ខេត្តព្រះវិហារ ៖ បុរសជនជាតិខ្មែរចំនួន៨នាក់ ត្រូវបានអាជ្ញាធរខ្មែរឃាត់ខ្លួនយកមកធ្វើការអប់រំណែនាំ ខណៈពួកគេទាំង៨នាក់នោះបានព្យាយាមឆ្លងដែនទៅស៊ីឈ្នួលកាប់ឈើគ្រញូងនៅក្នុងទឹកដីថៃ កាលពីវេលាម៉ោង៧និង៤៥នាទីយប់ថ្ងៃចន្ទ ទី១០ មករា កន្លងមកនេះ ស្ថិតនៅត្រង់ចំណុចកំពស់៧៦៦ម៉ែត្រ លើដងភ្នំដងរែក ខាងកើតច្រកអានសេះ ក្នុងភូមិជាំក្សាន្ត ស្រុកជាំក្សាន្ត ។ បើតាមអ្នកយកព័ត៌មានកោះសន្តិភាពប្រចាំខេត្តព្រះវិហារបានឱ្យដឹងទៀតថា ប្រជាពលរដ្ឋខ្មែរទាំង៨នាក់នោះ មានទីលំនៅក្នុងភូមិ-ឃុំខាងលើ ហើយបច្ចុប្បន្នត្រូវបានអាជ្ញាធរអនុញ្ញាតឱ្យវិលត្រឡប់ទៅកាន់លំនៅឋានវិញអស់ហើយ បន្ទាប់ពីបានបញ្ជូនទៅកាន់អធិការដ្ឋាននគរបាលស្រុកជាំក្សាន្ត ដើម្បីសាកសួរព័ត៌មាន និងធ្វើការអប់រំណែនាំនោះរួចមក ។ ក្រោយពីធ្វើការសាកសួរព័ត៌មានពីប្រជាពលរដ្ឋខ្មែរទាំង៨នាក់នោះ សមត្ថកិច្ចកំពុងបើកការស៊ើបអង្កតបន្ត ដើម្បីឈានទៅឃាត់ និងចាប់ខ្លួនថៅកែអារឈើជនជាតិខ្មែរ ដែលល្បួងប្រជាពលរដ្ឋខាងលើឱ្យទៅស៊ីឈ្នួលកាប់ឈើគ្រញូង។គួរបញ្ជាក់ថា ការឃាត់ខ្លួនប្រជាពលរដ្ឋខ្មែរទាំង៨នាក់យកមកធ្វើការអប់រំពីសំណាក់អាជ្ញាធរខ្មែរនាពេ លនេះ ធ្វើឡើងបន្ទាប់ពីមានប្រជាពលរដ្ឋខ្មែរជាច្រើននាក់ត្រូវបានទាហានព្រំដែនថៃបាញ់សំលាប់ជា បន្តបន្ទាប់ ខណៈពេលកំពុងឆ្លងដែនចូលទៅកាប់ឈើប្រណីតក្នុងទឹកដីថៃ ។ ជាពិសេសការឃាត់ខ្លួននេះផងដែរ ធ្វើឡើងបន្ទាប់ពីប្រជាពលរដ្ឋខ្មែរចំនួន២នាក់ត្រូវបានទាហានព្រំដែនថៃចាប់ខ្លួននៅចំណុច ទីតាំងខាងលើ និងបានបញ្ជូនទៅតុលាការខេត្តអ៊ូប៊ុន ដើម្បីកាត់ទោសពីបទឆ្លងដែនចូលទឹកដីថៃ ដោយខុសច្បាប់កាលពីរសៀលថ្ងៃទី២៩ ធ្នូ ឆ្នាំ២០១០ កន្លងមកនេះ ៕
