រាជធានីភ្នំពេញ ៖ មហាវិទ្យាល័យវិទ្យាសាស្ត្រសង្គមនៃសាកលវិទ្យាល័យន័រតុនបានរៀបចំបើកសិក្ខាសាលាស្តីពីប្រព័ន្ ធយុត្តិធម៌ព្រហ្មទណ្ឌអនីតិជននៅកម្ពុជា កាលពីថ្ងៃទី៦ មករា នៅសាកលវិទ្យាល័យន័រតុន ដោយមានគណៈគ្រប់គ្រង សាស្ត្រាចារ្យ បុគ្គលិក និងនិស្សិតចូល រួមសរុបចំនួន៣០០នាក់ ។ សិក្ខាសាលាធ្វើឡើងក្នុងគោលបំណងដើម្បីបង្កើនការយល់ដឹង និងបទពិសោធន៍លើដំណើរការនីតិវិធីនៃការចាប់ខ្លួន ការឃុំខ្លួន សវនាការ និងការអនុម័តច្បាប់នៅក្នុងប្រទេសកម្ពុជា ។ សិក្ខាសាលាបានបង្ហាញអំពីប្រព័ន្ធយុត្តិធម៌ព្រហ្មទណ្ឌអនីតិជន ច្បាប់ពាក់ព័ន្ធនឹងយុត្តិធម៌អនីតិជន និងបទប្បញ្ញត្តិការពារអនីតិជន ដែលសមាសធាតុនៃប្រព័ន្ធយុត្តិធម៌ព្រហ្មទណ្ឌទាំងនោះមានដូចជា ក្របខណ្ឌច្បាប់ ច្បាប់អន្តរជាតិ ច្បាប់ជាតិ ពាក់ព័ន្ធនឹងអនីតិជន ការអនុវត្តច្បាប់ ប្រតិបត្តិការបង្ក្រាបបទល្មើស ស្វែងរកបទល្មើសចាប់ជនល្មើស ជួយសង្គ្រោះជនរងគ្រោះ ធ្វើការផ្តន្ទាទោសជនល្មើស លុបបំបាត់និរទណ្ឌភាព ផ្តល់យុត្តិធម៌ដល់ជនរងគ្រោះ ។ អ្នកអនុវត្តច្បាប់មានដូចជាអាជ្ញាធរមានសមត្ថកិច្ច អង្គភាពឯកទេស អយ្យការ តុលាការ ពន្ធនាគារ និងមណ្ឌលស្តារនីតិសម្បទា ។នីតិវិធីនៃការឃាត់ខ្លួនអនីតិជន គឺនៅពេលមានការឃាត់ខ្លួនអនីតិជន នគរបាលយុត្តិធម៌ត្រូវឱ្យដំណឹងអំពីសេចក្តីសំរេចឃាត់ខ្លួនអនីតិជន និងប្រាប់អំពីមូលហេតុនៃការឃាត់ខ្លួននោះ ។ ប្រាប់ឱ្យដឹងអំពីសិទ្ធិមានមេធាវីបន្ទាប់ពីឃាត់ខ្លួនរយៈពេល២៤ម៉ោង គ្រប់ដំណាក់កាលត្រូវមានមេធាវី ។ ត្រូវស្នើសុំគ្រូពេទ្យឱ្យជួយពិនិត្យស្ថានភាពរបស់អនីតិជន ត្រូវឃាត់ខ្លួនឬមិនឃាត់ខ្លួន ហើយនគរបាលយុត្តិធម៌ត្រូវចុះក្នុងកំណត់ហេតុអំពីការពិនិត្យរបស់គ្រូពេទ្យ ។ ត្រូវផ្តល់ព័ត៌មានដល់ឪពុកម្តាយ អ្នកតំណាងស្របច្បាប់ ឬអ្នកទទួលភារកិច្ចលើអនីតិជននោះ ។ ត្រូវមានកំណត់ហេតុលំអិតគ្រប់សកម្មភាពក្នុងពេលឃាត់ខ្លួន ដូចជាឈ្មោះ ឋានៈនគរបាលយុត្តិធម៌ កាលបរិច្ចេទ ពេលវេលា ការជូនដំណឹង ឈ្មោះគ្រូពេទ្យ ថិរវេលានៃការយកចម្លើយ ឧប្បត្តិហេតុជាយថាហេតុ ហើយកំណត់ហេតុនេះត្រូវមានពីរគឺកំណត់ហេតុស្តីពីការឃាត់ខ្លួន និងកំណត់ហេតុសរុបនៃការឃាត់ខ្លួន ៕
