កុលសម្ព័ន្ធ Bodi លើកតម្កើងតែ អ្នកក្បាលពោះធំ ឱ្យ​ធ្វើជាអ្នកក្លាហាន

ចំពោះជនជាតិ Bodi នៅ Ethiopia បណ្ដាបុរសដែលមានក្បាលពោះធំ គឺជាក្ដីស្រមៃរបស់បងប្អូនស្រី ក្នុងកុលសម្ព័ន្ធស្បែកខ្មៅមួយនេះ។

រស់នៅក្នុងតំបន់មួយនៃជ្រលងភ្នំ Omo កុលសម្ព័ន្ធ Bodi ឬហៅថា Me’en មានទំនៀមទម្លាប់ចម្លែកមួយ នោះគឺបណ្ដាកម្លោះ ត្រូវតែផឹកទឹកដោះគោ និងឈាមគោ ក្នុងរយៈពេល ៦ខែ ដើម្បីមានឱកាស ទទួលបានជើងឯកជាបុរសធាត់បំផុត និងងារជាអ្នកក្លាយាន។

បន្ទាប់ពីរយៈពេល ៦ខែនៃការបំប៉នឈាម និងទឹកដោះ បណ្ដាបុរសទាំងនោះ ត្រូវបង្អួតរាងរបស់ពួកគេ ដើម្បីឱ្យគណកម្មការជ្រើសរើស។ អ្នកធាត់បំផុត នឹងបានក្លាយជាជើងឯក ហើយត្រូវបានគេដាក់ងារថាជា អ្នកក្លាហានអស់មួយជីវិត។ទិដ្ឋភាពនៃពិធីបុណ្យជ្រើសរើសអ្នកក្លាហាននេះ ត្រូវបានថតទាំងស្រុងដោយ Eric Lafforgue ជាអ្នកថតរូប ជនជាតិបារាំង។ នៅក្នុងដំណើរទេសចរណ៍ក្នុងតំបន់និរតីនៃប្រទេស Ethiopia លោក Eric Lafforgue បានចំណាយពេលដើម្បីស្វែងយល់អំពីកុលសម្ព័ន្ធ Bodi និងពិធីបុណ្យចូលឆ្នាំ Ka’el របស់ពួកគេ។

ប្រការដែលគួរឱ្យព្រួយបារម្ភ នោះគឺថា ពិធីបុណ្យ Ka’el និងរបៀបរស់នៅតាមប្រពៃណីរបស់កុលសម្ព័ន្ធ Bodi កំពុងត្រូវបានគំរាមកំហែង ដោយសារតែរដ្ឋាភិបាលគ្រោងនឹងបញ្ជូនប្រជាជនប្រមាណជា ៣សែននាក់ ឱ្យមករស់នៅក្នុងតំបន់របស់ជនជាតិ Bodi ។

បច្ចុប្បន្ន កុលសម្ព័ន្ធមួយនេះ នៅតែរក្សាទម្លាប់រស់នៅ និងប្រារព្ធពិធីបុណ្យចូលឆ្នាំ នៅខែមិថុនា រៀងរាល់ឆ្នាំ ដូចបុរាណកាល។ ចំណែកការប្រកួតដណ្ដើមជើងឯកអ្នកក្លាហាន ឬអ្នកក្បាលពោះធំ ត្រូវបានគេធ្វើឡើងចាប់ពី ៦ខែ មុនពេលពិធីបុណ្យមកដល់។ គ្រួសារនិមួយៗ មានសិទ្ធិឧទ្ទេសនាមបុរសមិនទាន់រៀបការម្នាក់ ឱ្យចូលរួមការប្រកួត។ នៅពេលត្រូវបានគេជ្រើសរើសជាបេក្ខភាព កម្លោះនោះនឹងត្រូវតម្រូវឱ្យសម្រាក ហើយមិនត្រូវដើរហើរ ឬរួមភេទ ក្នុងរយៈពេល ៦ខែ។

នារីទាំងឡាយ តែងធ្វើខ្លួនយ៉ាងស្រស់ស្អាត ដើម្បីទស្សនាការប្រកួតនេះ

អាហារ ដែលធ្វើឡើងអំពីទឹកដោះគោ និងឈាមគោ ត្រូវបានស្ដ្រីជាអ្នកចម្អិន និងរៀបចំទៀងទាត់សម្រាប់បេក្ខជនទាំងអស់។ ដោយសារតែមេឃក្ដៅខ្លាំង ដូច្នេះ បេក្ខជនទាំងអស់ ត្រូវតែផឹកទឹកដោះគោ និងឈាម ឱ្យបានលឿនបំផុត ចៀសវាងភេសជ្ជៈផ្សំនេះកក។ អ្នកថតរូប Lafforgue ថ្លែងថា ៖ “បេក្ខជនទាំងនេះ ត្រូវផឹកឈាម និងទឹកដោះគោពេញមួយថ្ងៃ។ ឈាមគោដំបូងគឺត្រូវផឹកនៅមុនពេលថ្ងៃរះ ហើយពួកគេត្រូវផឹកយ៉ាងប្រញាប់ មុនពេលឈាមកក ប៉ុន្ដែក្នុងចំណោមអ្នកចូលរួមប្រកួត ក៏មានអ្នកខ្លះមិនអាចផឹកអស់ ជាងនេះក៏មានអ្នកខ្លះក្អួតចង្អោរផងដែរ។