រាជធានីភ្នំពេញ ៖ ភ្លើងប្រច័ណ្ឌដោយសារតែស្នេហ៍ត្រីកោណ បានជំរុញឱ្យបុរសម្នាក់បញ្ចេញកំហឹងក្រេវក្រោធ ទៅគាស់ទ្វារបន្ទប់ផ្ទះជួលរបស់ស្រីស្នេហ៍ដែលខ្លួនស្រលាញ់រើកកាយ សំភារ វាយបំផ្លិចបំផ្លាញទ្រព្យសម្បត្តិក្នុងផ្ទះ និងយកបោះចោលចេញមកក្រៅបន្ទប់ទាំងអស់ សូម្បីតែអង្ករដែលទើបតែទិញឱ្យនាង១បាវថ្មីៗក៏ចាក់ចោលរាយប៉ាយ អស់ដែរ ។ ហិង្សាវាយបំផ្លិចបំផ្លាញទ្រព្យសម្បត្តិនេះ បង្កឱ្យមានការភ្ញាក់ផ្អើលកាលពីវេលាម៉ោង១១និង៣០នាទីថ្ងៃទី២០ មករា នៅចំណុចបន្ទប់ផ្ទះជួលលេខ១៨ ផ្លូវលេខ៥៥២ សង្កាត់បឹងកក់ទី១ ខណ្ឌទួលគោក ខណៈពេលដែលស្ត្រីជាទីស្រលាញ់នោះត្រូវបានបុរសម្នាក់ផ្សេង ទៀតឌុបនាងចេញពីផ្ទះ ។
ទោះបីជាយ៉ាងណា ស្ត្រីឈ្មោះឡេះ ស្រីស្រស់ អាយុ២៨ឆ្នាំ ជាស្ត្រីបំរើការនៅខារ៉ាអូខេយីហោសំនៀងចិន្តា ដែលជាតួអង្គកណ្តាលភ្នំភ្លើងស្នេហានេះបានអះអាងថា ដោយសារតែបុរសនេះ តាមស្រលាញ់នាងមិនបានក៏មកគាស់ទ្វារផ្ទះវាយបំផ្លិចបំផ្លាញ ទ្រព្យសម្បត្តិបែបនេះ ។ បុរសដែលផ្ទុះភ្លើងកំហឹងនោះត្រូវបានគេស្គាល់ថា ឈ្មោះចាន់ណា ភេទប្រុស អាយុជាង៤០ឆ្នាំ មានទីលំនៅម្តុំផ្សារអូរឫស្សី ក្នុងខណ្ឌ៧ មករា ។
តាមសាក្សីនៅកន្លែងកេើតហេតុបានឱ្យដឹងថា នៅមុនពេលកើតហេតុ ពេលដែលនាងជាម្ចាស់បន្ទប់ជួលបានចាក់សោចាកចេញពីផ្ទះជាមួយ បុរសម្នាក់ជាសង្សារ ស្រាប់តែបុរសដែលធ្លាប់ជាសង្សារស្ត្រីរូបនេះដែរ បានជិះម៉ូតូម៉ាកវីវ៉ាមួយគ្រឿងមកដល់ ហើយបានយកដែកគាស់សោបន្ទប់ចូលវាយបំផ្លាញកង្ហា ទូរទស្សន៍ ហើយរើពូក ទូដាក់ខោអាវ រើកកកាយបោះចោលទៅក្រៅបន្ទប់ សូម្បីតែអង្ករក៏បានចាក់ចោលរាយប៉ាយពេញបន្ទប់ដែរ គឺបំផ្លាញគ្រឿងក្នុងផ្ទះស្ទើរទាំងស្រុង។ តាមសាក្សីបន្តទៀតថា ក្នុងសកម្មភាពនេះគេឃើញបុរសរូបនោះបានជិះម៉ូតូមកបន្ទប់ជួលនេះ ចំនួន៤ដង ហើយលើកចុងក្រោយបានឌុបប្រពន្ធមកជាមួយផងដែរ ។
តាមសាក្សីបន្តទៀតថា ការមកគាស់ទ្វារផ្ទះវាយបំផ្លិចបំផ្លាញទ្រព្យសម្បត្តិនេះ ដោយសារតែបុរសរូបនោះប្រច័ណ្ឌនឹងស្រីដែលខ្លួនស្រលាញ់បែរជា ទៅស្រលាញ់ប្រុសផ្សេងទៀត ។ ស្ត្រីដែលធ្វើឱ្យបុរសនេះឆាបឆេះដោយភ្លើងប្រច័ណ្ឌបាន ទៅជួលបន្ទប់នៅចំណុចកើតហេតុប្រមាណ១ខែមកហើយ និងធ្លាប់តែឃើញឈ្មោះចាន់ណា ដែលជាអ្នកបង្កហេតុនេះ បានទៅលេង ផឹកស៊ីស្ទើរតែរាល់ថ្ងៃ ហើយគេឃើញបុរសម្នាក់ផ្សេងទៀត ដែលអះអាងថា ជាសង្សារក្រោយរបស់នាងក៏បានទៅផឹកស៊ីនៅបន្ទប់ជួលជាមួយបុរសមុននោះ ដែរ ។ មានន័យថា អ្នកទាំងពីរក៏បានស្គាល់ និងនិយាយគ្នាលេងសើចជាមួយគ្នាផង និងមិននឹកស្មានថា ឈ្មោះចាន់ណា ប្រច័ណ្ឌក្លាយទៅជាហិង្សាបែបនេះឡើយ ។
នារីឈ្មោះឡេះ ស្រីស្រស់ អាយុ២២ឆ្នាំ បានឱ្យដឹងថា នាងត្រូវបានឈ្មោះចាន់ណា តាមស្រលាញ់រយៈពេល២ឆ្នាំមកហើយ តែនាងពុំស្រលាញ់ឈ្មោះចាន់ណា ដែលមានប្រពន្ធ និងមានកូនទៅហើយនោះទេ គឺនាងស្រលាញ់ឈ្មោះវ៉ាន់ ថា អាយុ៣៣ឆ្នាំ ជាអ្នករត់ម៉ូតូកង់៣ រយៈពេល២ខែមកហើយ ។ នារីរូបនេះបានឱ្យដឹងទៀតថា នៅវេលាម៉ោង១១ព្រឹកថ្ងៃទី២០ មករា នាងបានធ្វើដំណើរទៅជាមួយសង្សាររបស់នាងឈ្មោះវ៉ាន់ ថា ។ លុះនៅវេលាម៉ោង១រសៀលត្រឡប់មកវិញឃើញបន្ទប់ត្រូវបានគេគាស់ទ្វារ និងវាយបំផ្លាញសំភារអស់ ។ ស្ត្រីរូបនេះបន្តទៀតថា ការដែលឈ្មោះចាន់ណា គាស់ទ្វារវាយបំផ្លិចបំផ្លាញនេះដោយសារតែតាមស្រលាញ់នាងមិនបាន ។ ទោះបីជាយ៉ាងណា តាមអ្នកដឹងរឿងឱ្យដឹងថា រឿងរ៉ាវនេះដោយសារតែស្នេហាត្រីកោណដែលបុរសនោះប្រច័ណ្ឌនឹងស្រី ដែលខ្លួនស្រលាញ់មានប្រុសផ្សេងទៀត ហើយហែកចែកបេះដូងមិនស្មើគ្នា ៕
http://kohsantepheapdaily.com.kh/art...20-185758.html