រាជធានីភ្នំពេញ ៖ កាលពីថ្ងៃទី៦ មករា សម្តេចតេជោនាយករដ្ឋមន្ត្រីហ៊ុន សែន និងលោកជំទាវ បានអញ្ជើញចុះសាកសួរសុខទុក្ខ និងចែកអំណោយដល់កុមារពិការភ្នែក កុមារគថ្លង់ និងគ្រូបង្រៀនចំនួន៣មណ្ឌល គឺសាលាកុមារពិការភ្នែក និងកុមារគថ្លង់ភ្នំពេញថ្មីហៅអង្គការគ្រួសារថ្មី សាលាកុមារគថ្លង់ (អង្គការគ្រួសារថ្មីច្បារអំពៅ) និងអង្គការអេស្តេកា(ជួយបណ្តុះបណ្តាលកុមារកំព្រា និងក្រីក្រឱ្យបានចូលរៀន) ។ ពិធីសាកសួរសុខទុក្ខ និងចែកអំណោយនេះបានធ្វើឡើងរួមគ្នានៅសាលាកុមារភ្នែក និងកុមារគរថ្លង់ភ្នំពេញថ្មី ។កុមារទាំងនោះមានចំនួន៣៦៣នាក់ ដោយម្នាក់ៗទទួលបានប៊ិច១ដើម សៀវភៅ២ក្បាលថវិកា១០ម៉ឺនរៀល ហើយគ្រូបង្រៀនចំនួន៩៩នាក់ ម្នាក់ៗទទួលបានថវិកា២០មឺុនរៀល។ ក្រៅពីនេះនៅមានអំណោយមួយចំនួនទៀតក៏បានផ្តល់ទៅឱ្យមណ្ឌលទាំង៣ដែរ ដោយមណ្ឌលនីមួយៗទទួលបានអង្ករ២តោន មីយើង៥០កេសតូច ត្រីខ១០កេសធំ ស្ករស១០០គីឡូក្រាម ប៊ីចេង៥គីឡូក្រាម និងថវិកាចំនួន២លានរៀល។ ដោយឡែកសម្តេចនិងលោកជំទាវនឹងផ្តល់ជារៀងរាល់ខែបន្ថែមទៀតចាប់ពីខែមករានេះតទៅដល់មណ្ឌល ទាំងបីនោះ គឺសាលាកុមារពិការភ្នែក និងកុមារគថ្លង់ភ្នំពេញថ្មីជាទឹកប្រាក់ចំនួន៣លានរៀល និងអង្ករ១តោន សាលាកុមារគថ្លង់ ច្បារអំពៅក៏ទទួលបានដូចគ្នា ឯអង្គការអេស្តេកាទទួលបានថវិកា១លានរៀល និងអង្ករកន្លះតោន ។នៅក្នុងដំណើរចុះសួរសុខទុក្ខរបស់សម្តេចអគ្គមហាសេនាបតីតេជោ ហ៊ុន សែន និងលោកជំទាវនាពេលនោះ ក៏មានរៀបចំបាយទឹក និងម្ហូបឆ្ងាញ់ៗ៧មុខ ចំនួន៧០តុ ផងដែរ ដើម្បីឱ្យកុមារៗទទួលទានបាយជាអាហារថ្ងៃត្រង់ពិសេស។ មានមតិសំណេះសំណាលនៅក្នុងឱកាសនោះ លោកជំទាវបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជាបានលើកឡើងថា ថ្ងៃ៧មករា ជាថ្ងៃកំណើតទី២ របស់យើង ហើយជាថ្ងៃដែលប្រជាជនខ្មែរតែងតែនឹកគិតដល់គុណបំណាច់ដ៏ថ្លៃថ្លារបស់គណបក្សប្រជាជនកម្ ពុជាដែលជួយឱ្យប្រជាជនកម្ពុជាបានរស់ឡើងវិញ បន្ទាប់ពីរស់ដ៏សែនមហាវេទនាក្នុងរបបប៉ុល ពត។សម្តេចតេជោនាយករដ្ឋមន្ត្រីហ៊ុន សែន បានកោតសរសើរថ្នាក់ដឹកនាំកាកបាទក្រហមគ្រប់ជាន់ថ្នាក់ រួមទាំងអាជ្ញាធររាជធានីភ្នំពេញផងដែរ ដែលបានខិតខំយកចិត្តទុកដាក់គិតគូរ និងកសាងទីកន្លែងសាលាកុមារពិការភ្នែក និងកុមារគថ្លង់ភ្នំពេញថ្មីឱ្យមានលក្ខណៈសមរម្យ ដែលទីនេះកន្លងមកជាព្រៃ និងមានភក់ជ្រាំពិបាកក្នុងការរស់នៅ។ សម្តេចក៏បានបង្គាប់ឱ្យអាជ្ញាធរពិនិត្យមើលលទ្ធភាពជួយបន្ថែមទៀត ដើម្បីឱ្យការរស់នៅរបស់កុមារកាន់តែល្អប្រសើរឡើង ៕
