ខេត្តកំពង់ចាម ៖ រថយន្តកាមរីគូទហើមពណ៌.ស ពាក់ស្លាកលេខ2F-2426 ដឹកឈើគ្រញូងមួយគ្រឿងបានបុកជាមួយរថយន្ត១គ្រឿងទៀតម៉ាកកាមរីដូចគ្នាពណ៌ស្ពៃជ្រក់ នៅលើកំណាត់ផ្លូវជាតិលេខ៧ ស្ថិតនៅក្នុងភូមិអំពិលលើ ឃុំអំពិល ស្រុកកំពង់សៀម កាលពីវេលា ម៉ោង១០ និង៣០នាទីយប់ថ្ងៃទី៦ មករា លាន់ដូចរន្ទះ បណ្តាលឱ្យរងរបួសមនុស្ស៣នាក់ ក្នុងនោះមានស្ត្រីម្នាក់ ។ ក្រោយពេលកើតហេតុអ្នកបើករថយន្តដឹកឈើគ្រញូងដែលរងរបួសធ្ងន់ត្រូវបាននាំទៅសង្គ្រោះនៅរាជធានី ភ្នំពេញជាបន្ទាន់ផងដែរ ។តាមសេចក្តីរាយការណ៍ពីមន្ត្រីនគរបាលចរាចរស្រុកកំពង់សៀមបានប្រាប់ឱ្យដឹងថា ជនរងគ្រោះ៣នាក់នោះរួមមាន១-ឈ្មោះប៉ិច ផារិន ភេទប្រុស អាយុ៣០ឆ្នាំ រស់នៅភូមិអំពិល ក្រោម ឃុំអំពិល ស្រុកកំពង់សៀម ជាអ្នកបើកបររថយន្តពណ៌ស្ពៃជ្រក់ ២-ប្រពន្ធអង្គុយអែប និង៣-អ្នកបើករថយន្តដឹកឈើគ្រញូងមិនស្គាល់ឈ្មោះក៏បានរងរបួសជាទំងន់ដែរ ។ មន្ត្រីនគរបាលចរាចរបានប្រាប់បន្តថា រថយន្តកាមរីដែលជិះ២នាក់ប្តីប្រពន្ធបានបើកក្នុងទិសដៅពីលិចមកកើត រីឯរថយន្តដឹកឈើគ្រញូងបើកបញ្ច្រាសទិសគ្នាក្នុងល្បឿនយ៉ាងលឿន ។ ពេលមកដល់ភូមិអំពិលលើ រថយន្តដឹកឈើគ្រញូងបានបើកវ៉ារថយន្ត១គ្រឿងនៅពីខាងមុខ ក៏បានជ្រុលមកបុករថយន្តកាមរីដែលជិះ២នាក់ប្តីប្រពន្ធលាន់ដូចរន្ទះនៅកណ្តាលផ្លូវ បណ្តាលឱ្យអ្នកជិះក្នុងរថយន្តទាំង២រងរបួសធ្ងន់ទាំងអស់គ្នា ។ ក្រោយពេលកើតហេតុ អ្នកបើកបររថយន្តដឹកឈើគ្រញូងមិនស្គាល់ឈ្មោះត្រូវបានគេនាំទៅសង្គ្រោះនៅមន្ទីរពេទ្យ 7 D ប៉ុន្តែដោយសារស្ថានភាពរបួសមានលក្ខណៈធ្ងន់ធ្ងរពេក ទើប ត្រូវបានគេបញ្ជូនបន្តទៅសង្គ្រោះនៅរាជធានីភ្នំពេញ ។ ដោយឡែករថយន្តទាំង២គ្រឿងនេះត្រូវបានស្ទូចយកទៅរក្សាទុកនៅអធិការដ្ឋាននគរបាលស្រុកកំពង់ សៀម ដើម្បីដោះស្រាយ។ ឯឈើគ្រញូងត្រូវបានដឹកយកទៅទុកនៅស្នងការដ្ឋានខេត្ត ។តាមប្រភពពីមន្ត្រីកងរាជអាវុធហត្ថខេត្តបានឱ្យកោះសន្តិភាពដឹងថា រថយន្តកាមរីដឹកឈើគ្រញូងនោះសង្ស័យម្ចាស់របស់វានៅភូមិខែលជ័យ ឃុំអូរស្វាយ ស្រុកកំពង់សៀម ពីព្រោះក្រោយកើតហេតុមួយថ្ងៃមានបុរសចំណាស់ម្នាក់បានចេញមកទំនាក់ទំនងជាមួយនឹងនគរបាលចរាចរស្រុ កកំពង់សៀម ។ សមត្ថកិច្ចមួយរូបសុំមិនបញ្ចេញឈ្មោះបានប្រាប់ឱ្យដឹងដែរថា រថយន្តតូចធំដឹកឈើគ្រញូងមកពីណាក៏ដោយឱ្យតែបើកទៅដល់ត្រើយខាងកើតទន្លេមេគង្គនោះ បានយកឈើទៅស្តុកទុកនៅឃ្លាំងធំមួយក្នុងឃុំកណ្តោលជ្រុំ ស្រុកពញាក្រែក ដើម្បីនាំចេញបន្តទៅកាន់ប្រទេសវៀតណាម ។ ប៉ុន្តែមកដល់ដើមឆ្នាំ២០១១ នេះ ឃ្លាំងនោះត្រូវបានបិទទ្វារហើយ ៕
