ខេត្តព្រះវិហារ ៖ ប្រជាពលរដ្ឋខ្មែរ២នាក់គឺឈ្មោះផល រិទ្ធ ភេទប្រុស អាយុ៣៥ឆ្នាំ មុខរបររត់ម៉ូតូឌុប រស់នៅភូមិធម្មជាតិ ឃុំកន្ទួត ស្រុកជាំក្សាន្ត និងឈ្មោះរៀល តែន ភេទប្រុស អាយុ៤៥ឆ្នាំ មុខរបរធ្វើស្រែចំការ រស់នៅភូមិវាលពោធិ៍ ឃុំជាំក្សាន្ត ស្រុកជាំក្សាន្ត ដែរបានត្រូវអាជ្ញាធរថៃនាំខ្លួនមកប្រគល់ឱ្យភាគីកម្ពុជានៅច្រកទ្វារជាំ-សាង៉ាំកាលពីល្ងាចថ្ងៃទី១៣ មករា ។ លោកវរសេនីយ៍ទោតូច រ៉ា ប្រធានក្រុមការងារទំនាក់ទំនងច្រកទ្វារអន្តរជាតិជាំបានឱ្យដឹងថា ប្រជាពលរដ្ឋខ្មែរទាំង២នាក់នេះបានឡើងទៅលើភ្នំដងរែក ស្ថិតនៅចំណុចខាងកើតអានសេះ ក្នុងភូមិជាំក្សាន្ត ឃុំជាំក្សាន្ត ស្រុកជាំក្សាន្ត ក្នុងគោលបំណងឆ្លងដែន និងរកកាប់ឈើគ្រញូង ហើយត្រូវក្រុមទាហានឈុតខ្មៅសៀមចាប់ខ្លួនយកទៅដាក់ពន្ធនាគារខេត្តស៊ីសាកេត កាលពីវេលាម៉ោង១ និង៣០នាទីរសៀលថ្ងៃទី២៩ ធ្នូ ឆ្នាំ២០១០ កន្លងទៅ ។បន្ទាប់ពីក្រុមទាហានឈុតខ្មៅសៀមចាប់ខ្លួន ក៏ត្រូវបានបញ្ជូនទៅដាក់ពន្ធនាគារខេត្តស៊ីសាកេត និងត្រូវបានតុលាការខេត្តនោះបើកសវនាការកាត់ឱ្យប្រជាពលរដ្ឋខ្មែរទាំង២រូបរួចពីផុតការចោទ ប្រកាន់ឆ្លងដែនខុសច្បាប់ ។ បន្ទាប់មក អាជ្ញាធរខេត្តស៊ីសាកេតបានបញ្ជូនប្រជាពលរដ្ឋខ្មែរទាំង២នាក់មកប្រគល់ឱ្យអាជ្ញាធរខ េត្តព្រះវិហារវិញនៅមាត់ច្រក ទ្វារអន្តរជាតិដែលមានលោកក្រូច សម្បត្តិ អភិបាលរងស្រុកជាំក្សាន្ត លោកស ថាវី អភិបាលរងខេត្តព្រះវិហារ ព្រមទាំងមន្ត្រីបំរើការងារនៅច្រកទ្វារអន្តរជាតិជាំជាច្រើនរូបទៀតបានទទួលយកពីអាជ្ញាធ រថៃ កាលពីវេលាម៉ោង៦ល្ងាចថ្ងៃទី១៣ មករា ។លោកស ថាវី អភិបាលរងខេត្តព្រះវិហារបានឱ្យដឹងថា ប្រជាពលរដ្ឋខ្មែរចំនួន២នាក់នេះ បន្ទាប់ពីបានទទួលយកពីអាជ្ញាធរថៃរួចមក លោកនឹងនាំយកទៅធ្វើការអប់រំបន្ថែមមិនឱ្យឆ្លងដែនចូលទៅក្នុងទឹកដីថៃបន្តទៀតដោយខុសច្បាប់ និងឱ្យទៅរួមរស់ជាមួយប្រពន្ធកូនវិញ ។ លោកអភិបាលរងខេត្តបានបញ្ជាក់ថា កន្លងមកលោកតែងតែយកចិត្តទុកដាក់ជំរុញឱ្យអាជ្ញាធរស្រុកធ្វើការប្រជុំផ្សព្វផ្សាយ និងអប់រំប្រជាពលរដ្ឋក្នុងខេត្តមិនឱ្យឆ្លងដែនដោយខុសច្បាប់ឬឡើងភ្នំដងរែកស៊ីឈ្នួលអូស ឈើ កាប់ ឈើគ្រញូងនោះទេ ព្រោះជាប្រឈមនឹងគ្រោះថ្នាក់ដល់អាយុជីវិត ៕