ក្រុមអ្នករៀបចំព្រឹត្តិការណ៍ប្រកួតកីឡាអូឡាំពិកនៅទីក្រុង London ប្រទេសអង់គ្លេសបានត្រៀមកញ្ចប់ស្រោមអនាម័យចំនួន 15 ម៉ឺនកញ្ចប់ ដើម្បីចែកចាយដោយឥតគិតថ្លៃ ដល់ក្រុមកីឡាករ ឬ អ្នកចូលរួមក្នុងការប្រកួតកីឡាដ៏ធំប្រចាំឆ្នាំមួយនេះ។
នាង Hope Solo ដែលជាអ្នកចាំទីនៃក្រុមកីឡាការិនីបាល់ទាត់ជម្រើសជាតិអាមេរិក និងជាម្ចាស់មេដាយមាស ក្នុងការប្រកួតនៅចិន បានថ្លែងថា អត្តពលិកទាំងអស់ដែលចូលរួមការប្រកួតនឹងប្រែក្លាយព្រឹត្តិការណ៍អូឡាំពិកក្រុង London ឆ្នាំ 2012 នេះអោយទៅជា «សិចអូឡាំពិក» ផងដែរ ដូច្នេះ ការមានស្រោមអនាម័យនៅជាប់ខ្លួនវាពិតជាមានសារៈសំខាន់ សម្រាប់ពួកគេ។
នាង Hope Solo បានបន្ថែមថា កាលប្រកួតកីឡាអូឡាំពិក ឆ្នាំ 2008 នៅឯប្រទេសចិននោះក៏មានទិដ្ឋភាពរួមភេទឆ្លងបន្ទប់ឬកណ្ដាលវាលដែរ ដូច្នេះក្រុមអ្នករៀបចំត្រូវតែប្រុងប្រៀប។ កីឡាការិនីជម្រើសជាតិរូបនេះបាននិយាយបន្តថា ៖ នៅក្នុងព្រឹត្តិការណ៍ប្រកួតនេះនឹងមានសកម្មភាពរួមភេទច្រើនជាមិនខាន។
គួរបញ្ជាក់ផងដែរថា ក្រុមអ្នករៀបចំការប្រកួតកីឡាដ៏ធំនៅទីក្រុង London ឆ្នាំ 2012 នេះ បានទទួលការឧបត្ថម្ភ ពីក្រុមហ៊ុនផលិតស្រោមអនាម័យ Durex ដើម្បីយកទៅចែកចាយនៅតាមបន្ទប់ដេករបស់កីឡាករ-កីឡាការិនី ក៏ដូចជាអ្នកចូលរួមកម្មវិធីកីឡាប្រចាំឆ្នាំនេះផ្សេងៗទៀត ។
អ្នកនាំពាក្យរបស់ភ្នាក់ងារ ANI នៃក្រុមអ្នករៀបចំប្រកួតកីឡានេះ បានថ្លែងថា៖ ស្រោមអនាម័យសម្រាប់កីឡាករ ក៏នឹងមានភ្ជាប់មកនូវសារអប់រំ ស្តីពីសកម្មភាពរួមភេទ នាឱកាសនៃការជួបជុំដ៏សម្បើមនៅក្នុងការប្រកួតកីឡាអូឡាំពិករដូវក្តៅ ឆ្នាំ 2012 ដែលនឹងប្រព្រឹត្តិទៅនៅក្នុងទីក្រុង London នាប៉ុន្មានថ្ងៃខាងមុខនេះដែរ៕
រិទ្ធីប្រភព ៖ highstreetmail