ក្រុងប៉ោយប៉ែត ៖ ជនសង្ស័យសំគមម្នាក់ចូលបន្ទប់អ្នកស្រុកប្រុងលួចទ្រព្យសម្បតិ្ត តែត្រូវម្ចាស់ចាប់បានប្រគល់ឱ្យប៉ូលិសសង្កាត់ប៉ោយប៉ែត កាលពីវេលាម៉ោង២រសៀលថ្ងៃទី១៨ មករា ។ ខណៈនាំទៅដល់ប៉ុសិ៍្ត ជននោះរត់រួចទៅវិញភ្លាម ដោយបន្សល់ទុកចំណងខ្សែភ្លើងដែលចងដៃទៅក្រោយធ្វើឱ្យប៉ូលិសនាំគ្នាតាមរកឆ្វែងឆ្វាត់គ ្រប់គ្នា តែរកមិនឃើញទេ ។ ជនសង្ស័យឈ្មោះអែម ផល្លា អាយុ២៦ឆ្នាំ គ្មានមុខរបរពិតប្រាកដ ហើយក៏គ្មានទីលំនៅពិតប្រាកដដែរ បានអះអាងថា គេមកពីខេត្តសៀមរាប រស់នៅក្រុងប៉ោយប៉ែតបានជាងមួយខែហើយ ។ ឈ្មោះឈន ហាត់ ភេទប្រុស អាយុ២៧ឆ្នាំ ជាម្ចាស់បន្ទប់ឱ្យដឹងថា ជននោះបានចូលបន្ទប់របស់លោក ខណៈលោករវល់ចេញទៅខាងក្រៅ ។ ពេលត្រឡប់ទៅវិញ លោកឃើញជននោះស្ថិតក្នុងបន្ទប់កំពុងរើកកាយរបស់របរក៏ហៅអ្នកជិតខាងចាប់ប្រគល់ឱ្យប៉ូលិសតែ ម្តង ។តាមការឱ្យដឹងពីស្ត្រីឈ្មោះហុយ តី អាយុ២៤ឆ្នាំថា កន្លងមកជននោះ ក៏ធ្លាប់ចូលលួចលុយ និងបោកប្រាស់នាងថា ប្តីរបស់នាងឱ្យគេមកជួបលក់ស៊ឹមទូរស័ព្ទ ។ មុនពេលជួបនាង គឺគេបានចូលក្នុងបន្ទប់លួចលុយ រួចទៅហើយ ខណៈ នាងរវល់ចេញទៅទិញនំហូបនៅចិញ្ចើមថ្នល់ ។ អ្នកផ្សេងៗទៀត ក៏អះអាងដែរថា កន្លងមកបុរសនោះធ្លាប់ចូលលួចតាមបន្ទប់ជាញឹកញាប់ ប៉ុន្តែចាប់មិនបាន ។ នៅមុខប៉ូលិសជនជាប់ចោទនិយាយថា គេចូលក្នុងបន្ទប់នោះប្រុងលួចអីវ៉ាន់ ប៉ុន្តែត្រូវគេចាប់ជាប់ ។ ជនជាប់ចោទនោះក្រោយពេលបញ្ជូនទៅដល់ប៉ុស្តិ៍ប៉ូលិសបានរត់រួចធ្វើឱ្យប៉ូលិសតាមរកខ្វែងដៃ ខ្វែងជើង តែរហូតដល់ម៉ោង៥ល្ងាច មិនទាន់ចាប់បានវិញទេ ៕
