រាជធានីភ្នំពេញ ៖ ព្រឹកថ្ងៃទី៤ មករា ឆ្នាំ២០១១ នៅក្នុងសាលសន្និសីទចតុមុខមានប្រារព្ធពិធីបិទអនុសំវច្ឆរមហាសន្និបាតមន្ត្រីសង្ឃលើកទី១ ៩ ក្រោមអធិបតីភាពលោកជំទាវបណ្ឌិតម៉ែន សំអន ឧបនាយករដ្ឋមន្ត្រីប្រចាំការតំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ ចូលរួមក្នុងឱកាសនោះ មានសម្តេចព្រះអគ្គមហាសង្ឃរាជាធិបតីទេព វង្ស សម្តេចព្រះអគ្គមហាសង្ឃរាជគណៈមហានិកាយនៃព្រះរាជាណាចក្រកម្ពុជា សម្តេចព្រះអភិសិរីសុគន្ធាមហាសង្ឃរាជាធិបតីបួរ គ្រី សម្តេចព្រះមហាសង្ឃរាជគណៈធម្មយុត្តិកនិកាយនៃព្រះរាជាណាចក្រកម្ពុជា សម្តេចព្រះមហាសុមេធាធិបតី នន្ទ ង៉ែត សម្តេចព្រះសង្ឃនាយកនៃព្រះរាជាណាចក្រកម្ពុជា ព្រមទាំងរាជាគណៈសង្ឃ និងព្រះសង្ឃដែលនិមន្តមកពីវត្តនានាទាំង២៤រាជធានី-ខេត្ត អស់លោក លោកជំទាវជាថ្នាក់ដឹកនាំជាន់ខ្ពស់ជាច្រើនរូប ព្រមទាំងមន្ត្រីរាជការចូលរួមយ៉ាងច្រើនកុះករ។លោកមិន ឃិន រដ្ឋមន្ត្រីក្រសួងធម្មការ និងសាសនាបានធ្វើរបាយការណ៍បូកសរុបដោយលោកបានគូសបញ្ជាក់អំពីការបិទអនុសំវច្ឆរមហាសន្និ បាតមន្ត្រីសង្ឃលើកទី១៩ ដែលបានប្រព្រឹត្តទៅក្នុងរយៈពេល២ថ្ងៃ គឺថ្ងៃទី៣ និងទី៤ មករា ២០១១ ដែលប្រារព្ធឡើងក្រោមអធិបតីភាពសម្តេចអគ្គមហាធម្មពោធិសាល ជា ស៊ឹម ប្រធានព្រឹទ្ធសភា និងបានបិទទៅវិញក្រោមអធិបតីភាពលោកជំទាវបណ្ឌិត ម៉ែន សំអន ឧបនាយករដ្ឋមន្ត្រីប្រចាំការ តំណាងដ៏ខ្ពង់ខ្ពស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ដោយមានសមាជិកចូលរួមប្រមាណ៨៥០អង្គ/នាក់ ។ ក្នុងនោះមានសម្តេចព្រះរាជាគណៈ ព្រះមេគណ ព្រះអនុគណ ព្រះចៅអធិការ ថ្នាក់ដឹកនាំក្រសួង ស្ថាប័នពាក់ព័ន្ធ អភិបាល អភិបាលរងខេត្ត-រាជធានី ប្រធាន អនុប្រធានមន្ទីរធម្មការខេត្ត-រាជធានី និងមន្ត្រីរាជការគ្រប់ជាន់ថ្នាក់របស់ក្រសួងធម្មការ និងសាសនា ដើម្បីបើកកិច្ចពិភាក្សាផ្លាស់ប្តូរយោបល់ និងការលើកឡើងនូវទស្សនៈស្ថាបនាដល់អង្គអនុសំវច្ឆរមហាសន្និបាតមន្ត្រីសង្ឃទាំងមូល។លោក រដ្ឋមន្ត្រីបានបន្តទៀតថា ក្រោយថ្ងៃរំដោះ៧មករា ១៩៧៩ វិស័យព្រះពុទ្ធសាសនា រួមនឹងសាសនាផ្សេងៗបានរស់ឡើងវិញ។ ព្រះពុទ្ធសាសនាបានចាប់ផ្តើមដំបូងមានព្រះសង្ឃតែ៧អង្គប៉ុណ្ណោះ រហូតដល់បច្ចុប្បន្នមានព្រះសង្ឃសរុបចំនួន៥៦.៣០១អង្គ ក្នុងនោះគណៈមហានិកាយមាន៥៤.៨៦១អង្គ និងគណៈធម្មយុត្តិកនិកាយមាន១.៤៤៣អង្គ និងវត្តអារាមសរុបមានចំនួន៤.