ ្មោះវាសនា ក្នុងគ្រាម្ចាស់ផ្ទះកំពុងសំរាន្តលក់ពេលថ្ងៃ ។ ម្ចាស់ផ្ទះបានដឹងនៅពេលអ្នកភូមិស្រែកផ្អើលឆោឡោឡើង ។ ទោះបីជាបែបណាក្តី ម្ចាស់ផ្ទះឈ្មោះណុល វាសនា ប្រាប់សមត្ថកិច្ចថា អគ្គីភ័យមិនបណ្តាលមកពីភ្លើងចង្ក្រានហ្គាសរបស់គាត់នោះទេ គឺបណ្តាលមកពីទុស្សេខ្សែភ្លើងក្នុងផ្ទះគាត់។លោកអ៊ុំ សុផាន ស្នងការរងខេត្តប៉ៃលិនបញ្ជាក់ប្រាប់តាមទូរស័ព្ទថា លោកបានបញ្ជាឱ្យសមត្ថកិច្ចបញ្ចេញរថយន្តពន្លត់អគ្គីភ័យចំនួន២គ្រឿងទៅជួយពន្លត់ភ្លើង ។ ភ្លើងបានឆាបឆេះយ៉ាងគំហុកក្នុងរយៈខ្លី ប៉ុន្តែសំណាងល្អ រថយន្តពន្លត់អគ្គីភ័យបានទៅជួយទប់ស្កាត់កុំឱ្យភ្លើងឆេះរាលដាលទៅផ្ទះផ្សេងៗទៀត ។ លោកស្នងការរងបញ្ជាក់ទៀតថា លំនៅឋានធ្វើពីឈើចំនួន៥ខ្នងបានក្លាយជាផេះ ហើយទ្រព្យសម្បត្តិតិចតួចណាស់ដែលម្ចាស់ផ្ទះរំដោះបាន ប៉ុន្តែមិនបណ្តាលឱ្យគ្រោះថ្នាក់ដល់មនុស្សទេ ។ សមត្ថកិច្ចកំពុងធ្វើកំណត់ហេតុអំពីការខូចខាតនេះហើយ ៕
