ខេត្តបន្ទាយមានជ័យ ៖ នៅតំបន់ព្រំដែនខ្មែរ-ថៃខេត្តបន្ទាយមានជ័យជាប់ខេត្តស្រះកែវរបស់ថៃ មានសេចក្តីរាយការណ៍មកថា ប្រជាពលរដ្ឋទាំងខ្មែរ និងថៃមានការភ្ញាក់ផ្អើលយ៉ាងខ្លាំងរហូតមានអ្នកខ្លះបានវេចបង្វេចខោអាវរត់គេចចេញពី លំនៅឋាន នៅក្នុងហេតុការណ៍ផ្ទុះធុងហ្គាសជិត១០០ធុងកាលពីវេលាម៉ោង៧និង៣០នាទីយប់ថ្ងៃសៅរ ៍ ទី៨ មករា ២០១១ ម្សិលមិញនេះ ដោយសារតែម្នាក់ៗនឹកស្មានថា ជាគ្រាប់ផ្លោងរវាងទាហានកម្ពុជា-ថៃកើតជំលោះបាញ់គ្នា ។បើតាមអ្នកយកព័ត៌មានកោះសន្តិភាពប្រចាំខេត្តបន្ទាយមានជ័យបានឱ្យដឹងថា ហេតុការណ៍ផ្ទុះធុងហ្គាសនេះបានកើតឡើងខាងទឹកដីថៃ ស្ថិតក្នុងភូមិចាប់សាន់ ឃុំគោកធ្យូង ស្រុកគោកធ្យូង ខេត្តស្រះកែវ ជាប់នឹងព្រំប្រទល់ស្រុក២របស់ខ្មែរគឺស្រុកអូរជ្រៅ និងស្រុកស្វាយចេក ។ សេចក្តីរាយការណ៍បន្តថា នៅក្នុងហេតុការណ៍នោះកងកំលាំងជួរមុខរបស់កម្ពុជាពុំមានការចាប់អារម្មណ៍ ឬភ្ញាក់ផ្អើលនោះទេ ដោយសារសាំនឹងស្នូរគ្រាប់កាំភ្លើងរាប់សិបឆ្នាំទៅហើយ ផ្ទុយទៅវិញ ខាងកំលាំងប្រដាប់អាវុធរបស់ថៃមួយចំនួនមានការភ្ញាក់ផ្អើលរហូតរត់ចូលលេណដ្ឋានត្រង់សេផ ងដែរ ។ សេចក្តី រាយការណ៍បន្ថែមថា មូលហេតុនៃការផ្ទុះធុងហ្គាសជិត១០០ធុងនោះ ពុំទាន់មានការបញ្ជាក់ឱ្យដឹងពីអាជ្ញាធរថៃនោះនៅឡើយទេ ៕