ខេត្តពោធិ៍សាត់ ៖ ជនទំនើងម្នាក់ក្នុងចំណោមបក្សពួក៧នាក់បានត្រូវកំលាំងសមត្ថកិច្ចចាប់ឃាត់ខ្លួនភ្លាម ៗ បន្ទាប់ពីប្រើអំពើហិង្សាដោយចេតនាទៅលើអ្នកដទៃ អុកឡុកក្នុងពិធីរាំធុងបាស់កាលពីយប់ថ្ងៃទី១៥ មករា នៅភូមិស្តុកស្វាយ ឃុំស្នាមព្រះ ស្រុកបាកាន។ មន្ត្រីប៉ូលិសមូលដ្ឋានឱ្យដឹងថា ជនទំនើងដែលឃាត់ខ្លួននេះឈ្មោះប្រុស គ្រួច ភេទប្រុស អាយុ២១ឆ្នាំ រស់នៅភូមិអារ៉ែន ឃុំស្នាមព្រះ។ ឯជនរងគ្រោះដែលត្រូវជនទំនើងវាយរបូស៣នាក់គឺ១-ឈ្មោះពន ណារី ភេទប្រុស ជាអ្នកចាក់ធុងបាស់, ២-ឈ្មោះសយ ភាព ភេទប្រុស ជាប្រជាការពារ និង៣-ឈ្មោះប្រាក់ វៃ ជាប្រជាជនធម្មតា។តាមពាក្យបណ្តឹងរបស់ជនរងគ្រោះបញ្ជាក់ថា កាលពីយប់ថ្ងៃទី១៥ មករា នៅផ្ទះប្រជាពលរដ្ឋឈ្មោះគង់ និន ភេទស្រី អាយុ៥៦ឆ្នាំ ស្ថិតក្នុងភូមិស្តុកស្វាយ ឃុំស្នាមព្រះ មានធ្វើពិធីបុណ្យបច្ច័យបួន និងចាក់ធុងបាស់រាំកំសាន្ត។ នៅវេលាម៉ោង១០ និង២០នាទីយប់ ខណៈពេលកំពុងរាំលេងសប្បាយនោះស្រាប់តែក្រុមជនទំនើងខាងលើមានគ្នាប្រមាណជិត១០នាក់ជិះម៉ូ តូចំនួនពីរគ្រឿង កាន់ដំបង និងខ្សែក្រវាត់ចូលមកអុកឡុកក្នុងពិធីរាំធុងបាស់។ លុះនៅពេលប្រជាការពារ និងនគរបាលប៉ុស្តិ៍ទៅឃាត់ស្រាប់តែកើតរឿងឈ្លោះប្រកែក និងដេញវាយគ្នាផ្អើលពេញរោងបុណ្យ រួចហើយនាំគ្នាជិះម៉ូតូចេញទៅបាត់អស់នៅសល់តែបក្សពួកម្នាក់ឡើងម៉ូតូមិនទាន់ក៏ត្រូវសម ត្ថកិច្ចចាប់ខ្លួនតែម្តង។នៅចំពោះមុខសមត្ថកិច្ច ជនទំនើងម្នាក់នេះបានសារភាពថា ខណៈពេលគេវាយគ្នាពេញរោងបុណ្យនោះខ្លួនកំពុងអង្គុយផឹកស្រានៅខាងក្រោយរោងបុណ្យឯណោះ លុះពេលគេវាយគ្នាចប់ដើរមកមើលក៏ត្រូវសមត្ថកិច្ចចាប់ឃាត់ខ្លួនតែម្តង។ ក្រុមជនទំនើងនោះពិតជាបក្សពួករបស់ខ្លួនមែនហើយ ប៉ុន្តែពេលឈ្លោះប្រកែកវាយតប់គ្នា គឺខ្លួនមិនបានដឹងរឿងអីទេ ឯបក្សពួកខ្លួនពីរនាក់គឺឈ្មោះវណ្ណា និងឈ្មោះតឺម ធឿន ក៏ត្រូវភាគីម្ខាងទៀតវាយបែកក្បាលរបួសយ៉ាងធ្ងន់ធ្ងរដែរ។ ជនឈ្មោះប្រុស គ្រួច ត្រូវបានសួរនាំបំពេញសំណុំបែបបទតាមនីតិវិធីនៅការិយាល័យនគរបាលព្រហ្មទណ្ឌកំរិតស្រាលខ េត្ត ឯបក្សពួក៦នាក់ទៀតដែលរត់គេចខ្លួន សមត្ថកិច្ចកំពុងតាមរក ៕