៤៦៦វត្ត ។ ដោយឡែកវិស័យពុទ្ធិកសិក្សា គឺបានបណ្តុះបណ្តាលព្រះសង្ឃតាំងពីថ្នាក់ធម្មវិន័យថ្នាក់ពុទ្ធិកបឋមសិក្សា រហូតដល់ថ្នាក់ឧត្តមសិក្សា ដែលមានសមណសិស្សពីថ្នាក់ធម្មវិន័យថ្នាក់ត្រី-ទោ-ឯក ចំនួន៧៨៣សាលា មាន សមណសិស្សចំនួន១១.២១៥អង្គ/នាក់ សាលាពុទ្ធិកបឋមសិក្សា មាន៥៤៩សាលា មានសមណសិស្សចំនួន១២.១៧៤អង្គ/នាក់ ពុទ្ធិកអនុវិទ្យាល័យចំនួន២៤សាលា មានសមណសិស្សចំនួន៣.៨៦៣អង្គ/នាក់ ពុទ្ធិកវិទ្យាល័យមាន១២សាលា មានសមណសិស្សចំនួន១.៨២៤អង្គ/នាក់ ។ចំណែកពុទ្ធិកសាកលវិទ្យាល័យមានពីរ គឺពុទ្ធិកសាកលវិទ្យាល័យព្រះសីហនុរាជ មានមហាវិទ្យាល័យចំនួន៥ជាចំណុះ មានសមណនិស្សិត៩៧២អង្គ/នាក់ កំពុងសិក្សា។ លើសពីនោះ ពុទ្ធិកសាកលវិទ្យាល័យព្រះសីហនុរាជក៏មានសាខាពុទ្ធិករបស់ខ្លួនដែរគឺ ១-ពុទ្ធិកមហាវិទ្យាល័យខេត្តកំពង់ចាម មានសមណនិស្សិត៣៨០អង្គ/នាក់, ២-ពុទ្ធិកមហាវិទ្យាល័យខេត្តកំពង់ឆ្នាំង មានសមណនិស្សិត៣០៦អង្គ/នាក់ និង៣-ពុទ្ធិកមហាវិទ្យាល័យខេត្តបាត់ដំបង មានសមណនិស្សិត៤៨៣អង្គ/នាក់ ។ ចំណែកឯពុទ្ធិកសាកលវិទ្យាល័យព្រះសីហមុនីរាជា មាន៤មហាវិទ្យាល័យជាចំណុះ និងមានសមណនិស្សិតចំនួន៤៣០អង្គ/នាក់ កំពុងសិក្សា ។ ជារួមគិតមកទល់នឹងពេលនេះធនធានដែលបានបញ្ចប់ការសិក្សា ហើយបានទទួលសញ្ញាបត្របរិញ្ញាបត្រទៅតាមឯកទេសនីមួយៗមានចំនួនជាង៥០០អង្គ/នាក់។លោកជំទាវបណ្ឌិតម៉ែន សំអន បានថ្លែងសុន្ទរកថាផ្តោតការកោតសរសើរដល់វិស័យព្រះពុទ្ធសាសនាដែលបានរីកដុះដាលទូទាំងប្រ ទេសទាំងផ្នែកពុទ្ធចក្រ និងអាណាចក្រ ព្រោះថាប្រទេសដែលជឿនលឿនលើគ្រប់វិស័យអាស្រ័យដោយប្រទេសនោះមានអ្នកចេះដឹងច្រើនទើបការអ ភិវឌ្ឍប្រទេសមានការជឿនលឿនទៅមុខជាលំដាប់ ក្រោមកិច្ចដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។ ទន្ទឹមនឹងនោះដែរ ក្នុងការបំពេញក្របខណ្ឌគតិយុត្តិក្រសួងធម្មការ និងសាសនាបានពុះពារគ្រប់ឧបសគ្គ បញ្ចូលផែនការយុទ្ធសាស្ត្រអភិវឌ្ឍនានារបស់ខ្លួនទៅក្នុងផែនការយុទ្ធសាស្ត្រអភិវឌ្ឍជាតិ ឆ្នាំ២០០៩-២០១៣ និងបានយកចិត្តទុកដាក់ខ្ពស់លើការអប់រំសីលធម៌ ចរិយាធម៌ តាមរយៈនាទីព្រះពុទ្ធសាសនាផ្សារភ្ជាប់ទៅនឹងសង្គម ដែលបានចាក់ផ្សាយតាមវិទ្យុ ទូរទស្សន៍គ្រប់ប៉ុស្តិ៍ដើម្បីបង្កើនចំណេះដឹងដល់ប្រជាពលរដ្ឋទូទៅទូទាំងប្រទេស សំដៅកាត់បន្ថយនូវភាពអសីលធម៌របស់ក្មេងទំនើងនៅគ្រប់គ្រឹះស្ថានសិក្សា ៕
